2
Mɨtimaiwenikɨ 'aixɨa pɨ'itɨarieka
1 Temaikɨ, xɨka neniuki pe'anu'enieni,
meta ne'aitsika pe'uti'uta 'ahetsie.
2 Xɨka 'anaka mɨtimaiwenikɨ mɨ'ayumieme 'u'enieni.
Meta 'a'iyarikɨ pe'ayetuani pemɨrakumaikakɨ.
3 Xɨka mɨrakumaikakɨ pe'utahɨawe,
meta pemeitimaitɨyeikanikɨ pe'uta'iwauni.
4 Xɨka pɨrata hepaɨ petikuwauneni,
tumini mɨ'awietɨ hepaɨ,
5 hikɨ yapepɨretimani Yawé kemɨrayemakaxenikɨ
meta pepikaxeiya Kakaɨyari kemɨtiuyemate.
6 Yawé xeikɨa katiniyupitɨwani mɨtimaiwenikɨ mɨ'ayumieme,
mɨrakumaikakɨ tatsiere pɨtiyupitɨwa tetana kanayeneikani.
7 Mɨkɨ kaniwaparewieka 'aixɨa memɨte'u'iyari.
Meta kaniwa'ɨwiyani kemɨ'ane heitserie memu'uwa.
8 Mɨkɨ heitserie yamemɨtekahu wahuye kani'ɨwiyani
meta 'aixɨa memɨteyurie wahuye.
9 Hikɨ 'ana pekaneitimaimɨkɨ heitseriemekɨ 'apemuyeikanikɨ,
meta hipame 'aixɨa pemɨtiwaxeiyanikɨ yunaime.
10 Mɨtimaiwenikɨ mɨ'ayumieme 'a'iyaritsie kaninuamɨkɨ,
meta pemɨtimaikakɨ 'ana 'aixɨa 'iyari 'apepuyeikani pe'atemawietɨ.
11 'Aixɨa pemɨreitimamatekɨ pɨmatsi'ɨwiyani,
'ahetsie kepemɨtiuyemate pumatsi'awietani.
12 Mɨtimaiwenikɨ mɨ'ayumiememe 'axamɨti'anetsie pɨmatsixɨna,
meta teɨteri 'axamemutiyuane wahetsɨa,
13 huye mɨheitserie me'uku'eirieka,
huye mumariwetsie pɨta memuhunikɨ.
14 Mepuyutemawie 'axameteyurietɨ,
pɨwanake kepauka teɨteri 'axamemɨteyurietsie.
15 Huye mututuni memuweiya
meta huye xaɨtsie meukuyuyune.
16 Xɨka petimaiweni 'uka mɨwikie hepaɨtsita pepɨ'a'ɨwiyani,
meta 'uka pemɨka'imate niukieya witsimutaine hepaɨtsita.
17 Mɨkɨ 'uka Kakaɨyari hamatɨa tɨratu kemɨtiuwewi hatɨmaiyaka,
yɨkɨna kemɨtiuku'eiri 'ɨimariyari mitiwitɨ,
18 kemɨ'ane menuweiya mɨkɨ mɨkitewatsata kaniyɨaneni,
huyeteya yɨwipa xeikɨa kanimiemetetɨni.
19 Kemɨ'ane mɨkɨ 'uka winiyarieyatsie mɨyɨhɨani hatsuakuri pɨkahakunuani,
tukari huyeyari pɨkakaxeiya.
20 'Ayumieme mɨpaɨ pepɨtiuyeikani huye 'aixɨa mɨ'ane 'utuma,
meta huye heitserie memu'uwa memiweiya pepuweiyani.
21 Heitseriemekɨ yamemɨtekahu wahetsie mɨkarahɨiwa,
kwie wahetsiemieme kanayeimɨkɨ meta yuheyemekɨ mana mekaniu'uwakuni.
22 Kemɨ'ane 'axamemɨteyurie mepakumaweriyarieni,
yukwie memɨtsewiximakɨ yuheyemekɨ mekanikwi'iwakuni.