3
Kehepaɨ mɨ'aneni mɨtimaiwenikɨ mɨ'ayumieme
1 Temaikɨ, pepɨkaratɨtɨmaiyani kenemɨmati'ɨxatsitɨa,
matsi pɨta, yuheyemekɨ kena'eriwani ne'aitsika.
2 Karikɨ xɨka mɨpaɨ pe'aneni mɨixa wiyari pekanitihuimɨkɨ
meta 'aixɨa 'iyari pepuyeikani.
3 Hatsuaku pepɨkaratɨtɨmaiyani peti'akanaki'erietɨ meta yuri petikuxatatɨ:
'Aheyemekɨ mɨpaɨ ketinekamieni
meta 'a'iyaritsie paitɨ kena'utɨaka.
4 Mɨpaɨ xɨka petikamieni Kakaɨyari 'aixɨa pɨmatixeiyani,
meta teɨteri 'aixɨa meputiyuaneni 'ahepaɨtsita.
5 Yawé hetsie ketinewiyani naime 'a'iyarikɨ,
hawaikɨ kepemɨtimaiwe 'ahetsie pepɨkatiwiyani.
6 Kakaɨyari kena'eriwani naimekɨ kepemɨtiyurienekɨ,
'ana mɨkɨ 'ahuye pɨheitseritɨaka.
7 Kwinimieme perakumaikame pepɨkayuxatani:
matsi pɨta Yawé kenayemakaxeni meta 'axamɨti'ane hepaɨtsita kene'apatani.
8 Mɨpaɨ xɨka petikamieni 'aixɨa pepɨreu'erieka 'awaiyaritsie,
meta pepɨtɨrɨkaɨyeni.
9 Yawé kenayexeiyani tita pemɨrexeiyakɨ,
meta matɨarimieme 'ikwaxi keneyetuirieka tita pemɨtiukaxexeiya.
10 Mɨpaɨ xɨka petiyurieneni 'akaretatsie tɨriku takariyari panakaxɨrɨweni,
meta 'akiita kaxie winuyari mɨhekwa pɨxuaweni.
11 Temaikɨ, xɨka Yawé matsi'anayewayani meti'ɨkitɨatɨ pepɨka'i'uxiwe'erieka,
meta kepauka mɨmatsi'utate'ani pepɨka'uyeha'arɨweni.
12 Yawé matsi pɨwaranayewaya tiwa'ɨkitɨatɨ kemɨ'ane mɨwanaki'erie,
tewi yuniwe 'inaki'erietɨ kemɨti'ɨxatsitɨa hepaɨ.
13 'Aixɨa kani'itɨarieka kemɨ'ane mɨtimaiwenikɨ mɨ'ayumieme mukaxei,
meta kemɨ'ane waɨka mɨtiuyemaikakɨ mutaxei.
14 Kepauka pemɨtimaiwe, matsi waɨkawa pekanipitɨarieka
keyuri pɨrata meta huru.
15 Kepauka pemɨtimaiwe, matsi waɨkawa pekanipitɨarieka
keyuri tetexi witsimɨ'anene, pɨtiumawe hepaɨna witsiti'anetɨ.
16 Kepauka pemɨtimaiwe, pepɨxatɨarieni mɨixa wiyari pemexeiyanikɨ,
meta 'aixɨa pepɨtixeiyarieka meta waɨkawa pepɨrexeiyani.
17 Kepauka pemɨtimaiwe witsi'anemetsie pepumieni,
naitɨ 'aixɨa katini'anemɨkɨ 'ahetsiemieme.
18 Mɨkɨ kɨye tukari tiyupitɨwame kanihɨkɨtɨni kemɨ'ane memitapa wahetsie,
'Aixɨa mekani'itɨarieka kemɨ'ane memeixeiya.
19 Yawé kwie kaniutawewieni kemɨtiuyematekɨ,
muyuawi tatsiere 'akaniuyemani taheima kemɨrakumatekɨ.
20 Mɨkɨ yareitimaixɨaku haramara kaniupatsirixɨani meta haa kanetinetɨaxɨani,
meta haiwitɨritsie wiyeri 'akaneikatɨ kanayani.
21 Temaikɨ, kene'a'ɨwiyani 'aixɨa ti'aneme pemɨranayexeikɨ,
pepɨkahetɨtɨmaiyani 'ɨxatsi 'aixɨa pemɨtiu'eni.
22 Xɨka mɨpaɨ petikamieni mɨixa wiyari 'apepuyeikani,
meta kuka pematitɨkɨni hepaɨ pepɨ'aneni.
23 Hikɨ 'aixɨa 'iyari pepumieni,
meta hatsuaku pepɨkahekaweni.
24 Kepauka pemɨkahunitsie, tixaɨtɨkɨ pepɨkareumaka,
hikɨ pekahume 'aixɨa 'iyari pekaneukumɨkɨ.
25 Pepɨkaheumaka xɨka yapauka 'axamɨti'ane tiukuyani,
meta kepauka 'uximatɨarika 'axateyuruwamete wahetsiemieme munuani pepɨkaheumaka.
26 Yawé yuheyemekɨ 'ahamatɨa kaniuyeikamɨkɨ,
meta kameni'ɨwiyakamɨkɨ winiyaritsie kapa pe'uwierekɨ.
27 Pepɨkahe'imaiyani kemɨ'ane parewiya mɨmatsitawawirieni,
xɨka perexeiyani tita mɨreuyehɨwa.
28 'Ahepaɨ tewi hatsuaku 'ipaɨ pepɨkarahɨaweni:
«Nepɨkayɨwe 'arike pepayeneni, 'uxa'ake nepɨmatsiparewieni»,
xɨka perexeiyanitɨtɨ hikɨ titakɨ pemɨtiparewieni.
29 Tita 'axamɨti'ane 'ahepaɨ tewi pepɨkawiwirieka,
'iya 'aixɨa mɨmatiku'eriya.
30 'Imieri pepɨkakuwauneni xeime hetsie,
xɨka mɨkɨ 'atsikametsi'uyurieni.
31 Memayu'eririya ketita memɨtehexeiya pepɨkatihiwe'erieka,
'ekɨ meta memayu'eririya pepɨkawa'ɨkeni.
32 Yawé kaniwaxani'erieka 'axamemɨte'u'iyari,
peru kemɨ'ane 'aixɨa memɨte'u'iyari kaniwanaki'erieka.
33 Yawé 'uximatɨarika kanipitɨaka, kemɨ'ane 'axamɨtiyuriene kie,
matsi 'aixɨa katiniyurieka kemɨ'ane yamemɨtekahu wakie.
34 Yawé kaniwananaimaka kemɨ'ane memɨte'uyukatawe'erie,
peru kemɨ'ane tixaɨtɨ memɨkate'ayuyeitɨa mɨkɨ puwaparewie.
35 Kemɨ'ane memɨtemaiwawe 'aixɨa mepɨtehamamatiwani,
matsi kemɨ'ane memɨkayuwaɨriya memɨwaparewienikɨ teɨteri hipame 'aixɨa pɨ'ane 'axamemɨtehamamatiwanikɨ.