6
Mari'itɨarika mɨkaheu'ena hepaɨtsita
1 Temaikɨ 'aku, xɨka xewitɨ pemimate matsi'inieka hetsiena mieme pemɨrayukatuanikɨ,
xɨka pemɨka'imate kename pera'akatuani petitahɨawe,
2 xɨka 'aniuki 'anatiyani kename yapetikayani,
pekaniyutahɨamɨkɨ 'aniukikɨ,
3 merikɨte 'ahepaɨ tewi kameniuwiniya.
Temaikɨ 'aku, xɨka peyuxɨnamɨkɨni, 'ikɨ huye kanihɨkɨtɨni:
Xeiya kenemie hetsɨana tixaɨtɨ pekarayuyeitɨatɨ,
tɨratu kepemɨtiuwewi keneutawawiri pemɨtihayewanikɨ.
4 Pepɨkakutsuni,
kenayeniereni.
5 Keneu'ata'una maxa mɨtiutananautsa hepaɨ hupierienetɨ,
meta wiki winiyari mɨtiutawikweiya hepaɨ.
6 'Ekɨ pemɨ'a'ɨraxie, paratsɨ tsarɨ keneuxeiya.
Mana keneye'ɨki kemɨtiyuriene petimaiwetɨ pekanayeimɨkɨ.
7 Mɨkɨ mepɨkaheixeiya kemɨ'ane mɨwanɨ'a,
meta kemɨ'ane mɨtiwa'aitɨa.
8 Mɨkɨ yunaitɨ, witarita mekateniuka'utani,
'itsanaxa yu'ikwaite mekateniuka'utani.
9 'Ekɨ pemɨ'a'ɨraxie, ¿kepaɨmexɨa 'akuxi mɨpaɨ pepɨtiuhupuni?
¿Kepaukake tamɨ pepanutaniere?
10 'Etsiwa peheukukutsutɨ,
'etsiwa pe'uka'uxipiwetɨ, meta 'atapa pe'awietɨ,
11 tinawayame hepaɨ katininuamɨkɨ tixaɨtɨ pekarexeiyatɨ pemayani,
tewi titakɨ mɨramieni 'akwetɨ 'ahetsɨa munuani hepaɨ katininuamɨkɨ haakaxa.
12 'Axamɨtiuka'iyari tewi mɨka'uyukatewiya,
ti'itawatɨ xeikɨa kanikuyeikani tsepa hakewa,
13 mɨpaɨ mepɨtekuxata yu'iwama wahamatɨa 'iyari mewewietɨ,
yu'ɨkatekɨ meta yu'itɨwamekɨ mekaniku'inɨaritani xeikɨa.
14 'Axamɨtiyuriene kaniyu'iyaritɨaka 'axamɨti'anekɨ xeikɨa,
meta kanikuwauneni mɨpaɨ tiyuhaxɨatɨamɨtɨ.
15 'Ayumieme yapauka haweri katiniwakuyuruwani,
yapauka 'ana kanika'unariemɨkɨ pɨkayɨwekaxɨani yuheima mɨtanuanikɨ.
16 'Ataxewitɨ kanixuaweni teɨteri kememɨteyurie Yawé mi'uxiwe'erie,
meta xeime matsi mixani'erie:
17 yuhɨxitekɨ kwinie memɨte'uneniere,
yunenikɨ memɨte'itawa,
yumamatekɨ 'axamɨkatiuka'iyari xuriyaya mɨtayeuriwa,
18 yu'iyaritsie mɨtiha'aritɨa 'axatiyurimɨtɨ,
yu'ɨkatekɨ xeikɨa mɨyumexɨitɨa 'axamɨtiyurienenikɨ,
19 kemɨtiunierixɨ ti'itawatɨ mɨtikuxata,
meta kemɨ'ane yu'iwama mɨwakwamana memuyukwitɨwenikɨ.
Mari'itɨarika xeime kɨnaya 'ɨyaya hepaɨtsita
20 Neuxei temaikɨ, 'apaapa 'aitsikaya naime kenaye'atɨwani
meta 'amaama 'ɨkɨtɨarikaya pepɨkahehɨpani.
21 'A'iyaritsie kenaka'utɨa,
kenakatɨkɨni kuka hepaɨ.
22 Kepauka pemukuyeika 'apaapa meta 'amaama wa'aitsika pɨmatsi'uwitɨximeni,
kepauka pemukutsu wahɨritɨarika pɨmatsi'ɨwiyani,
meta kepauka pemanutanieretsie, 'ahamatɨa memɨtekuxatani hepaɨ kani'aneni yu'aitsikakɨ.
23 Kɨxeme kanihɨkɨtɨni 'aitsika,
meta 'ɨkitɨarika hekɨariwiwame kanihɨkɨtɨni,
'ɨxatsitɨarika tukari huyeyari kanihɨkɨtɨni pemɨkaheuyewenikɨ.
24 Mɨkɨ 'ɨxatsi pɨmatsi'ɨwiyani 'iya 'uka hepaɨtsita 'axamɨtiuka'iyari,
xewitɨ mɨka'a'ɨya, yuniukikɨ mɨtiyuwiniya hepaɨtsita.
25 'A'iyaritsie pepɨka'ihiwe'erieka witsimɨti'ɨimarikɨ,
kene'akweriwayurieka yuhɨxitekɨ metsi'uwiniyakɨ,
26 karikɨ 'uka tuminikɨ muyuwitɨnɨa 'atumini xeikɨa kanitixɨtɨamɨkɨ,
meta xɨka xeime 'ɨyaya peyurieneni kɨnaya 'atukari pumatsinawairieni.
27 ¿Kepaikɨ pɨyɨwe tɨɨ yutawitsie mayatsa,
kamixaya kahataiyatɨ?
28 ¿Kepaikɨ pɨyɨwe matitɨɨyatsie muyeyani,
kakukwaxiketɨ?
29 Kamɨtsɨta kemɨ'ane xeime 'ɨyaya mukumayɨani,
hamatɨana mɨkahuni hetsienatsɨ pɨrahɨiyani.
30 'Axapɨkatiyuxexeiya xewitɨ tinawanetɨ,
mɨyehaakamɨnekɨ xeikɨa,
31 xɨka 'uwiyarieni, matsi katiniyetuamɨkɨ,
'atahutamexɨatsie timieme mɨtiunawakɨ,
matsi yupiinite naime katininawaiyariemɨkɨ.
32 Peru matsi kemɨ'ane xeime 'ɨyaya meta kɨnaya mukumaɨwa, pɨkaheitimaitɨyeika,
kemɨ'ane mɨpaɨ mɨtiuka'iyari yɨkɨmana kaniyukamiemɨkɨ.
33 Katinikwinitɨariemɨkɨ kanitewiyatsitɨariemɨkɨ,
meta hatsuaku pɨkaratɨmaiya kemɨtiuyuri.
34 Meta 'uki kaniha'akamɨkɨ 'ɨyaya munanaimakɨ,
kepauka 'uki mɨyɨkɨhɨani 'anatukaritsie pɨkareiyehɨwirieni.
35 'Uki mɨnanaimarie tixaɨtɨ pɨkatitanaki'erieni,
tsepa witsiti'aneneme mɨtiyexatɨarie, mɨkɨkɨ pɨkayukatemawieni.