18
(Nɨa 18:Tít.-50 – 2 Tsam 22:1-51)
Teyuitɨwamete wa'ukiyari. Rawiri kwikarieya, Tsahuri heye'uniekaku meta yunaitɨ memeye'uniekai me'ikuweiyatɨwekaku. Yawé Rawiri kemɨtiutawikweitsitɨa. 'Ana mɨpaɨ kaniutayɨni:
1 Yawé, yuheyemekɨ nepɨmatsinaki'erie, 'ekɨ pepɨnetɨrɨkariya.
2 Yawé 'ai hepaɨ kani'aneni, mɨnetsikunama, mɨnetsiwikweitsitɨa,
nekakaɨyari kanihɨkɨtɨni, 'ai 'amutitɨtɨ taɨta mɨnetsi'awieta.
Nehetsie kaninunuwametɨni, tɨrɨkaɨyemekɨ mɨnetsiwikweitsitɨa,
mɨkɨ 'ateewa paitɨ pɨnetsi'awieta.
3 Yawé nepahɨawe, meuyewetse mɨnɨawariekakɨ,
memɨnetsi'aye'unie wahetsɨa pɨnetsihayeha.
4 Mɨki winiyariyaritsie nepunexei nehɨatɨ,
haa kwinimieme mɨtiwakuxikɨriwatsie mekaneneukahɨpani.
5 Kaunarikɨ kaneniutahɨani nemɨkateukienikɨ,
mɨki winiyariyaritsie nekaniunexeiya.
6 Ne'uximatɨarietɨ Yawé nekaniutahɨawe,
nekakaɨyari nekaniutahiwieni,
mɨkɨ yutukita paitɨ kaneniu'enieni,
nehiwari nakatana paitɨ katiniunake.
7 Kwie naitɨ kaniutayuani kaniuta'une,
kaniwatayuaxɨani hɨri tsutɨmeyarite,
Kakaɨyari haxɨayakɨ kanewatayuaxɨani.
8 Tsuritana kɨtsi kanewakaneikakaitɨni,
tetanata tai watixɨtsitɨwatɨ,
tɨɨ xawawatɨme kaniwayenenetɨwakaitɨni.
9 Muyuawi hanutayepieka niwakayani,
hai yɨyɨwimetsie 'akiekatɨ.
10 Xeime yuteɨtametsie 'akaitɨ, muyuawitsie xuruku kaniutawewieni
'eka 'anayatsie 'akaitɨ kaneyani.
11 Yɨwita kaneuyuka'awieta,
hai yɨyɨwimetsata hakɨkɨ
naitɨ nanukanakaitɨni.
12 Kwinimieme mɨtixawatɨkaikɨ hai niukaxɨrieni,
tee meta tɨɨ tatɨkaitɨ.
13 Muyuawitsie, tee meta tɨɨ tatɨkaitɨ kaxɨrɨwekaku,
Yawé niukieya kanayu'eniɨriɨkɨre tɨranari hepaɨ,
'Amutewi niukieya waɨkawa kanayu'eniɨriɨkɨre.
14 Yu'ɨrɨkɨ kaniwarutamɨni, mimierɨkari mɨmamariwawe,
memɨnetsi'aye'unie kaniwarutaweiya, kaniwarutinautsitɨani.
15 Yawé, pemɨtiuyutatikɨ,
'ahaxɨa 'iiyarikɨ,
haramara mayema kananatihekɨare,
kanahekɨare kwie tsutɨmeyari mituikatɨka.
16 Yumamá 'ameutitewatsie paitɨ kanakatsera,
nemamatsie kanikawiere kanenewatihana haramara meukatewatsie.
17 Kaneniuxɨna mɨnetsi'aye'unie mɨtɨrɨkaɨye hetsɨa,
meta memɨnetsixani'eriekai wahetsɨa,
matsi mɨkɨ mepɨtɨrɨkawikai ne kenemɨkatitɨrɨkaɨye.
18 Kepauka nemekawe mekaneniutamieni,
matsi Yawé netsiparewiwame kanayani.
19 'Amakuyewatsie kaneni'atɨani,
kaneniutawikweitsitɨani netsinaki'erietɨ.
20 Yawé kanetinakapitɨani heitseriekamekɨ kenemɨtiyuriene,
yakanetiniuta'iwitsitɨani nemamakɨ 'axanemɨkatiuyurikɨ.
21 Yawé huyeyatsie xeikɨa nemumiekɨ,
hawaikɨ 'axanemɨkareyurienekɨ
nekakaɨyari nemɨkaku'eiriwekɨ.
22 Titakɨ mɨneranutahɨani naime nepɨtimate,
'aitsikaya nepɨkahatɨtɨmaiya.
23 Hamatɨana 'aixɨa nepɨtiuyeika
nepɨkanewaɨriya 'axanemɨtiyurienenikɨ.
24 Yawé kanetiniyetuirieni heitseriekamekɨ kenemɨtiuyeika,
nemamakɨ ke'axanemɨkatiyuriene.
25 'Ekɨ 'aixɨa pepɨtiuka'iyari kemɨ'ane 'aixɨa mɨtiuka'iyari hamatɨa,
'aixɨa 'anemekɨ pepɨwanenimaya kemɨ'ane 'aixɨa memɨte'u'uwa,
26 kayuwatɨ pepuyeika kemɨ'ane kayuwatɨ muyeika hamatɨa,
peru kemɨ'ane mutiuyukananaima hamatɨa petimaiwetɨ pepuyeika.
27 Kemɨ'ane tixaɨtɨ memɨkate'ayuyeitɨa pepɨwapitɨa memɨte'ayu'iwanikɨ,
peru kemɨ'ane memɨte'uyukatawe'erie tixaɨtɨ pepɨkatiwarayeitɨwa.
28 Yawé, 'ekɨ nekɨxeme takame pepɨnetsihayewirie,
'ekɨ nekakaɨyari, neyɨriya pepɨhekɨariwiya.
29 'Ekɨ penetsiparewiekaku hipame kuyaxi nepɨwatakwini,
nekakaɨyari, hamatɨa kiekari kuraruyarita nemeukahani nepɨyɨwe.
30 Kakaɨyari huyeya pɨheitserie,
Yawé niukieya kani'itiyaka.
Kakaɨyari kuya tepɨaya kanihɨkɨtɨni kemɨ'ane mana memuyu'awieta wahetsiemieme.
31 ¿Kemɨ'ane Kakaɨyari pɨhɨkɨ, Yawé xeikɨa kanihɨkɨtɨni?
¿Kemɨ'ane tete pɨhɨkɨ, takakaɨyari xeikɨa kanihɨkɨtɨni?
32 Mɨkɨ netɨrɨkariya kanayeikani
nehuye mɨheitseritɨa,
33 ne'ɨkate maxa 'ɨkateya kanayeitɨwani,
meta kepauka 'ateewa nemakakanitsie pɨkanetsipitɨa nemanakawenikɨ,
34 pɨneti'ɨkitɨa nemeyutamiewenikɨ,
nemamate pɨtɨrɨrikaya purunitse tupiyari nemahapananikɨ.
35 'Ekɨ 'atepɨakɨ pepɨnetsiwikweitsitɨa,
'atseriekɨ pepɨnetsiwiya,
'aixɨa pemɨtiuka'iyarikɨ neputawikwewe.
36 Huyeta 'aixɨa pɨtiyurie xeiya nemumienikɨ,
nemɨkahetiketamɨrikenikɨ.
37 Nepɨwaranukuwei memɨnetsi'aye'unie, nepɨwaranuku'axixɨ,
ne nepɨkahewake yunaime newarakumaweriyakake.
38 Nepɨwaretipɨnaxɨ. Tawari mepɨkahanuku'ui.
Nehetɨa mekanekaxɨrieni.
39 'Ekɨ tɨrɨkariya pepɨnetsi'upitɨa nemɨnetamienikɨ,
nehetɨa 'axamemɨte'u'iyari pekaniwati'uitɨani.
40 Memɨnetsi'aye'unie memɨkaxɨrienikɨ yapekatiniuyurieni,
neta mɨpaɨ nekatiniwareuyehɨani memɨnetsi'uxiekai.
41 Parewiya mepuku'iwawakai, xewitɨ mɨwatawikweitsitɨanikɨ pɨka'utine.
Yawé meputahiwi, matsi mɨkɨ pɨkawaruta'ei.
42 Nepɨwarutitɨxixɨ. Tumuanari hepaɨ mepɨteyuxexeiyakai 'eka mei'enitsitɨwa.
Nepɨwarutiketsi haxu hepaɨ huyeta mɨtika.
43 Memɨnetsi 'uximatɨakai wahetsɨa pepɨnetsi 'ɨxɨnaxɨ,
hikɨ matsi hipame nuiwarite wayeta pepɨnetsikake,
hikɨ mepɨnetsi'ayexeiya teɨteri nemɨkawamatekai.
44 Yapauka menetsi'enietɨ, mepuyuyetuayakai nehetsɨa,
teewatari mepɨyɨa, mɨyatɨtɨ nehɨxie mepanakatutsire.
45 Mɨkɨ nemɨkawamate meputimamawe,
me'utiyɨyɨakatɨ mepɨwayekɨka memuwayu'awietata.
46 Yawé kaniuyeikani. 'Aixɨa keramamatiwani ne'ai.
Kenɨawarieka nekakaɨyari netsiwikweitsitɨwame.
47 Kakaɨyari nehetsiemieme mɨtiwarakapitɨwa memɨnetsi'aye'unie pɨhɨkɨ,
nuiwarite nehetɨa muwaku'uitɨwa.
48 'Ekɨ pepɨnetsiwikweitsitɨa memɨnetsi'aye'unie wahetsɨa,
memɨnetsi'aye'unie waheima pepɨnetsikake,
pepɨnetsiwikweitsitɨa teɨteri 'axamemɨte'u'iyari wahetsɨa.
49 Yawé, 'ayumieme ne 'aixɨa nepaine 'ahepaɨtsita nuiwarite watsata
meta nɨawari 'ahetsiemieme neputikwika kepemɨtitewakɨ.
50 Yawé mɨrayu'iwanikɨ pipitɨa ti'aitame menukake,
menayexei Rawiri meta nuiwarimama
pɨkawahayewa yuheyemekɨ wanaki'erietɨ.