28
1 'Axatiyuruwame kaniuyu'unarɨmeni tsepa xewitɨ mɨka'iweiya,
matsi heitseriemekɨ yamɨtikamie kayuwatɨ 'apuyeika maye hepaɨ.
2 Kiekaritsie xɨka 'axatiyɨaneni,
'itsɨkate mepɨyutimɨmɨire,
kepauka kuwexinaruri mɨtiuyemate,
kayuwatɨ putamarike.
3 Kuwexinaruri tixaɨtɨ memɨkatehexeiya muwananaima,
mɨkɨ wiyeri mɨtɨrɨkaɨye 'ekamatɨ waxa kemɨreuyehɨpa hepaɨ kani'aneni.
4 Kemɨ'ane 'inɨari niukiyari memuku'eiri 'aixɨa meputiyuaneni 'axateyuruwamete wahepaɨtsita,
matsi kemɨ'ane memi'enie mekaniwa'uxiwe'erieka.
5 'Axateyuruwamete tita mɨtiheitserie mepɨkahetimaitɨkɨka,
matsi kemɨ'ane Yawé memukuwautɨwe mɨkɨ naime mekatenimaika yamemɨtekahukɨ.
6 'Aixɨa kani'aneni tixaɨtɨ mɨkarexeiya heitseriemekɨ 'amuyeika,
matsi 'aixɨa pɨka'ane kepauka xiku 'axa'anemekɨ muyeika.
7 Temaikɨ meti'enatɨyeika yakatinikamieni 'inɨari niukiyaritsie,
matsi kemɨ'ane waɨkawa memɨtekwa'a wahetsie mɨtiwiya mɨkɨ yupaapa kanitewiyatsitɨaka.
8 Kemɨ'ane kwinimieme rana'iwamɨtɨ tumini muwaniɨtɨa,
matsi kemɨ'ane muwanenimaya memɨkatehexeiya hetsie pɨta pɨtinakeni.
9 Kemɨ'ane 'inɨari niukiyaritsie yamɨkatikamie,
Kakaɨyari mɨkɨ nenewierieya kani'uxiwe'erieka.
10 Kemɨ'ane heitseriemekɨ yamemɨtekahu xaɨtsie muwareukuyunitɨani,
mɨkɨta yukɨmana yuwiniyaritsie kaniyuhɨamɨkɨ,
matsi heitseriemekɨ yamemɨtekahu yu'iwarika 'amepɨtehapiniyarieni 'aixɨa mɨti'ane.
11 Xiku timaiweme kaniyu'erieka,
matsi tewi tixaɨtɨ mɨkarexeiya rakumaitɨ yakatineitimamateni mɨkɨ kemɨtiyuriene.
12 Kepauka heitseriemekɨ yamemɨtekahu memɨtehayu'iwa kanimariweni wa'ixɨarari meta watemawierika,
matsi kepauka yamemɨkatekahu memɨtehayu'iwa yunaitɨ teɨteri mekaniyuti'awiwietani.
13 Kemɨ'ane 'axamɨti'ane mɨti'awieta hatsuaku 'aixɨa pukatiyeyani,
matsi kemɨ'ane muyutahekɨata 'axamɨti'ane mɨtiku'eirieni mɨkɨ katineuyehɨwiyariemɨkɨ.
14 'Aixɨa kani'itɨarieka kemɨ'ane Yawé yuheyemekɨ mayemakaxe,
matsi kemɨ'ane yu'iyari mɨtse'iriya 'axa'anekɨa kaniyuhayewamɨkɨ.
15 Maye mahiwa meta hutse meuhakamɨkɨ hepaɨ,
kuwexinaruri 'axamɨtiuka'iyari kani'aneni tixaɨtɨ memɨkateheuxeiya muwananaima.
16 Kuwexinaruri 'atsimɨkaretimaitɨyeika katininawayani teɨteri wakwamanatɨ,
matsi kemɨ'ane mɨpaɨ mɨkatiyuriene mɨkɨ mɨixa tukari 'apuyeikani.
17 Kemɨ'ane tiyumieme mukuweiyariene,
kaniyuku'unanemɨkɨ kepaukake mumierieni,
xewitɨ tɨma pɨka'iparewieni.
18 Kemɨ'ane 'aixɨa mɨtixeiyarie heitseriemekɨ yamɨtikamie mɨkɨ kaniyutawikweitsitɨamɨkɨ,
matsi kemɨ'ane 'axatiyurienetɨ 'amuyeika putsuta kaneukawemɨkɨ.
19 Kemɨ'ane yukwietsie mɨtikumaɨwa waɨkawa 'ikwai katinexeiyakamɨkɨ,
matsi kemɨ'ane muyukuwie tixaɨtɨ karexeiyatɨ kanayeimɨkɨ.
20 Tewi heitseriemekɨ yamɨtikamie mɨkɨ waɨkawa 'aixɨa kani'itɨarieka,
kemɨ'aneta mɨyumexɨitɨa xiku mayanikɨ tikwinitɨarietɨ pɨkahayewarieni.
21 'Aixɨa pɨka'ane hipame xeikɨa teɨteri muwaparewieka hipame yɨkɨ tiwaxeiyatɨ,
hipatɨ 'axamekateniyurieka paa 'etsipemekɨtɨtɨ.
22 Kemɨ'ane mɨtiukakwerie xiku mayanikɨ puyumexɨitɨa,
'atsikatimaitɨ kepauka tixaɨtɨ karexeiyatɨ mayanikɨ.
23 'Imatɨrieka matsi hatsua 'aixɨa pɨtitahɨawarieni,
kemɨ'ane mɨtiyutaheitseritɨani keyuri witsimutaine wakwamanatɨ xeikɨa.
24 Kemɨ'ane yupaapa meta yumaama mɨtinawatsiriwa,
katihayewatɨ kename 'axakatiyuriene,
mɨkɨ teɨteri 'axamemɨteyurie kaniwahamikutɨni.
25 Kemɨ'ane tumini mɨnaki'erie xeikɨa mɨkɨ waɨkawa kaniyumienemɨkɨ,
matsi Yawé hetsie kemɨ'ane yuri mɨti'erie 'aixɨa kani'itɨariekamɨkɨ.
26 Xɨka tewi yuhetsiemieme yuri tiyu'eririeka mɨkɨ pɨkayuwaɨriya muwaparewienikɨ hipame,
matsi kemɨ'ane timaiwetɨ yamɨtiyurieni kaniyutawikweitsitɨamɨkɨ.
27 Kemɨ'ane tixaɨtɨ mɨkarexeiya mɨparewie mɨkɨ tixaɨtɨ reuyehɨatɨ pɨkahayani,
kemɨ'ane miti'uxiwe'erieni parewiya kemɨreuyehɨwa, mɨkɨ 'axakani'itɨariekamɨkɨ.
28 Kepauka yamemɨkatekahu memɨte'ayu'iwa, teɨteri mekaniyuti'awiwietani,
kepaukata memukumaweriyarieni, 'aixɨa memɨteyurie 'aixɨa mekani'itɨariekuni.