17
1 'Aixɨa pɨ'ane matsi kayuwatɨ temu'uwanikɨ tsepa paa tsetse'ime temukwa'a,
keyuri temuyukwitɨweni 'ixɨarari tewewietɨwetɨ.
2 Ti'uximayatame mɨtimaiwe yukutsiyari nu'aya mɨkayukatewiya pɨtita'aitɨani,
hikɨ mɨkɨta pɨtiyetuiriyarieni tita mɨtipiinieyatɨkai yukutsiyari niwemama wahamatɨa.
3 Tai kwinimieme mɨtixɨkakɨ huru meta pɨrata kanikwaxiyarieka huxunuta,
matsi ta'iyari Yawé pɨta kani'inɨatani.
4 'Axatiyuruwame yuhepaɨ 'axatiyuruwame kani'enieka,
mɨti'itawa yuhepaɨ mɨti'itawa kani'enieka.
5 Kemɨ'ane tixaɨtɨ mɨkarexeiya muyuriya mɨkɨ Kakaɨyari mitawewi kani'uxiwe'erieka,
kemɨ'ane muyutemawie 'ixeiyatɨ tiuka'eniwame mɨkɨ pɨkareuyehɨwiyarieni pu'uximatɨarieni.
6 'Ukiratsi teukarimama kurunaya mekanihɨkɨtɨni,
tɨɨri yupaapama wahekɨ mepuyuti'ɨre.
7 'Aixɨa pɨka'ane mɨka'uka'iyari 'aixɨa mɨtikuxatani,
yaxeikɨa 'aixɨa pɨka'ane ti'aitame mɨtiku'itawanikɨ.
8 Kemɨ'ane tumini mɨwata'ɨitɨwa 'awie yamemɨteyurienikɨ hipatɨ kemɨtinake,
mɨkɨ 'itsɨ mariweme makwe'e puyu'erie,
matsi mɨkɨ kemɨtiyuriene naitɨ yapɨtikɨyɨne.
9 Kemɨ'ane mɨreiyehɨwirie 'axamutayɨ mɨkɨ naki'eriya pukaxexeiya,
kemɨ'ane 'axamɨraniuwe kareiyehɨwirietɨ hamiku pɨkahexeiya.
10 Kemɨ'ane mɨtimaiwe xeiniukiyarikɨ peu'ena,
mɨka'uka'iyarita tsepa xeitsienituyarimexɨa muweiya mɨkɨ pɨka'anu'ena.
11 Kemɨ'ane mayu'eriya kemɨ'ane mɨtamieni kanikuwauneni,
peru xeime panɨnɨ'aiyarieni matsi waɨkawa mɨtɨrɨkaɨye.
12 'Aixɨa pɨ'ane hutse xɨka 'anukunake mayu'eriya yuniwema munawaiyarie,
keyuri 'atsimɨkatimate xɨka ranukunake.
13 Kemɨ'ane 'aixɨa tixeiyarietɨ 'axamɨti'anekɨ mɨtiwarakapitɨwa,
yuheyemekɨ tɨɨriyamama 'axamepɨ'itɨarieka.
14 Xɨka 'imieri 'utsutɨani haa manutanama manuta'una hepaɨ pɨtikɨyɨne,
matsi 'aixɨa pɨ'ane mɨtihayewani 'axatiyurienetɨ.
15 Yawé 'ikɨ hutame pu'uxiwe'erie:
hetsiena mɨrahɨiwa xɨka 'uxɨnarieni 'aixɨa pɨka'ane
hetsiena mɨkarahɨiwa pɨta xɨka 'anutahɨiyani.
16 Mɨka'uka'iyari xɨka 'atsikatimaika tsepa tumini mexeiya,
pɨkayɨweni mɨtimaiwenikɨ mɨ'ayumieme mɨnanenikɨ.
17 Hamiku yuheyemekɨ pɨtiuyukanaki'erie,
kepauka 'uximatɨarika mexeiyanitsie yu'iwa hepaɨ pɨtimaika.
18 Tewi mɨkatimaiwe yapɨtayɨni xeime hetsiemieme mɨrayukatuanikɨ,
mɨkɨ xeime hetsiemieme rapitɨ payeika.
19 Kemɨ'ane minake 'axamɨtiyurienenikɨ mɨkɨ kaninakeni muyutamienikɨ,
kemɨ'ane kwinimieme mɨraniuwe tenieya manutatsanarienikɨ kanikuwaneni.
20 Kemɨ'ane mɨtiyukwamana hatsuaku 'aixɨa 'itɨarietɨ pɨka'ayani,
kemɨ'ane mɨti'itawa tsiepɨre hetsiena katinahɨiwani.
21 Kemɨ'ane temaikɨ katiyu'aitɨarinɨakame mexeiya mɨkɨ pɨrahiweritɨaka,
xɨka mɨpaɨ 'anekame hexeiyani temawierika pɨka'ukaxeiya.
22 Waɨkawa yu'iyaritsie xɨka yutemawieka 'uaye hepaɨ kani'aneni,
kepauka pemɨkayutemawieka 'awaiyaritsieta pepuwerani.
23 'Axateyuruwamete tumini memɨnaki'erie tixaɨtɨkɨ 'awie yameteyurienike,
'itsɨkate niuki tutunime xeikɨa mekani'enieka tumini memanɨ'ɨwekɨ.
24 Kemɨ'ane mɨtimaiwenikɨ mɨ'ayumieme mexeiya waɨkawa kaninaki'erieka,
mɨkayuwaɨriya hipame muwaparewienikɨ 'atsipɨkatimate ketita mɨreuyehɨwa.
25 Temaikɨ mɨka'uka'iyari yupaapa xeikɨa pɨhaxɨatɨwame,
yaxeikɨata yumaama kani'uximatɨaka.
26 'Aixɨa mɨtiuka'iyari xɨka 'anutahɨani 'aixɨa pɨka'ane,
yaxeikɨata 'aixɨa pɨka'ane 'aixɨa mɨtiuka'iyari xɨka 'ukuwaxɨani heitseriekamekɨ 'amuyeikakɨ.
27 Kemɨ'ane mɨtimaiwe 'etsiwa xeikɨa pɨtikuxata,
kemɨ'ane mɨtiuyemate mɨkɨ yapauka yuhetsie pɨkatikupitɨwa.
28 Matsi 'axamɨtiyuriene yutemawietɨ timaiwetɨ payani xɨka kayuwatɨ tiuyerɨni,
xɨka tiuhayewa yutetakɨ matsi timatetɨ pɨ'eriwani tsepa 'atsimɨkatimate.