11
1 Yawé kaniwa'uxieka memɨteyukwamana,
peru kemɨ'ane memɨkateyukwamana matsi 'aixɨa katiniwaxeiyani.
2 Kemɨ'ane mɨtiyukatawe'erie kaniyutewiyatsitɨamɨkɨ,
kemɨ'ane mariweme mɨka'ayuyeitɨa, timaiwetɨ payani.
3 Heitserie 'amemu'uwa tita mɨtiheitserie puwaruwitɨxime,
kemɨ'ane memɨte'itawa wa'itarika puwaka'una.
4 Xikutɨriya tixaɨtɨ pɨkarayani kepauka 'itsɨkame mɨmariwe hɨxie mɨtaxanetsienitsie,
peru heitserie 'axɨka'uyeikani mɨkitsata pɨtawikweni.
5 Heitseriemekɨ 'amemu'uwa tita mɨtiheitserie puwaruwitɨxime,
peru 'axamɨti'ane 'axateyuruwamete pɨwarekaxɨrɨwa.
6 Tita mɨtiheitserie puwawikweitsitɨa heitseriemekɨ yamemɨtekahu,
peru tita memɨtehiwe'erie 'axateyuruwamete kaniwaranutaxɨrɨwani.
7 Kepauka 'axatiyuruwame mɨmɨni, pɨmɨnita tita mɨtitakwewiekai,
meta pɨmɨni kemɨtiku'eriwakai mariwetɨ kemɨrayanikekai.
8 Heitseriemekɨ yamemɨtekahu mepɨwikweitsitɨarie kwaniwemetsata,
matsi 'axatiyuruwame haweri pɨranuyeyani.
9 'Axatiyuruwame yutetakɨ yuhepaɨ tewi kanika'unani,
peru heitseriemekɨ yamemɨtekahu memɨtehakumatekɨ mepuwikwe.
10 Kepauka heitseriemekɨ muyeika Yawé miparewie, naitɨ kiekari puyutemawie,
kepauka 'axatiyuruwame mumɨni, waɨkawa temawierika puxuawe.
11 Heitseriemekɨ yamemɨtekahu kiekari 'aixɨa mepuyurie,
peru 'axateyuruwamete yuniukikɨ mepika'una.
12 Yakɨ xeikɨa mɨtiyuriene 'axaputaine yuhepaɨ tewi hepaɨtsita,
peru kemɨ'ane mɨtimaiwe puyupirenutɨa.
13 Teɨteri niuki peraixi tinaime mepɨte'axatawawe hipatɨ memɨtemaikakɨ,
teɨteri 'aixɨa memɨte'u'iyari naime mepɨkatekuxata.
14 Ti'aitame xɨka 'aixɨa kati'aitani kiekari kanatiwemɨkɨ,
'aixɨa mɨtiyɨnikɨ yuwaɨkawatɨ 'ɨxatsitamete mepeuyewetse.
15 Kanikweriwa'aneni xeime pemɨka'imate hetsiemieme pemɨre'akatuayanikɨ,
kemɨ'ane mɨkayuwaɨriya xeime hetsiemieme mɨrayukatuanikɨ 'aixɨa 'iyari kaniuyeikani.
16 'Ukaratsi 'aixɨa mɨtiuka'iyari 'aixɨa pɨtixeiyarie,
teɨteri memɨteyukananaima tumini xeikɨa mepɨ'iwaku.
17 Kemɨ'ane 'aixɨa 'iyarikɨ mɨtiyukanenimaya yɨkɨmana puyuparewie,
kemɨ'ane 'axamuwayurie hipame mɨkɨta yɨkɨmana 'axapuyuyurie.
18 'Axatiyuruwame kwamanarikakɨ xeikɨa katina'i'iwani,
matsi kemɨ'ane heitseriemekɨ yamemɨtekahu wa'iwarika 'aixɨa kani'aneni.
19 Kemɨ'ane heitseriemekɨ yamɨtikamie waɨkawa tukari pupitɨarieni,
kemɨ'ane 'axamɨti'ane mɨranukuwei kwitɨwa pumierieni.
20 Yawé puwaxani'erie kemɨ'ane wa'iyari mututuni,
matsi puyutemawie kemɨ'ane heitseriemekɨ yamemɨtekahu wahetsiemieme.
21 'Axateyuruwamete mepɨkateheuyehɨwiyarieni 'axamemɨte'uyurikɨ,
peru heitseriekamekɨ yamemɨtekahu mepuyutawikweitsitɨani.
22 'Uka witsimɨti'ɨimari matsi kayɨkɨhɨawetɨ mutaniuka,
huru hanirayari hepaɨ kani'aneni tuixu tsurieyatsie muyewie.
23 Heitseriemekɨ yamemɨtekahu ketita memɨtehiwe'erie 'aixɨa pɨtikuyɨne,
'axateyuruwamete kememɨteku'eriwa 'axapɨtikuyɨne.
24 Kemɨtiwamikwa waɨkawa yutemawietɨ, mɨkɨ waɨkawa matsi pɨtipitɨarieni,
matsi hipatɨ kememɨte'apitɨkakɨ xɨka mɨpaɨ mekate'uyutuani matsi kwinimieme haweri me'anenetɨ mepakɨne.
25 Kemɨ'ane tita mɨrexeiyakɨ hipame muwaparewie 'aixɨa pɨ'itɨarie,
kemɨ'ane hipame muwaparewie mɨkɨta waɨkawa puparewiyani.
26 Kemɨ'ane tɨriku mɨti'awieta yuhetsiemieme mɨkɨ teɨteri 'axameke'utiyuani hepaɨtsitana,
peru 'aixɨa pɨ'itɨarieni kemɨ'ane 'aixɨa 'iyari mituani.
27 Kemɨ'ane ximeri paitɨ manukukeka 'aixɨa tiyurienike, 'aixɨa ti'aneme pɨtiukaxexeiya,
kemɨ'ane 'axamɨti'ane mɨtinake, 'axamɨti'ane pɨrenuku'axe.
28 Kemɨ'ane yupiinitɨarikatsie mɨtiwiya kanitayɨnarimɨkɨ,
matsi heitseriemekɨ yamɨtikamie kɨye mɨyɨra hepaɨ kani'aneni.
29 Kemɨ'ane yukie 'uximatɨarika mɨwiwie tixaɨtɨ 'aixɨa ti'aneme pɨkatikuhayeikawa,
kemɨ'ane 'axamɨtiyuriene yutemawietɨ xeime mɨtimaiwe ti'uximayatsirietɨ payani.
30 Heitseriemekɨ yamɨtikamie mɨkɨ kɨye tukari tiyupitɨwame hepaɨ kani'aneni.
Mɨtimaiwe tukari 'aixɨa 'aneme kaniwapitɨaka memeuyexɨrixime.
31 Heitseriemekɨ yamemɨtekahu 'ena kwiepa yu'iwarika mekanexeiyani,
matsi waɨkawa yemekɨ mekatenakapitɨariwani 'axateyuruwamete.