'Akuhuxi niukieya kemɨtimaiwekai
30
1 'Akuhuxi niukieya kemɨtimaiwekai Kakehe nu'aya Matsaha kiekame. Tixaxatame niukieya. 'Ikɨ tewi mɨpaɨ kaniutayɨni:
«Neuxei Kakaɨyari 'aku ne nepu'uxe,
Kakaɨyari 'aku ne nepu'uxe meta nepɨwerani.
2 »Ne tewi kwinimieme 'atsinemɨkatimate nepɨhɨkɨ,
'etsiwa tɨma ne nepɨkatiuyemate tewi kemɨtimaiwe.
3 Nemɨtimaiwenikɨ 'akuxi ne nepɨkatanaki'eriwe,
meta Kakaɨyari mɨpatsie nepɨkamate.
4 »¿Muyuawitsie kemɨ'ane panutitɨari
meta kemɨ'ane mana pakane?
¿Kemɨ'ane 'eka puwiyawe yumamakɨ,
yatɨni kemɨ'ane haramara pakawimawe?
¿Kemɨ'ane kwie manuye'atɨkanitsie pu'inɨataxɨ?
¿Kemɨ'ane yapɨtimate kepemɨtitewa yatɨni 'aniwe kemɨtitewa?
5 »Kakaɨyari niukieya naitɨ taikɨ puti'inɨatsie,
Kakaɨyari kaniwaparewieka kemɨ'ane hetsɨana memɨtewautɨwe 'aixɨa memɨ'itɨariekakɨ.
6 Niukieya pepɨka'anutiyayatsani,
kapa metsi'utatienikɨ
meta peti'itawame matsiɨkɨme 'ahetsie rayeitɨanikɨ.
7 »Tihutame xeikɨa Yawé nepɨmatiwawirie,
mexixi nekamɨwe yakenetineupitɨa.
8 Keneneparewieka nemɨkati'itawanikɨ,
tixaɨtɨ nekarexeiyame pepɨkanetsihayeitɨwani meta xiku nemɨka'ayanikɨ,
matsi pɨta paa xeitukariyaritsie mieme keneneyetuiriwani.
9 Waɨkawa xɨka nerexeiyani nepɨmatsihatɨmaiyawe,
mɨpaɨ ne'utaitɨ: “¿Yawé kemɨ'ane pɨhɨkɨ?”
Meta xɨka 'etsiwa xeikɨa nerexeiyanike tinawayame nepayeiwe,
'ekɨ nekakaɨyari 'axapemɨtitahɨawarienikɨ xeikɨa.
10 »Ti'uximayatame 'axapepɨkatikɨhɨaweni kutsiyarieya hɨxie,
nɨka 'axape'itɨarietɨ pemayanikɨ mɨkɨ yametiutahɨawe meta yapetiuka'eniexɨani.
11 »Hipatɨ mekanixuaweni yupaapama 'axametewakumamatetɨ,
meta yumaamama 'aixɨa mekatewarahɨawetɨ.
12 Hipatɨ mekanixuaweni me'itiyakame meyuxatatɨ,
matsi 'akuxi mepɨkayu'itiewawe kememɨkate'itiyakɨ.
13 Hipatɨta mekanixuaweni waɨkawa meyɨwaweme meyu'erietɨ,
mɨkɨ yunaitɨ mekaniwaxeiyani mewa'uxietɨ.
14 Hipatɨ tamé 'ixiparayari mekanexeiyani
meta natsɨkwai nawaxayari,
kwiepa memuwatikwanikɨ tixaɨtɨ memɨkatehexeiya,
meta teɨteri memɨteheuyehɨwa 'ena kwiepa memu'uwa.
15 »Xuriya 'itseweme yuhutame yuniwema kaniwarexeiyani,
mɨpaɨ mekaniutiyuaneni: “Kena, kena”.
»Haikatɨ kanixuaweni 'inɨari hatsuaku memɨkahuxaiwawe,
nauriekata mieme hatsuaku mɨpaɨ pɨka'utaine: “Nepɨwaɨripie”:
16 Teukiyapa, meta 'uka mɨkaniwewe,
meta kwie hakɨ mɨka'utahɨpɨrike,
meta tai hatsuaku mɨkakutɨtɨtse.
17 »Kemɨ'ane yupaapa mɨka'enie,
meta yumaama mɨkaheu'enie,
kwatsari mana mayeweritsie memu'uwa hɨxiteya meke'utikwani,
meta maraikatsixi 'ayeniereme waiyarieya meke'utakwani.
18 »Haikatɨ kanixuaweni 'inɨari mɨnetsihɨxiyatsitɨa,
matsi naurieka mieme nepɨka'uyɨwekaxɨa nemeitimanikɨ:
19 kwixɨ huyerieya kemɨtikuwiene muyuawitsie,
kuu huyerieya tetetsie kemɨtikuyeika,
kanuwa 'amɨpa huyerieya haramaratsie mɨyeyeika,
meta 'uki 'uka 'iyarieya kemɨra'i'iwa.
20 »Mapaɨ katiniyurieka 'uka muwikie memɨkakɨnamama memikumaɨwa:
tiutikwa'atɨ wayetereuxinatɨ,
mɨpaɨ kaniutaineni: “Hawaikɨ matsi 'axanepɨkatiyuriwe”.
21 »Mɨkɨ haikatɨ 'inɨari kwie kaniwatayuitɨwani,
naurieka miemeta yaxeikɨa pɨtiyuriene:
22 Waɨriyarika ti'uximayatame ti'aitatɨ mayanikɨ kanaye'aweni,
tewi 'atsimɨkatimate 'ikwaiya mɨranayuhayewa.
23 'Uka mɨxani'eriwakai kepauka mɨtiwikieni,
meta 'uka waɨriyarika ti'uximayatame ti'aitatɨ mayanikɨ yukutsiyari kiita.
24 »Yunaukatɨ kwiepa 'etsimetepepetɨ mekatenixuaweni,
matsi waɨkawa metemaiwawetɨ keyuri temaiwawemete:
25 tsarɨxi mekatɨrɨkawitɨtɨ,
yu'ikwaite taxata timieme mekateniuti'utani,
26 haitsɨrixita, yeutari 'etsimepepetɨ,
mɨkɨ yuterɨ mekanexeiyani 'aitsie paitɨ,
27 'utsikarita tiyu'aitɨwame memɨkahexeiya,
matsi yaxeikɨata mɨkɨ mekateniukɨkani kuyaxi wahepaɨ,
28 'atakwaixita, mekaniyuwiyanɨaka yumamakɨ,
matsi mɨkɨta paratsiyuta paitɨ mekaneutahakeni.
29 »Yuhaikatɨta mekanixuaweni 'aixɨa mete'ɨkɨkatɨ,
matsi naurieka mieme wahepaɨ 'aixɨa pɨtiuyeika:
30 maye, 'ɨrawetsixi watsata mɨtɨrɨkaɨye,
tixaɨtɨ timakatɨ mɨka'ukununuwa,
31 wakanata 'uki yu'anatekɨ kanitɨrɨkaɨyeni, tsiputa 'uki yaxeikɨa,
ti'aitameta yukuyaxima wahamatɨa kanitɨrɨkaɨyeni.
32 »Xɨka yamɨkatikamie hepaɨ petiuyeikani, kwinimieme petiu'ata'ɨretɨ,
xɨka xewitɨ mɨpaɨ tiku'eriwani, kaneuyeweka yapauka muyutimaixɨanikɨ,
33 kwahu hayari xɨka retsita 'ukatuame xɨka 'iwakumuina kexiu kanihekɨarimɨkɨ,
meta xɨka karima 'ukatsurixike xuriya ratsurita kaniwakanemɨkɨ,
meta haxɨa xɨka 'utsutɨani kaniuyutakwixɨakuni».