14
1 'Uka mɨtimaiwe yuniwema 'aixɨa mɨti'anekɨ puwaxewiriya,
matsi 'uka mɨkatimaiwe, yɨkɨmana puwataweiyaxɨani yuniwema.
2 Kemɨ'ane 'aixɨa 'anemekɨ mumie Yawé kanayemakaxeni,
kemɨ'ane Yawé xani'erietɨ mumie mɨkɨ 'axakatiniyurieneni.
3 'Axamɨtiyuriene yutemawietɨ yuta'ɨretɨ xeikɨa katinikuxatani,
matsi mɨtimaiwe kemɨtikuxata puyukweriwayurie.
4 Hakewa tuurutsixi kwietsanamete mememawe mana 'iku payewawaki,
tuurutsixi kwietsanamete watɨrɨkariyakɨ 'itsanari putiwawaɨkare.
5 Kemɨ'ane munierixɨ mɨkɨ yurikɨ pɨtikuxata 'itsɨkame hɨxie yapɨtayɨni,
matsi mɨti'itawa 'itsɨkame hɨxie yuri pɨkatikuxata yakɨ xeikɨa putaineni.
6 Kemɨ'ane mɨtiyukatawe'erie mɨtimaiwenikɨ mɨ'ayumieme pukuwaune matsi pɨka'ikaxexeiya,
matsi kemɨ'ane yamɨtimate tita mɨti'aixɨa hetsiena mieme pɨkakwaniwe mɨtimaiwenikɨ.
7 Mɨkayuwaɨriya hamatɨa pepɨka'uyeikani,
hatsuaku mɨkɨ niukieyatsie tixaɨtɨ pepɨkaretimani.
8 Mɨtimaiwe yapɨtimate kemɨtiyurieni ke'anemekɨ mumieni,
matsi mɨkatimaiwe yukɨmana puyukwamana.
9 'Axamemɨteyurie meyutemamawietɨ kepauka wahetsie mɨrahɨiwa meputinawe meyuku'imawatɨ,
matsi memɨtemaiwawe Kakaɨyari 'aixɨa pɨtiwaxeiya.
10 Ta'iyari yapɨtimate ketemɨte'uka'eniwa
meta xewitɨ pɨkayɨwe xeime temawierikaya mɨhekɨatani.
11 'Axatiyuruwame kiiya kanika'unariemɨkɨ,
matsi heitseriemekɨ yamemɨtekahu wakii 'aixɨa pɨ'itɨarie.
12 Tewi mɨpaɨ pɨtimate kename huye muxuawe naitɨ 'aixɨa 'anene,
matsi mɨkɨ naitɨ huye mɨki teukiyapa kaneukayuyuneni.
13 Xɨka waɨkawa 'utananeni ra'iyaritsie pɨtiyukukuine,
matsi temawierika kepauka meu'atɨyani tsuari xeikɨa payeika.
14 Mɨka'uka'iyari puyutemawie ke'axamɨtiyuriene hepaɨtsita,
tewi 'aixɨa mɨtiuka'iyari puyutemawie 'aixɨa mɨtiyurienekɨ.
15 Tewi 'atsimɨkatimate kemɨreuyewetse naime yuri pɨrayeitɨwa,
matsi mɨtimaiwe kaniyɨ'ɨwiyani kemɨtimie.
16 Mɨtimaiwe Yawé kanayemakaxeni 'ayumieme kaniyɨ'ɨwiyani 'axamɨti'ane hepaɨtsita,
matsi mɨkayuwaɨriya puyuta'ɨre meta puyuwaɨriya mɨpaɨ 'utaitɨ nenekaniyɨweni.
17 Kemɨ'ane mayu'eriya yapauka 'axapɨtiyurieni 'atsikatimaitɨ,
matsi kemɨ'ane mɨtimaiwe mɨkɨ pɨtiukanewie.
18 'Atsimemɨkatemate kemɨreuyewetse yamemɨteyurienikɨ wa'imikieri 'axamɨti'anene pɨrayani,
matsi memɨtemaiwawe mepɨpitɨarie metemaiwawetɨ kemɨreuyewetse memumatsiɨkɨnikɨ.
19 'Axateyuruwamete 'aixɨa memɨte'u'iyari wahɨxie mekanikatunuma'uikuni,
'axamemɨte'u'iyari mekanitihɨxima'uikuni heitseriemekɨ yamemɨtekahu wakitenietsie.
20 Kemɨ'ane tixaɨtɨ mɨkarexeiya hamikumamatɨtɨ mekani'uxiwe'erieka,
matsi mekaniyumɨireni xiku memɨnaki'erie.
21 'Axapɨtiyurieneni xɨka yuhepaɨ tewi 'uxieka,
'aixɨa pɨ'itɨarieka kemɨ'ane tixaɨtɨ memɨkatehexeiya mɨwanenimaya.
22 Kemɨ'ane 'axamemɨteyuriku mepeiyehɨani huye 'aixɨa mɨ'ane,
matsi naki'eriya meta tita yuri mɨraine mepukaxexeiya kemɨ'ane 'aixɨa memɨteyurie.
23 Naime 'uximayatsikatsie 'ikwaxi puxuawe
matsi xɨka yakɨxeikɨa tikuxatani tixaɨtɨ karexeiyatɨ payani.
24 Mɨtimaiwe pumatsiɨkɨ yatimaitɨ tita mɨreuyewetse yamɨtiyurienikɨ,
memɨka'u'iyari mepumatsiɨkɨ kememɨterukutsixikɨ.
25 Kemɨ'ane yurikɨ munierixɨ pɨtikuxata 'itsɨkate wahɨxie hipame wawikweitsitɨatɨ,
matsi kemɨ'ane ka'uniereka yamɨtikuxata 'atsimɨkatiuyuri kanimierinɨamɨkɨ.
26 Kemɨ'ane Yawé mayemakaxe mɨkɨ yuhetsie nunuwame pexeiya
meta tɨɨriyamama mepɨ'ɨwiyarieka.
27 Kemɨ'ane Yawé mayemakaxe mɨkɨ tukari pupitɨarie 'anayuhayewame,
meta mɨki winiyariyaritsie kaniutawikweweni.
28 Ti'aitame teɨteri yuwaɨkawame wahetsie ti'aitatɨ pumariwe,
ti'aitame kawarexeiyatɨ kemɨ'ane mɨtiwaruta'aitɨani pɨtewiyatsitɨarieni.
29 Kemɨ'ane mɨka'ayu'eriya pɨmatsiɨkɨ waɨkawa kemɨtimaiwe,
matsi yapauka mayu'eriya pɨmatsiɨkɨ ke'axamɨtiyurie yutemawietɨ.
30 Xɨka yu'iyaritsie 'aixɨa tiyɨkɨhɨaweni 'aixɨa pɨreu'erieka yuwaiyaritsie,
matsi 'uxiwe'erika naime 'umete pɨtixɨtɨaxime.
31 Kemɨ'ane tixaɨtɨ mɨkarexeiya mɨnanaima mɨkɨ Kakaɨyari pɨnanaima kemɨ'ane mitawewi,
matsi tixaɨtɨ mɨkarexeiya mɨnenimaya mɨkɨ Kakaɨyari hepaɨtsita 'aixɨa pɨtiyukɨhɨawe.
32 'Axatiyuruwame kanekawautseni yukɨmana 'axatiyurienetɨ,
kemɨ'ane heitseriemekɨ yamɨtikamie tsepa mɨmɨxime pɨ'ɨwiyarieka.
33 Memɨtemaiwawe yu'iyaritsie kememɨte'uyemate pɨtihɨpɨne,
matsi memɨkayuwaɨriya 'etsiwatɨma mepɨka'imate.
34 Kepauka teɨteri heitseriemekɨ yamemɨtekahu kiekari mariwetɨ payeika,
matsi kepauka teɨteri 'axamemɨteyurie naime kiekari mepɨtewiyatsitɨa.
35 Kemɨ'ane mɨtimaiwe ti'aitame pɨtemawieritɨa yu'uximayatsikakɨ,
matsi ti'aitame pɨha'a ti'uximayatameya yamɨkatikamiekɨ mitewiyatsitɨakɨ.