44
Teyuitɨwamete wa'ukiyari. Kure niwemama wa'ɨkitsika.
1 Kakaɨyari, tepɨte'u'eni 'ahetsie timieme,
tapaapama mepɨtate'utaxatɨa
mamariwaweme kepemɨtiuyuri memu'uwakaitsie,
'iya tukaritsie meripaitɨ:
2 'Atɨrɨkariyakɨ hipame nuiwarite pepɨwarutawei,
mana pɨta pepɨwa'atɨa tapaapama,
'iya teɨteri pepɨwarakumaweriyaxɨ,
tapaapama pepɨwaruparewi.
3 Wa'ixipara pɨkatiuyuri kwie mema'iwaxɨ,
yukɨmana mepɨkate'uyuri memɨte'ayu'iwaxɨ:
matsi 'atɨrɨkariya pɨtiuyuri, 'amamá 'atserieta mieme pɨtiuyuri,
'anierika xawatɨriyaya pɨtiuyuri, 'ekɨ pemɨwanaki'eriekaikɨ.
4 'Ekɨ xeikɨa ti'aitame nehetsiemieme pepɨhɨkɨ meta nekakaɨyari.
Kakuwu mɨrayu'iwakɨ pepiparewi.
5 'Ekɨ petatsiparewiekaku memɨtatsi'aye'unie tepɨwara'iwaxɨ,
kepemɨtitewa hekɨ tepɨwarutipɨnaxɨ memɨtatsi'aye'uniekai.
6 Ne netupi hetsie nepɨkaheuwaɨre,
ne'ixipara nemɨrayu'iwakɨ pɨkanetsi'uparewiwe,
7 'ekɨ matsi petatsiparewiekaku memɨtatsi'aye'unie tepɨwara'iwa,
memɨtatsi'aye'unie meyutetewiyame pepɨwarayeitɨwa.
8 Taheyemekɨ tepɨtatemamawieka Kakaɨyari hetsie.
Yuheyemekɨ tepinɨawani.
9 Peru hikɨ pepɨtatsihexɨri teyutetewiyame pepɨtatsi'ayeitɨa,
pepɨkatatsiparewieri temuyukwitɨwetsie.
10 Mɨtatsi 'aye'unie hɨxie tema'iwarienikɨ yapepɨtiuyuri,
mepɨtatsi 'ayewei memɨtatsi 'aye'unie mepɨtate'unawatsiri.
11 Muxatsi temɨhɨkɨtɨni hepaɨ
pepɨtatsiyetua temɨtikwaiyanikɨ,
mekataneutaxɨriexɨani naitsarie kwiepa.
12 'Ateɨterima pekaniwarutuani ka'ɨrimekɨ,
tixaɨtɨ pepɨkaranɨ'ɨi pewarutuaka.
13 Ta'aurie kiekatari wahɨxie tetewiwekame pepɨtatsi'ayeitɨa,
nanaimariwamete 'atsieriwamete tekanihɨkɨtɨni.
14 Kwiepa memɨtama wananaitɨwamete tekanihɨkɨtɨni,
yunaitɨ teɨteri memu'uwa mekatani'atseni tame.
15 'Etsiwatɨma nepɨkahayewarie nekananaimarietɨ,
waɨkawari nepaunetewiya,
16 waɨkawa memɨnetsinanaimakɨ menetsi'utahiwiwatɨ,
mɨnetsi'aye'unie ya'aneme wiwiekaku muyuwaɨriya mɨraka'una.
17 Mɨya tepɨte'anuyehu hikɨ,
hatsuaku tekametsihatɨmaiyakutɨtɨ
meta 'atɨratu teka'uku'eiriekutɨtɨ.
18 Tepɨkametsiku'eiriewawe,
'ahuye meta tepɨkaku'eiriewawe.
19 Matsi 'ekɨ yawixi memayu'eriyaya waterɨta pepɨtatsiheukaxɨri,
waɨkawa mayeyɨwitsie pepɨtatsiheutaxɨri.
20 Xɨka tehetɨmaiyake takakaɨyari,
xɨka yatɨni hipame kakaɨyarixi wahɨxie te'ukatunuma'unike,
21 ¿tamɨ Kakaɨyari karetimanikeyu,
mɨkɨ naime mɨtimate tita temɨte'awieta tahetsie?
22 'Ahetsie temɨtewiyakɨ, tepɨtakwikwiwa yuheyemekɨ,
muxatsi memɨkwaiya wahepaɨ tepɨte'anuyehu memehapawa mehekwi'iwake.
23 Ti'aitame, 'ari kenanutanieri. ¿Titayari petikutsu?
Kenanukukexi. Pepɨkatatsihexɨrɨwani 'aheyemekɨ.
24 ¿Titayari tahepa pekatinierimɨkɨ?
¿Titayari 'atsipekaraine tete'uka'eniwakaku meta tenanaimariekaku?
25 Tepa'iwarie kwiepa paitɨ tepɨtihe,
tawaiyari kwiepa paitɨ patixɨrɨwe.
26 Kenanukukexi, kenaye'a ketaneuparewi,
'anaki'eriyakɨ taheima keneutanua.