12
1 Kemɨ'ane muyuwaɨriya mɨtita'ɨkitɨarieni puyuwaɨriyata mɨretimanikɨ,
matsi kemɨ'ane 'ɨkitɨarika mu'uxiwe'erie mɨkɨ pɨka'uka'iyari.
2 Tewi 'aixɨa mɨtiuka'iyari mɨkɨ Yawé piparewie,
matsi kemɨ'ane 'axamɨtiuka'iyari hetsiena katiniɨhɨpani.
3 Xewitɨ pɨkayɨwe 'axamɨti'ane hetsie tiwiyatɨ 'aixɨa muyukuyurieni,
matsi heitseriemekɨ yamemɨtekahu wananari 'atsipɨkayɨni.
4 'Uka 'inɨari mayuyeitɨwa yɨkɨna pɨtemawieritɨa,
matsi 'uka tewinɨarika mɨwewie yɨkɨna 'umeteya pɨtixɨtɨaxime.
5 Teɨteri heitseriemekɨ yamemɨtekahu kememɨteku'eriwa pɨheitserie,
matsi 'axatiyuruwame 'ɨxatsieyatsie 'itarika xeikɨa puxuawe.
6 'Axateyuruwamete waniuki winiyari mɨmɨɨya pɨhɨkɨ,
matsi heitseriemekɨ yamemɨtekahu yuniukikɨ hipame mepɨwawikweitsitɨa.
7 'Axateyuruwamete mepatixɨrɨwe tawari hatsuaku mepɨka'anuku'uwe,
matsi heitseriemekɨ yamemɨtekahu waniwema 'amepu'uwani yuheyemekɨ.
8 Tewi mɨtimaiwe 'aixɨa pɨtikuxaxatsiwa,
matsi kemɨ'ane 'aixɨa mɨkatiuka'iyari kanixani'eriwani.
9 Matsi 'aixɨa pɨ'ane waɨkawa mɨkarexeiya peru yu'uximayatamete warexeiyatɨ 'amuyeika,
'aixɨa pɨka'ane kename matiwa 'utaitɨ peru yu'ikwai karexeiyatɨ.
10 Tewi heitseriemekɨ yamɨtikamie yapɨtimate yunaime tewaxi wahetsiemieme kememɨte'uka'eniwa,
matsi 'axatiyuruwame nitixaɨtɨ pɨkatinenimaya.
11 Kemɨ'ane yukwietsie mɨti'uximaya mɨkɨ 'anayuhayewame 'ikwai kanexeiyakamɨkɨ,
kemɨ'ane yakɨxeikɨa mɨti'uximaya yakɨxeikɨa pɨtiyuriene.
12 'Axateyuruwamete ke'axamemɨteyuriku wawiniyari pɨhɨkɨ xeikɨa,
matsi heitseriemekɨ yamemɨtekahu wananari 'aixɨa pɨ'itɨarie.
13 Kemɨ'ane mɨti'itawa yuniukikɨ pɨyutahɨani,
matsi heitseriemekɨ yamɨtikamie 'uximatɨarikatsata panukukeka.
14 Xewitɨ 'aixɨa kemɨtikuxatakɨ,
meta yumamakɨ kemɨti'uximayakɨ mɨkɨkɨ pɨtipitɨarieni.
15 'Axamɨtiyuriene yutemawietɨ tsepa kemɨtiyuriene hetsiena mieme 'aixɨa pɨ'ane,
matsi kemɨ'ane mɨtimaiwe memɨtemaiwawe wa'ɨxatsi pɨta kani'enieka.
16 'Axamɨtiyuriene yutemawietɨ yapauka kaniuyeha'arɨweni,
matsi mɨtimaiwe katiniukanewieka kepauka 'axamɨtitahɨawarieni.
17 Kemɨ'ane yurikɨ munierixɨ mɨkɨ heitseriemekɨ katinikuxatani,
matsi kemɨ'ane mɨka'unierixɨ mɨkɨ 'itarikakɨ pɨtikuxata xeikɨa.
18 Kemɨ'ane 'axamɨtiuxaxata mɨkɨ niukieya 'ixipara hepaɨ pɨtiyuxiteke,
matsi mɨtimaiwe niukieya pu'uaye.
19 Kemɨ'ane yurikɨ mɨtikuxata yuheyemekɨ 'apuyeikani,
matsi kemɨ'ane mɨti'itawa yatewimekɨ xeikɨa 'apuyeikani.
20 Kemɨ'ane 'axamemɨteyurie wa'iyaritsie kwamanarika puxuawe,
matsi kemɨ'ane 'aixɨa 'iyari temu'uwanikɨ mɨtikuxata mɨkɨ temawierika pexeiya.
21 Heitseriemekɨ yamɨtikamie 'axamɨti'ane 'atsipɨka'iyurieni,
matsi 'axatiyuruwame 'axamɨti'ane pɨrenukanani.
22 Yawé memɨte'itawa puwaxani'erie,
matsi pɨnaki'a yuri memɨtekuxata wahetsiemieme.
23 Tewi mɨtimaiwe yapɨka'utaine tita mɨrakumate,
matsi memɨkayuwaɨriya teɨteri memuwaparewieni wa'iyari pahiwa tinaime tikuxatanetɨ.
24 Kemɨ'ane waɨkawa mɨti'uximaya mɨkɨ ti'aitame kanayeitɨariemɨkɨ,
matsi muyu'ɨraxie waɨriyarika ti'uximayatame payani.
25 'Uximatɨarikakɨ tewi punutuixie yu'iyaritsie,
peru niuki 'aixɨa manɨyɨne pitemawieritɨa.
26 Heitseriemekɨ yamɨtikamie yuhepaɨ tewi kaniuwitɨximeni 'aixɨa 'anemekɨ,
matsi 'axatiyuruwame xɨka huyeya 'anukuweiya pɨreuyehɨani xeikɨa.
27 Kemɨ'ane mɨyɨ'ɨraxie pɨkayɨwe yu'ikwai mɨtikaxeiya,
matsi kemɨ'ane mɨti'uximaya waɨkawa 'ikwai pɨrexeiya.
28 Heitseriemekɨ yamemɨtekahu wahuye tukari maxuawe peutiyune,
mɨkɨ huyeta mɨɨya pɨkaxuawe.