5
Mari'itɨarika kayɨ'ɨya kayɨkɨna hepaɨtsita
1 Temaikɨ, keneneu'eni kenemɨtimaiwe,
Yemekɨ keneu'ena heitserie kemɨtikamieni,
2 merikɨte kepauka pemɨtikuxatanitsie
petimaiwetɨ ketinekuxatani.
3 'Uka mɨka'a'ɨya tenieyatsie xiete kaniuhaneni,
nenieya matsi witsiputaine, keyuri huriwa hatseitiyari.
4 Peru 'imatɨriekake matsi waɨkawa hatsiwitɨ payeika keyuri tsiɨrika,
meta kwinimieme pɨrataxikaunare keyuri 'ixipara naitsata meutixikakauni.
5 Mɨkɨ mɨkite watsata kaniumieni,
mɨkɨ mɨki teukiyapa kaneyani.
6 'Etsiwa tɨma tukari huyeyari pɨkamate,
yakɨxeikɨa puyeika 'atsikatimaitɨ.
7 Neuxei, temaikɨ 'aku, keneneu'eni,
neniuki pepɨkahatɨtɨmaiyani.
8 Mɨkɨ 'uka mɨka'a'ɨya pepɨka'enieka,
'ahurawa kiteniena tɨma pepɨkaye'axeni,
9 'Atɨrɨkariya peyetuayu kapa petiutakwine,
kapa 'atukari memayu'eririya wahetsɨa peyetuani,
10 'atumini waɨriyarika peme'iwaxɨ kapa hipame wahetsiemieme rayanikɨ,
kapa hipame wakiita tiyuhayewanikɨ titapemɨra'iwaxɨ.
11 'Imatɨarieka tixaɨtɨ pekarexeiyatɨ pepɨtatsuani,
kepauka haweri pe'anetɨ pemayani tixaɨtɨ pekarexeiyatɨ.
12 'Anake mɨpaɨ pekanitayɨmɨkɨ: «Titayari 'ɨxatsi nekatiu'eni kemɨtikuxaxatsiwakai.
Titayari ne'iyaritsie netitatawe'eri mɨkɨ 'ɨkitɨarika.
13 Nepɨka'i'eni nete'ɨkitɨwamete waniuki,
hatsuaku nepɨkawaru'eni nete'ɨkitɨwamete.
14 Hikɨri yemekɨ kwinimieme haweri 'anekɨa nekaniyuhayewa,
yunaime teɨteri wahɨxie».
15 Haa 'ahaputsuta mieme xeikɨa kenehareka,
haa 'ahaixata maneika xeikɨa.
16 ¿'Ahaa kaye'utɨma mɨtayeuriweni metinake
metatsiere 'ahaa 'ahaixata mieme teɨteri memayukuxexeɨriwatsie mɨtayeuriweni metinake?
17 Mɨkɨ haixa katini'apiinitɨni, 'ekɨ xeikɨa,
hawaikɨ pɨkayɨwe hipame pemɨwaharitɨaka.
18 'Aixɨa ke'itɨarieka 'a'ɨya.
Kene'atemawieka temaikɨyari pemitiwitɨ hamatɨa.
19 Maxa witsimɨti'ɨimari hepaɨ kani'aneni,
kapura yeutanaka 'ɨimari hepaɨ kani'aneni mɨtiyukanaki'erie.
Naki'eriyaya kematsitemawieritɨaka.
Naki'eriyaya yuheyemekɨ 'ahetsie ketiwiyani.
20 ¿Temaikɨ 'aku, titayari peti'awaɨriyani 'uka mɨka'a'ɨya hamatɨa?
¿Titayari xeime 'ɨyaya naki'eriyaya petikuwauneni?
21 Tahuyeta ketemɨteyurie Yawé naime kanixeiyani,
tahuye naime kanimaika.
22 'Axatiyuruwame yɨkɨmana puyuwiniya 'axatiyurienetɨ,
'axamɨti'ane mɨrexeiya kaunariyari mɨkɨ kanenutahɨaximeni.
23 Mɨpaɨ mekatenitakukuweni memɨkayɨ'ɨxatsitɨarinɨa,
kanimɨmɨkɨ mɨkaheu'enakɨ.