27
1 Pepɨka'uyuta'ɨreni 'uxa'a kepemɨtiyurieni hetsiemieme,
'atsipemɨkatimatekɨ 'uxa'a kemɨtiyɨni.
2 'Ekɨ 'akɨmana 'ahetsiemieme 'aixɨa pepɨkahaineni,
hipatɨ pɨta 'aixɨa mekehaitɨkani 'ahepaɨtsita.
3 Tete pahete, xiekari pahete,
matsi waɨkawa pahete kepauka tewi mɨha'a yutemawietɨ 'axamɨtiyuriene.
4 Haxɨa 'axapɨtiyuruwame meta pɨtiyu'uname,
yaxeikɨata 'uxiwe'erika xewitɨ pɨka'inewie.
5 'Aixɨa pɨ'ane xɨka hekɨa heitserie 'utatierieni,
'aixɨa pɨka'ane mɨnaki'eriwani 'awiexeikɨa.
6 Waɨkawa matsi pepinaki'erieka 'ahamiku kepauka mumatikwinitɨa,
keyuri mɨmatsi'aye'unie kepauka mɨmatsi'itseni.
7 Kemɨ'ane mɨkaheuhaakamɨkɨ, xiete kanixani'erieka,
matsi kemɨ'ane meuhaakamɨkɨ, tsepa mɨratsiwi katinakakani hetsienamieme.
8 Wiki yu'itɨa kemɨtiuku'e'eiriwa tsepa hakewa,
yaxeikɨata tewi mɨpaɨ 'ateewa katineyeikani yutɨɨriyama waku'eirieme.
9 Mixaxi meta witsimɨtiu'ɨatɨka 'iyari kanitemawieritɨwametɨni,
'ekɨta witsikepemɨtiwaxeiya 'iwatamete mɨkɨta waɨkawa pewaparewiekaku mekaniyuwaɨriyani.
10 Pepɨka'iku'e'eiriwani 'ahamiku meta 'apaapa hamikuya.
Xɨka pe'a'uximatɨaka 'a'iwa hetsɨa pepɨkaheumieni.
'A'iwa pɨkayɨwe 'ateewa kiekame matsi'uparewieni, 'akie 'ahurawa muka pɨta pɨyɨwe.
11 Temaikɨ, nematsinaki'erie xɨka petimaiwetɨ 'ape'uyeikani ne'iyari kaniyutemawieka,
'ana nekaniyɨwemɨkɨ nemɨwata'eiyakɨ kemɨ'ane memɨnetsi'uxiwe'erie.
12 Kemɨ'ane mɨtimaiwe 'axamɨti'ane katinixeiyani mɨkɨ 'ateewa kaniuyeyeikani,
mɨkatimaiwe matsi mana kaniuyeyeikani 'ayumieme pɨtiuka'eniwa.
13 Kemɨ'ane yamɨtayɨni ka'imateme hetsiemieme kename rayukatuani yukemari paitɨ kaneuyehɨamɨkɨ,
kemɨ'ane muyuyetuani 'uka xeime 'ɨyaya hetsiemieme yupiini tinaime mɨrexeiya katininawaiyariemɨkɨ.
14 Matsi xɨka pe'itawaɨritɨani 'ahamiku karima pe'utahiwatɨ ximeri paitɨ,
mɨpaɨ pumatitahɨawe: «Ketitayari heu'erietɨ penetiutahiwi».
15 Haa mɨkatsuke katihayewatɨ kepauka muwiyenitsie,
mɨpaɨ kani'aneni 'uka muyumieriwie.
16 Kemɨ'ane 'uka mɨyamɨ'ane mɨkemakaxɨani, 'eka mɨkemakata pɨyɨweni,
meta pɨyɨwe hatseiti yumamatsie mukwewienikɨ.
17 Tepɨa hepaɨna tepɨakɨ xɨka 'atamɨani kanetaxikaunariyamɨkɨ,
meta tewi yuhepaɨ teɨteri wahamatɨa katinetimamateni.
18 Kemɨ'ane piní 'iteɨriyari mɨ'ɨwiya mɨkɨ takariyari kanikakwaimɨkɨ,
kemɨ'ane 'aixɨa mɨti'uximaya yukutsiyari hetsɨa, matsi 'aixɨa katinixeiyariekamɨkɨ.
19 Hatsie kemɨtihekɨa kepemɨraka'erie 'ahɨxie,
meta tewi yu'iyaritsie mɨpaɨ katinimatsiɨkɨni.
20 Teukiya, mɨɨya meta tita teɨteri memɨtehiwe'erie metexeiyatɨ,
hatsuaku wa'iyaritsie pɨkareuyeyeika.
21 Taipa pɨrata kani'inɨatsieka,
huru huxunuta kani'inɨatsieka,
tewi kani'inɨatsiekata kepauka hipatɨ 'aixɨa memaitɨka hepaɨtsitana.
22 'Axamɨtiyuriene yutemawietɨ tsepa meuyetɨxiwa heiwa meta hutarieka,
tsepa pemitɨxɨni matatsie 'ikú hepaɨ,
hawaikɨ pɨkanawaiyarieni kemɨtiyuriene.
23 Keneu'a'ɨwiya pemɨretimanikɨ kemeteheu'erie 'atewama,
'amuxatsima waɨkawa keniwa'ɨwiyani,
24 kepemɨrexeiya waɨkawa mɨkɨ pɨkatiteriwe,
meta tumini tsepa pemexeiya tixaɨtɨ pɨkatihɨkɨ.
25 Kepauka mɨraka'etsitɨretsie 'ɨxa makuwatsienitsie meta matiyɨraxɨanitsie,
meta hɨritsie paitɨ tupiriyate mukuxeɨriyanitsie,
26 muxatsi 'akemari mepɨmatsiyetuirieni,
kapuratsixita peminanenikɨ hɨritsie 'amakuyewa,
27 mana pekaneixeiyakamɨkɨ kapuratsixi waretsiyari 'anayuhayewame,
kɨmana xemɨteyumikwanikɨ yunaitɨ 'atɨɨriyama,
meta yaxeikɨa yunaitɨ mete'uximayatsiriwamete.