16
1 Tewi yaputaine kemɨtiyurimɨkɨ,
matsi Yawé pɨta yapɨtipitɨani kemɨtiyurieni.
2 Tewi yapɨtiku'eriwa yuhetsiemieme kemɨtiyurieni kename 'aixɨa ti'ane naitɨ,
matsi Yawé pimate kehepaɨtɨtɨ mɨtiyuriene.
3 Naime kepemɨtiyurienekɨ Yawé ketineuhɨritɨa,
kepemɨtiku'eriwa 'ana yapɨtiyɨni.
4 Yawé naime kemɨtiyuriene yatimaitɨ pɨtiyuriene,
meta 'axatiyuruwame putawewi 'imatɨrieka tukaritsie mutika'eniexɨanikɨ.
5 Yawé memuyuti'ɨre kaniwa'uxiwe'erieka,
matsi kaniyuritɨni katinika'eniexɨamɨkɨ.
6 Xeyunaki'erietɨ meta yuri xehaitɨkaitɨ xekateneuyuyehɨwiriekakuni,
Yawé 'ayemakatɨ xeikɨa pɨyɨwe 'axamɨti'ane mɨnewienikɨ.
7 Yawé kepauka tewi 'aixɨa mɨtixeiya hetsienamieme kaniyutemawieka,
metatsiere memeye'unie 'aixɨa mete'ixeiyakame kaniwarayeitɨaka.
8 Matsi 'aixɨa pɨ'ane 'etsiwa mɨrexeiyani heitseriemekɨ yatikamietɨ,
matsi 'aixɨa pɨka'ane waɨkawa mɨrexeiyani heitseriemekɨ yakatikamietɨ.
9 Tewi yapɨtiku'eriwa kemɨtiyurienikɨ yuhetsiemieme,
matsi Yawé pɨta heitserie pexeiya mɨpaɨ mɨtiyurienikɨ.
10 Ti'aitame Kakaɨyaritsie timieme pɨtikuxata,
mɨkɨ 'itarikakɨ manutahɨiyanikɨ yapɨkatayɨni.
11 Ti'inɨnɨatamete 'aixɨa mɨ'anene Yawé hetsɨa pumieme,
naime ti'inɨnɨatamete Kakaɨyari kaninetɨani.
12 Ti'aitame 'axamemɨteyurie kaniwa'uxiwe'erieka,
karikɨ 'uweni 'aixɨa 'anemekɨ katini'aitametɨni.
13 Ti'aitame kaniyutemawieka mɨkɨ yamemɨtekahu wa'enietɨ,
kemɨ'ane yurikɨ mɨtikuxata pɨnaki'erie.
14 Ti'aitame haxɨaya katiniyumemiwani,
matsi kemɨ'ane mɨtimaiwe kaniyɨweni minɨtɨanikɨ.
15 Ti'aitame xɨka 'aixɨa 'anemekɨ ratahɨawe putukari,
parewiyaya 'imikieri mɨraye'axe hepaɨ kani'aneni.
16 Matsi mɨtimaiwenikɨ mɨ'ayumieme katinaye'aka keyuri huru,
meta katinaye'aka mɨtiuyemaikakɨ keyuri pɨrata.
17 Kemɨ'ane heitseriemekɨ yamɨtikamie huyetana 'axamɨti'ane pɨtiumawe,
kemɨ'ane yutukari mɨwikweitsitɨamɨkɨ, kaniyɨ'ɨwiyani kemɨtimie.
18 Kemɨ'ane mɨtiyukatawe'erie tiyu'uname hetsiena pɨye'ani,
kemɨ'ane muyuta'ɨre pekaweni.
19 'Aixɨa pɨ'ane xɨka haweri memɨ'anene wahamatɨa tixaɨtɨ katihɨkɨtɨni,
keyuri memuyuti'ɨre wahamatɨa pemɨxikutɨnikɨ.
20 Kemɨ'ane niuki meti'enietɨyeika, 'aixɨa ti'aneme pɨtiukaxexeiya,
meta 'aixɨa pɨ'itɨarie kemɨ'ane Yawé hetsie mɨtiwiya.
21 Kemɨ'ane mɨtimaiwe mɨtiuyemate katinitewaka,
kemɨ'ane witsi'anemekɨ mɨtikuxata 'aixɨa pɨti'enierie.
22 Haa muhane hepaɨ mekani'aneneni kemɨ'ane kememɨteyuriekɨ 'aixɨa memɨtehakumate,
'axamemɨteyurie meyutemamawietɨ pɨkayɨwe mɨtiwaruti'ɨkitɨani.
23 Kemɨ'ane 'aixɨa mɨtiyukɨhɨawe kaniyɨweni yuneni mupirenutɨani,
yunenikɨ kemɨtiyuriene naime katinimaika.
24 Mutiyukanaki'erie niukieya xiete hepaɨ kana'aneni,
'atukari 'aixɨa kaniyurieka meta 'awaiyaritsie 'aixɨa pekatineu'erieka.
25 Teɨteri kememɨteyurie 'aixɨa ti'aneme mepɨte'erie,
matsi mɨkɨ huye mɨki teukiyapa kaneukayuneni.
26 Kemɨ'ane yehaakamɨnetɨ 'amuyeika haaka waɨriyarika pipitɨa mɨti'uximayakakɨ,
kemɨtiyehaakamɨnekɨ waɨriyarika pɨti'uximaya mɨtikwanikɨ.
27 Mɨka'uka'iyari pɨhɨne 'axamɨti'anekɨ huxunu hepaɨ,
meta 'axamɨraniuwe tai hepaɨ katiniyutaiyani.
28 Kemɨ'ane 'axamɨtiuka'iyari 'imieri pawiwiwe,
niukiperai kaniwataxɨrɨwani 'aixɨa memɨteyuku'eriya.
29 Mayu'eriya yuhepaɨ tewi kanikwamanani,
kani'inieka xeikɨa yuhuyeta 'axakemɨtiyurienetsie.
30 Kemɨ'ane yuhɨxikɨ 'inɨari metsiwewirie mɨkɨ 'axametsiyurimɨtɨ pɨyɨane,
kemɨ'ane mita'atse 'ariri mɨkɨ 'axakatiniuyurieni.
31 Mutuxaiya kuruna kanihɨkɨtɨni 'aixɨa kemɨtixeiyariekakɨ,
'aixɨa 'anemekɨ 'uyeikatɨ kane'iwamɨkɨ.
32 Matsi 'aixɨa pɨ'ane petiukanewietɨ keyuri pera'a'iwamɨtɨ,
matsi 'ekɨ 'a'iyari kenenɨtɨaweni keyuri kiekarite peka'a'iwake.
33 Teɨteri kememɨteyurienikɨ yamepɨtekuwaɨtɨwe,
matsi Yawé pɨta yapɨtikuyuruwa.