15
1 Niuki heitserie 'aixɨa manɨyɨne haxɨa pukuxeriya,
matsi niuki mɨxɨka waɨkawa haxɨa kanayeitɨwani.
2 Memɨtemaiwawe metekuxatakaku hipatɨ waɨkawa mepɨtehetimamateke,
mɨkayuwaɨriya teɨteri muwaparewienikɨ yakɨ xeikɨa katinikuxatani.
3 Yawé naitsarie puyeika tanieretɨ,
waxeiyatɨ 'aixɨa memɨte'u'iyari meta 'axamemɨteyurie.
4 Niuki mɨtiyɨnɨtɨwa mɨkɨ ra'iyaritsie tukari tiyupitɨwame kanihɨkɨtɨni,
matsi niuki 'axamanɨyɨne 'iyari pɨhiweritɨawe.
5 'Axamɨtiyuriene yutemawietɨ panati'ewa paapaya 'i'ɨxatsitɨakaku,
katinimaiweni kemɨ'ane mɨyɨ'ɨxatsitɨarinɨa.
6 Heitseriemekɨ yamɨtikamie kiena 'ikwai panayuhayewa,
matsi 'axamɨtiuka'iyari kie 'uximatɨarika waɨkawa puxuawe.
7 Memɨtemaiwawe metekuxatakaku hipatɨta metemaitɨ mepakɨka,
memɨkayuwaɨriya hipame memuwaparewienikɨ wa'iyari 'etsiwatɨma mɨpaɨ pɨkatiku'eriwa.
8 Yawé 'axateyuruwamete wamawari kani'uxiwe'erieka,
matsi puyutemawie heitseriemekɨ yamemɨtekahu wanenewierikɨ.
9 Yawé 'axateyuruwamete wahuye kani'uxiwe'erieka,
matsi puwanaki'erie kemɨ'ane tita mɨtiheitserie memɨte'uweiya.
10 Kemɨ'ane huye 'aixɨa mɨ'ane muku'eirieni waɨkawa katinita'ɨkitɨariemɨkɨ 'anayeweiwatɨ,
matsi kemɨ'ane mitixani'eri mɨkɨ pumierieni.
11 Yawé naime katinimaika teukiyapa meta meukatewatsie timieme,
matsi tewi kemɨtiyɨkɨhɨawe yu'iyaritsie mɨkɨ pumate.
12 Kemɨ'ane mɨtiyukatawe'erie pɨka'inake mɨta'ɨxatsitɨarienikɨ,
meta pɨka'inake memɨtemaiwawe mɨwanɨka.
13 'Iyari xɨka yutemawieka pɨmatsiɨkɨ tahɨxie paitɨ,
'iyari xɨka tiuka'eniwani yaxeikɨa pɨmatsiɨkɨta.
14 Memɨtemaiwawe mepɨyuwaɨriya matsi waɨkawa memɨte'uyemaikakɨ,
memɨkayuwaɨriya hipame memuwaparewienikɨ 'axaniuki xeikɨa mepukwa'a.
15 Naitɨ tukari 'axapɨ'anene munutuixie hetsiemieme,
matsi muyutemawie hetsiemieme tukarikɨ 'ixɨarari puxuawe.
16 Matsi 'aixɨa pɨ'ane 'etsiwa mɨrexeiyani Yawé 'ayemakatɨ,
matsi 'aixɨa pɨka'ane waɨkawa mɨrexeiyani tiuka'eniwatɨ.
17 'Aixɨa pɨ'ane mɨtitsitsiɨrawi xɨka tetekwaka teyunaki'erietɨ,
'aixɨa pɨka'ane wai xɨka tekwaka teyu'uxiwe'erietɨ.
18 Kemɨ'ane mayu'eriya yapauka payumiewe,
kemɨ'ane mɨka'ayu'eriya kayuwatɨ puwapitɨa hipame.
19 Mɨyɨ'ɨraxie huyetana waɨkawa xuya kanixuaweni,
matsi heitseriemekɨ yamemɨtekahu wahuye 'apatayewa.
20 Temaikɨ mɨtimaiwe yupaapa pɨtemawieritɨa,
matsi temaikɨ mɨka'uka'iyari yumaama pɨtewiyatsitɨa xeikɨa.
21 Mɨkatimaiwe puyutemawie yakɨ xeikɨa tiyurienetɨ,
matsi mɨtimaiwe yuhuye yɨkɨmana pɨheitseritɨa.
22 Kepauka 'ɨxatsi meuyewetse ketemɨteku'eriwa yapɨkatikɨyɨne,
kepauka tanaitɨ temuyu'enie teyu'ɨxatsitɨatɨ 'aixɨa pɨtikɨyɨne.
23 Witsipɨ'ane xɨka 'aixɨa 'anemekɨ waku'eiyani,
meta waɨkawa witsipɨ'ane xɨka 'uta'eiyarieni kepauka meuyewetse.
24 Mɨtimaiwe tukari huyeyari taheima meutiyune 'utɨa pumie,
mɨki teukiyapa meukahɨiyanikɨ puyutawikweitsitɨwa.
25 Yawé memɨyuti'ɨre wakii kaniti'unani,
matsi wiuraxi wakwie pɨ'ɨwiya kapa me'unawaiyarienikɨ.
26 Yawé kaniwa'uxieka 'axateyuruwamete yakɨ xeikɨa kememɨteku'eriwa,
matsi pinake niuki mɨheitserie.
27 Kemɨ'ane waɨkawa mɨrexeiyanikɨ mɨtihiwe'erie 'aixɨa pɨka'ane tɨɨriyamama wahetsiemieme,
matsi tumini mɨka'anu'ɨwe hetsiena mɨraka memɨteheuyehɨwirienikɨ mɨkɨ yuheyemekɨ tukari hexeiyatɨ payani.
28 Heitseriemekɨ yamɨtikamie yapɨtimate yu'iyaritsie kemɨtayɨni,
matsi 'axamemɨteyurie 'axati'aneme xeikɨa mepɨtekuxata.
29 Yawé 'axateyuruwamete kawa'enietɨ 'ateewa puyeika,
matsi heitseriemekɨ yamemɨtekahu wanenewieri kani'enieka.
30 Kepauka xewitɨ 'aixɨa 'iyari mɨratahɨawe 'ana 'iyari puyutemawieka,
meta niuki 'aixɨa manɨyɨne tɨrɨkariya pɨtiyupitɨwa.
31 Matsi kemɨ'ane 'ɨxatsi mɨ'enie yapɨretimaixime yutukari hetsiemieme,
'ayumieme memɨtemaiwawe watsata puyeikani.
32 Kemɨ'ane 'ɨxatsi mɨkanaki'erie yɨkɨmana puyunanaimani,
matsi kemɨ'ane 'ɨxatsi manu'enieni timaiwetɨ payani.
33 Kemɨ'ane Yawé mayemakaxe heitseriemekɨ yapɨtikamie meta pɨtimaiweni,
kemɨ'ane tixaɨtɨ mɨkarayuyeitɨa 'aixɨa pɨrahɨawarɨwa 'aixɨa mɨtiyurienekɨ.