19
Teyuitɨwamete wa'ukiyari hetsiemieme. Rawiri nɨawarieya.
1 Muyuawi taheima muyema hetsie pɨmatsiɨkɨ Kakaɨyari kemɨtimariwe,
mɨkɨkɨ pɨtihekɨata yumamakɨ kemɨtiutawewi.
2 Tukari xeime tukari yapɨtikuxaxatɨwa kemɨtiɨyɨ,
tɨkari xeime tɨkari yapɨrahɨawe.
3 Tsepa memɨkatexatawawe,
tsepa waniuki mɨkayu'eniɨriɨkɨ,
4 naitsarie kwiepa kaniwaku'eiyani,
waniuki kwie manu'axe kaniye'axeni.
Kakaɨyari muyuawitsie tau
kiiya kaniukawewieni.
5 Mɨkɨ yukiita kaniwayeyeikani neneɨkeme hepaɨ tiyutemawietɨ,
waukawa yutemawietɨ yeikame hepaɨ, kaneyeikani yuhuyeta.
6 Muyuawi panakuyeika xeitaparitsie
'umietɨta xeitaparitsie pɨta kaneukayuyuipikeni,
yunaime waxɨriwiyatɨ xeime kahayewatɨ.
7 Yawé tɨratuya 'aixɨa kani'aneni:
hekwame tukari katiniyupitɨwani.
Yawé 'aitsikaya hetsie yuri mɨti'erie 'aixɨa kaniyurieka:
'atsimɨkatimate timaiweme kanayeitɨwani.
8 Yawé kemɨti'aita kaniheitserietɨni:
'iyari kanitemawieritɨaweni.
Yawé niukieya kanihekɨaka:
hɨxite hauneniereme kanayeitɨwani.
9 Yawé xɨka temakaxeni 'aixɨa kani'aneni:
yuheyemekɨ kani'ayumiemetɨni.
Yawé kemɨranutahɨani kaniyuritɨni:
naitɨ kemɨtiyuyuruwa kaniheitserietɨni.
10 Matsi huru reuyeta pɨtiyunaki'erinɨa,
huru 'aixɨa mɨ'ane reuyeta,
matsi xiete reuyeta pɨrakaka,
xiete yuxɨrɨkatsie muhane hepaɨ.
11 Kɨmana tewi 'ahetsɨa mieme kanaye'eritɨariwani,
Kemɨ'ane memeye'atɨwa waɨkawa 'imikieri pepɨtiwakupitɨwa.
12 Xewitɨ 'apɨka'uyeika timaitɨ kename 'axatiyuriene.
Kenetineuyehɨwirieka titakɨ 'atsinemɨkatinemate.
13 Keneneuxɨna 'axanemɨtiyurienekɨ nemɨtiyukatawe'eriekɨ,
pepɨkanetsipitɨaka mɨkɨ 'axamɨti'ane mɨnetsikuyuitɨwanikɨ.
Mɨpaɨ nehetsie pɨkarahɨiwani
meta nepɨka'imɨiriyani 'axamɨti'ane.
14 'Ekɨ kenenaki'erieka,
neniuki meta kenemɨtiku'eriwa,
Yawé, ne'ai meta pemɨnetsiwikweitsitɨwame.