13
1 Nunutsi mɨtimaiwe yupaapa 'ɨxatsieya kani'enieka,
matsi mɨtiyukatawe'erie kepauka mɨ'ɨxatsitɨarie pɨka'iku'eniwa.
2 Kemɨ'ane 'aixɨa 'anemekɨ mɨtikuxata, mɨkɨ 'aixɨa 'anemekɨ pɨtiyumikwa,
kemɨ'ane 'axamemɨte'u'iyari puwanake hipame memuwananaimanikɨ.
3 Kemɨ'ane mɨyupirenutɨa yutukari kanikweriwayurieka,
matsi kemɨ'ane kwinimieme mɨtiyuxatsikawie yukɨmana puyuka'una.
4 Mɨyɨ'ɨraxie pɨreuyehɨwa, peru nitixaɨtɨ pɨkatiukaxexeiya,
kemɨ'ane mɨti'uximaya naime yu'ikwai pɨrexeiya.
5 Heitseriemekɨ yamɨtikamie 'itarika pɨxani'erie,
'axatiyuruwame tewiyarika pukuwewiene meta 'axamɨramamatiwanikɨ.
6 Heitseriemekɨ yamɨtikamie pɨ'ɨwiyarie,
matsi 'axatiyuruwame 'axamɨti'ane pika'una.
7 Xewitɨ xiku puyuxata, peru tixaɨtɨ karexeiyatɨ,
xewitɨ tixaɨtɨ mɨkarexeiya hepaɨ pɨ'ane, peru naime pɨrexeiya.
8 Xiku yutuminikɨ xeikɨa yutukari putawikweitsitɨwa,
matsi tixaɨtɨ mɨkarexeiya xewitɨ pɨkaheye'unie.
9 Kemɨ'ane heitseriemekɨ yamemɨtekahu wahekɨariya waɨkawa pɨxawatɨ,
matsi 'axateyuruwamete kɨxeme mɨtɨtɨki hepaɨ mepɨ'anene.
10 Teɨteri memɨteyukatawe'erie mekaniyukwitɨweni xeikɨa,
matsi kemɨ'ane 'ɨxatsi memɨ'enie mɨkɨ mekatenimaiwaweni.
11 Tumini mexɨiwa mayu'i'iwa yapaukata kanitixɨrɨweni,
kemɨ'ane tumini meuta'ɨwiyawe, mɨkɨ 'axɨkai xiku kanayeimɨkɨ.
12 Kepemɨtiku'eriwa xɨka yakatiuyunake mɨkɨ 'iyari pɨhiweritɨawe,
kepemɨtiku'eriwa xɨka yatiuyunake mɨkɨ kɨye tukari tiyupitɨwame hepaɨ pɨ'ane.
13 Kemɨ'ane 'ɨxatsi mɨka'anu'enieni pɨkareuyehɨwiyarieni,
kemɨ'ane 'aitsika kemainetsie yamɨtikayani 'aixɨa 'anemekɨ pɨrakapitɨarieni.
14 Memɨtemaiwawe wa'ɨkitɨarika mɨkɨ haa tukari mɨtiyupitɨwa hepaɨ pɨ'ane,
meta winiyari mɨtiyumemiwatsata pɨtiyuwikweitsitɨwame.
15 Kemɨ'ane 'ɨxatsi 'aixɨa 'aneme mukuxata, mɨkɨ 'aixɨa pɨtikuxaxatsiwa,
matsi 'axamɨtiuka'iyari huyeya yuheyemekɨ pɨkayupata.
16 Mɨtimaiwe puyuwaɨriya 'aixɨa mɨtiyurienikɨ yatimaitɨ tita mɨtiheitserie,
matsi mɨkayɨwaɨriya mɨwaparewienikɨ kemɨtiyɨkɨhɨawe xeikɨa pɨtiyuriene.
17 Tupiri 'axamɨtiuka'iyari niuki 'axa'aneneme xeikɨa pɨ'atɨwa,
tupiri 'aixɨa mɨtiuka'iyari 'aixɨa ti'aneneme pɨti'atɨwa.
18 Kemɨ'ane 'ɨkitɨarika mɨka'anu'enieni tixaɨtɨ karexeiyatɨ payani meta tewiyatsitɨarietɨ,
matsi kemɨ'ane manu'ena waɨkawa 'aixɨa pɨrahɨawarɨwani.
19 Kepauka yamɨraye'ani ketemɨteku'eriwa 'ana tepuyutemamawie,
matsi mɨkayuwaɨriya hetsiemieme pukwaniwe 'axamɨti'ane mɨtihayewakɨ.
20 Kemɨ'ane memɨtemaiwawe wahamatɨa 'amuyeika, timaiwetɨ kanayeimɨkɨ wahepaɨ,
kemɨ'ane memɨkayuwaɨriya wahamatɨa 'amuyeika 'axa'anemɨtsie kaniyukakemɨkɨ.
21 'Axatiyuruwame 'axamɨti'ane hetsiena kaniye'axeni,
matsi heitseriemekɨ yamɨtikamie 'aixɨa mɨti'anekɨ 'apɨrapiniyarieni.
22 Tewi 'aixɨa mɨtiuka'iyari yuteukarima piinitɨarika pɨtiwaku'e'eiririwa,
'axatiyuruwame piinitɨarikaya mɨkɨ heitseriemekɨ yamemɨtekahu wahetsiemieme pɨta katinayeimɨkɨ.
23 Teɨteri tixaɨtɨ memɨkateheuxeiya memati'etsatsie waɨkawa 'ikwai kanixuaweni,
matsi naitɨ katineuyewautseni xɨka kemɨtiheitserie mekate'uyurieni.
24 Kemɨ'ane yuniwe mɨkati'ɨkitɨa ka'enayewayatɨ mɨkɨ pɨka'inaki'erie,
matsi xɨka 'ikuwayani ti'ɨkitɨatɨ mɨkɨ yuniwe pɨnaki'erie.
25 Tewi heitseriemekɨ yamɨtikamie pɨtikwa'a kepaukake mɨtahuxani,
matsi 'axatiyuruwame heuhaakamɨtɨ 'apuyeikani.