1 'Ixaheritsixi tawarita mekaniyekɨne, mayeweritsie Muhawi mekaniuyuhayewa, Kurutani 'anutaɨye, Keriku hɨxie.

2 Kepauka Waraki Tsipuxi nu'aya mɨretima 'ixaheritsixi 'amuxeutsixi kememɨwaruyuriekai, 3 muhawitsixi 'ixaheritsixi mekaniwarutimakani. Kwinie yemekɨ mekatenimamakaitɨni kwinimieme memɨyupaɨmekaikɨ.

4 Hikɨ muhawitsixi 'ukirawetsixi Mariyani kiekatari mɨpaɨ mekateniwarutahɨawe: «'Ikɨ mɨya memɨyupaɨme ta'aurie mɨrahane naime mekatenixɨkuni, wakaxi 'ɨxa kemɨrakumaweriya hepaɨ».

'Ana mana Waraki tsipuxi nu'aya katini'aitametɨkaitɨni Muhawi kwieyaritsie, 5 'ayumieme Warami katiniutanɨ'airieni Wehuxi nu'aya, Petuxi paitɨ mukatei, 'Eupɨrata hatetsitayaritsie, 'amawitsixi wakwieyaritsie. Waraki mɨpaɨ mekateneinɨ'airieni:

7 Hikɨ 'ukirawetsixi Muhawi meta Mariyani kiekatari Warami mekatenekuxatɨani Waraki kemainekai, mekaniu'axɨani tumini me'a'ɨtɨ mete'ipitɨanike xɨka ya'utayɨnike 'ixaheritsixi 'axamɨwayurienikɨ.

8 Warami kaniwaruta'inieni mana memɨtihenikɨ, mɨpaɨ tiwarahɨawetɨ kename 'uxa'ariekake tiwataxatɨanikekai Yawé kemɨtitahɨawekekai. Hikɨ 'itsɨkate mana mekanitiheteitɨni.

9 Kakaɨyari Warami hetsɨa kaniuyuhekɨata mɨpaɨ katinitahɨawe:

—¿Kemɨ'ane mepɨyɨa mɨkɨ teɨteri 'akie memɨtihe?

10 Warami mɨpaɨ kaniutayɨni:

—Texaxatamete mekaniyɨaka Waraki Tsipuxi nu'aya mɨwareyenɨ'a, ti'aitame Muhawi kwieyaritsie. Kaniwareyenɨ'ani memɨnetetaxatɨanikɨ: 11 “Teɨteri 'Ekipitu kiekatari kwie hikɨ 'ena naime mekanikunaka. Kenamieka 'axakeniwaruyuri nehetsiemieme. Mɨpaɨke xɨari nepɨyɨwe newakwinetɨ nemɨwarutaweiya nekwietsie”.

12 Kakaɨyari Warami mɨpaɨ katiniutahɨawe:

—Pepɨkayemie wahamatɨa meta pepɨkawakewaiyaneni 'ixaheritsixi, kiekari 'aixɨa memu'itɨarie mekanihɨkɨtɨni.

13 'Uxa'arieka Warami 'anukukeka 'itsɨkate mɨpaɨ katiniwarutahɨawe Waraki mɨwareyenɨ'a: «Xekenakunuaxɨa yukie, Yawé pɨka'inake xehamatɨa nemeumienikɨ».

14 Memanuyetei muhawitsixi mekanakunuaxɨani hakewa Waraki mekatei, mɨpaɨ mekatenitahɨawe: «Warami pɨkaheyuwaɨri tahamatɨa mamiekɨ».

15 Waraki tawarita kaniwarenɨ'ani 'itsɨkate matsi meyuwaɨkawame, waɨkawa memauka'u, 16 meheta'axɨaka mɨpaɨ Warami mekateniutahɨawe:

—Waraki Tsipuxi nu'aya mɨpaɨ kanetaineni:

18 Warami mɨpaɨ kaniutayɨni:

—Tsepa Waraki yuparatsiyu mɨnetiyetuiri hurute meta pɨratate tihɨneme, ne 'atsinepɨkatiyurieni 'etsitipeme yatɨni timariweme, matsi Yawé nekakaɨyari kemɨti'aita yanepɨtiyurieneni. 19 Xemeta hikɨ tɨkarikɨ 'ena xekenetiheni, ne Yawé 'akuxi nepɨta'iwawiya kemɨnetitahɨawe.

20 Mɨkɨ tɨkarikɨ Kakaɨyari kaniyuhekɨata Warami hetsɨa: «Metsɨ 'ikɨ teɨteri mekameniku'inietɨweni, kenemietsɨ wahamatɨa, xeikɨatsɨ ne kenemerekɨhɨaweni yapekatinekamiemɨkɨ».

21 'Uxa'arieka ximeri Warami kananukukeni, yupuxu kaniutixiratɨani, hikɨ kaneyani 'itsɨkate muhawi kiekatari wahamatɨa. 22 Hikɨ wahamatɨa 'umiekaku Kakaɨyari kaniuyeha'ani, huyetana kaniutakeni Yawé niuki tuayameya, ka'ipitɨanike mana muyeyanikɨ. Warami 'anakaitɨ kaniumiekaitɨni yupuxutsie meta hamatɨana yuhutatɨ mekaniuhukaitɨni 'iparewiwamete. 23 Kepauka puxu Yawé niuki tuayameya muxei 'ixipara 'akwekame, huye kaniuku'eirieni xaɨtsie kaneukuyune. Hikɨ Warami kanikuwaxɨani huyeta mɨyemiekɨ.

24 Yawé niuki tuayameya hetsimanuyewatsie kaniukeni, kaxie haraweriyari makumanetsie, mɨkɨ tetexikɨ kanikurarutɨariekaitɨni naitsarie. 25 Kepauka puxu Yawé niuki tuayameya muxei, kwi hurawa tetsariyatsie kaniukuyani Warami yu'ɨkatsie katiniukwine. Hikɨ tawarita Warami kaniwani.

26 Yawé niuki tuayameya kananuyeyerɨni xaɨtsie paitɨ kaniukeni kwi manuyewatsie, hakewa mɨkaheyɨwe xaɨtsie meukuyune. 27 Kepauka puxu Yawé niuki tuayameya muxei, kaniukahuni Warami 'anakaiku. Hikɨ Warami kaniuyeha'ani kɨyekɨ yupuxu kaniukuwaxɨani. 28 Hikɨ Yawé puxu kaniupitɨani mɨtaniunikɨ, hikɨ mɨkɨ mɨpaɨ Warami katiniutahɨawe:

—¿Kekuta ne nematsi'uyuri, titayari haikakɨa penetiukuwaxɨa?

29 Warami mɨpaɨ katinitahɨawe:

—Penetsinanaimatɨ pepumie. Xɨka 'ixipara nehakwekake, nekameniumienikeri.

30 Puxu Warami mɨpaɨ katiniutahɨawe:

—¿Netsɨ 'apuxu nepɨhɨkɨ nehetsie pemɨkuyerɨne, hɨkɨa mɨreukayunetsie? ¿Kepauka mɨpaɨ nematsiheyuri?

Warami mɨpaɨ kaniutayɨni:

—Nekatixaɨtsietɨ.

31 'Ana Yawé yuniuki tuayame kaniuhekɨata 'ixipara hakwekame Warami mixeiyakɨ. Warami kwiepa paitɨ kaniutihɨximakeni.

32 Yawé niuki tuayameya kanita'iwawiya:

—¿Titayari haikakɨa 'apuxu petiukuwaxɨa? ¿Pekatimate ne nematsikunuitɨanike 'ena nemunuakɨ, nemixeiyakɨ kepemɨtimie 'aixɨa mɨka'anekɨ? 33 Kepauka puxu mɨnetsihexei, haikakɨa hukaniuyune. Xɨka mɨkɨ mɨpaɨ kaheyɨnike, 'ekɨri pekanimɨkinike, mɨkɨta rayenierenike.

34 Warami Yawé niuki tuayameya mɨpaɨ katiniutahɨawe:

—'Axanepɨtiuyuri. Mɨpaɨ nepɨkaretima kename nehuye pe'anunarɨmakai. Kamɨtsɨ xɨka 'aixɨa kane'ane, nekanikunuamɨkɨ.

35 Niuki tuayame Yawé hetsɨa mieme mɨpaɨ katinitahɨawe:

—Kenemie wahamatɨa, keni'akweriwayurieka, ne kenemarekuhɨaweni mɨpaɨ xeikɨa pekanetainemɨkɨ.

Hikɨ Warami kaneyani Waraki mɨwareyenɨ'a wa'ukiyarima wahamatɨa.

36 Kepauka Waraki mɨretima kename Warami 'uhamiekai, kanayeyani 'enukunakeke xeime muhawi kiekariyaritsie kwie manu'axetsie haa manuyekatsie 'Axinuni. 37 Waraki Warami mɨpaɨ katiniutahɨawe:

—¿Tamɨ ne nekamatiutanɨ'airi? ¿Titayari nehetsɨa pekatinua? ¿Nekamarakapitɨaweme peti'erie?

38 Warami mɨpaɨ Waraki katiniuta'eiya:

—'Ari, 'ena nekaniuyeikani. Kepauka Kakaɨyari xeikɨa mɨpaɨ mɨnetikuhɨaweni yaneputaineni.

39 Mana memɨyekɨ Warami meta Waraki mekanekɨne, Kiriati-Kutsuti hepatsie. 40 Waraki wakaitsixi kaniwarutimawa meta muxatsi, mekaniwarutikwani Warami hamatɨa meta 'itsɨkate wahamatɨa memu'uwakai. 41 'Uxa'arieka Waraki Warami kanewitɨni Wamuti-Wahari hɨriyari 'amanutitewatsie, hakewa 'ixaheritsixi memetitekai 'etsiwa mɨwaxeiyakɨ.