17
Rawiri nenewierieya.
1 Yawé, heitseriekamekɨ kenemetiwawirie keneu'eni,
nehiwari keneu'eni keneneuparewi,
nenenewieri kwi keneu'eni,
ne neti'itawatɨ nepɨka'utaine.
2 Nehetsie nunuwame kenehɨkɨtɨni 'ekɨ,
'ekɨ pemɨtimatekɨ tita mɨtiheitserie.
3 'Ekɨ ne'iyari pepɨmate,
'ekɨ tɨkarikɨ pepɨnetsixeiya,
tsiparatsɨ keneneuta'inɨata,
nehetsie 'axamɨ'ane pepɨkakaxeiya.
Ne 'axanepɨkatayɨni
4 hipatɨ teɨteri kememɨte'uniuka wahepaɨ,
netsɨ 'aniuki nekanaye'atɨaka.
Teɨteri memɨteyukananaima wahuye nepɨka'uweiya
5 ne nepɨkawa'ɨke nepɨne'ɨwiya,
'ahuye 'etsimatayeyeu 'utɨma nepumie nekahekawautsetɨ.
6 Kakaɨyari 'aku, 'ekɨ xeikɨa nepɨmatsihahiwiwa, 'ekɨ pemɨnetsiku'eiyakɨ,
'ahurawa keneneu'eni pemi'enienikɨ nenenewieri.
7 'Ekɨ, 'atɨrɨkariyakɨ pemɨwawikweitsitɨawe,
kemɨ'ane memuyu'unarɨme memɨwaraye'unie mewaruweiyakaku,
'inɨari yakenetineuxeitsitɨa waɨkawa kepemɨti'akanaki'erie.
8 Kenene'ɨwiyani 'ahɨxi hixɨapa mɨyeka pemɨti'ɨwiya hepaɨ,
kenene'awietani, wakana yu'anatɨa yuniwema mɨtiwa'ɨwiya hepaɨ,
9 kenene'awietani 'axateyuruwamete memɨnetsimietɨwekɨ,
memɨnetsi'aye'unie newarita mematetɨkakɨ.
10 Yu'iyaritsie xeikɨa mepɨteheunama,
'axamekatenikuxatani hipame mewa'iwakutɨ xeikɨa.
11 'Ahurawa xeikɨa mekanenita'ɨwiyani kenemɨtiyuriene,
mekanenihupieka menetsimiekutɨ.
12 Mayetsi memɨtehupa hepaɨ mekani'aneneni,
mayetsi yuwai memɨtetahupie hepaɨ.
13 Hikɨmɨ, Yawé, 'ekɨta wahɨxie keneukexi.
Keniwara'iwa.
'A'ixiparakɨ keneneutawikweitsitɨa 'axateyuruwamete memɨnetsi'uweiyakɨ.
14 Yawé, 'atɨrɨkariyakɨ keneneutawikweitsitɨa 'ikɨ teɨteri memɨkwiwawe mepɨnetsi'uweiya,
yutukari memumikie 'ena kwiepa pɨmieme xeikɨa.
Kwinie mɨraye'atɨkakɨ xeikɨa pepɨwarutihɨniyaxɨ,
waniwema waɨkawa metehexeiyatɨ mepakɨ,
wanuiwarima wahetsiemieme paitɨ pɨranayuhayewaxɨ.
15 Peru ne matsi heitseriekamekɨ 'ahɨxie nepumatsihexeiya.
'Ahɨxie kepauka nemanutaniere nematsihexeiyatsie mɨkɨkɨri ne'iyari 'aixɨa peyɨni.