Ti'aitame Remuheri niukieya kemɨtimaiwekai
31
1 Ti'aitame Remuheri niukieya kemɨtimaiwekai. Tixaxatame niukieya, maamaya kemɨtiti'ɨxatsitɨa niukiyari:
2 «¿Temaikɨ 'aku kepetiku'eriwa?
¿Temaikɨ 'aku, kepetiku'eriwa nemɨmatsi'utiniwexɨ?
Neyutanenewieku Yawé 'ekɨ pɨmatsiyetua, ¿kehepaɨ nemati'ɨxatsitɨani?
3 'Atɨrɨkariya pepɨkayetuaka 'ukari wahetsie,
mɨkɨ te'aitamete paitɨ mekaniwareuyexɨrɨwani.
4 »Remuheri 'aku,
'aixɨa pɨka'ane te'aitamete kaxie winuyari memɨ'ieka,
meta nawa kuwexinaruritsixi memanuye'eni,
5 kapa metarɨwetɨ mehetɨmaiya 'inɨari niukiyari kemaine,
meta tixaɨtɨ memɨkatehexeiya metewarunawairieni heitserie kememɨtehexeiya.
6 Memukwixime nawa memanu'einikɨ keniwarupitɨa,
meta kaxie winuyari kemɨ'ane waɨkawa memɨyu'iyaritɨa.
7 Meke 'enu'ieni, memɨtehatɨmaiyakɨ tixaɨtɨ memɨkatehexeiyakɨ,
tawariri memɨkahe'eriwanikɨ kememɨte'uka'eniwa.
8 »Kenewaparewieka yɨkɨmana memɨkaniuwawe 'itsɨkate wahɨxie,
kenewanenimayaka wiuraxi meta nutuite.
9 Mɨkɨ wahetsiemieme keneutaniukani 'aixɨa memɨ'itɨarienikɨ,
memɨkatehexeiya kenewanenimayaka memɨteheuyehɨwa wahetsie kenenuaka».
'Uka 'aixɨa kemɨtiuka'iyari, kemɨtiyuriene
10 'Uka 'inɨari mayuyeitɨwa, ¿hakewa peikaxeiya?
Matsi kwinimieme katinaye'aka keyuri tetexi witsimɨ'anene waɨkawa mɨraye'atɨka,
yukie 'uyeikatɨ yapɨtikamie.
11 Kɨnaya matsi hetsiena kaneuwaɨreni,
tixaɨtɨ 'iwarika pɨkareuyehɨwa.
12 Mɨkɨ naime kemɨtiyuriene 'aixɨa kani'aneni kɨnaya hetsiemieme,
'axapɨkatiyuriene kepaɨmexɨa tukari hamatɨana muyeikani.
13 Kanikuyeikani 'ikunanenetɨ muxa huxarieya meta rinu witsimɨ'ane 'ixurikiyari,
yumamakɨ tikumaɨwatɨ katini'uximayaka yutemawietɨ.
14 Kanuwa 'amɨpapa yuharerutamete hepaɨ kani'aneni,
mɨkɨ 'ateewa katinatɨtɨyeikani yu'ikwaite.
15 Ximeri paitɨ kananukukekani,
yuniwema katiniwarutimikwani,
meta yuparewiwamete yuhetsɨa miemete katiniwakumikwani.
16 Kwie xeiyame kemɨraye'aka kaninanaimɨkɨ:
manata kaxie kanika'iteɨtamɨkɨ me'iwaxɨkɨ.
17 Yuwaɨriyatɨ katini'uximayaka,
ximeri meta kwi taikai katiniutahayeikawani ka'uxetɨ.
18 Mɨkɨ yukɨmana katinimaika kemɨtiyuharerutani,
yukɨxeme pɨkakutɨtsa tɨkarikɨ yamɨti'uximayakɨ.
19 Xeitapakɨ yumamakɨ kaniwiyakamɨkɨ muxa huxarieya,
xeimekɨta 'utsikɨikɨ kanikaunakamɨkɨ.
20 Yumamakɨ ti'uximayatɨ tixaɨtɨ memɨkatehexeiya kaniwaparewieka,
mɨkɨkɨ kaniwatuikani kemɨ'ane memɨteheuyehɨwa.
21 Tsepa muhaɨtɨ pɨkayu'iyaritɨa yuniwema wahetsiemieme,
mɨkɨ yunaitɨ 'aixɨa memɨte'ukemarikɨ 'ɨkari memɨwawɨtɨatɨkakɨ.
22 'Itsiwame yukɨmana mɨkɨ kanitiwipani,
meta rinu 'ixurikiyari 'aixɨa mɨ'anene kanitiwewiwani menakatɨkɨnikɨ meta mɨyɨtsikimaɨye.
23 Meta kɨnaya 'aixɨa katinimariwani yukiekaritsie,
mɨkɨ katinihɨritɨarieka 'itsɨkate wahamatɨa hakewa mɨkɨ meme'uwa.
24 Rinu kemariyari wewietɨ kanituaka,
meta hɨiyamete mɨtiwewiyatɨka tetuayamete katiniwatuirieka.
25 'Aixɨa katinamamatiwani meta teɨteri yunaitɨ 'aixɨa mepɨte'ixeiya,
mɨpaɨ 'anetɨ pɨkama kemɨtiyɨnikɨ 'uxa'atɨni warie.
26 Kepauka mutikuxata, timaiwetɨ katinikuxatani,
kepauka mɨti'ɨkita, wanaki'erietɨ kaniyɨaneni.
27 Yukie mɨkɨ yakatiniukani tanieretɨ,
kepauka paa mukwa'a me'iwaxɨkɨ katiniutikwa'ani.
28 Tɨɨriyamama me'anuku'uwetɨ mekanitananakeni,
kɨnayata yaxeikɨa kaniyutemawieka 'inaki'erietɨ:
29 «Yuwaɨkawatɨ 'ukari 'aixɨa memɨte'u'iyari mekanixuaweni,
matsi 'ekɨ yunaime pekaniwara'iwani».
30 Katiniyukwamanani kemɨ'ane witsimɨtiyuxexeiya xeikɨa meta pɨkareutetere,
matsi 'uka Yawé mayemakaxe 'aixɨa katinaniuwamɨkɨ hetsiena mieme.
31 'Uka pumatiwani naitsarie kemɨtiukaxuxuawere,
meta 'uximayatsikayatsie naitɨ mɨtihekɨakɨ 'aixɨa pɨraniuwani.