45
Teyuitɨwamete wa'ukiyari. «Tuturi» yuariyaya keneuweiyani. Kure niwemama wa'ɨkitsika. Neɨkiyapa mieme.
1 Ne'iyaritsie peyeyuane kwikari hekwatɨ,
ne'ikuxatakaku kemanuyɨne ti'aitame hɨxie,
'utɨwame witsimɨtiu'utɨwa hepaɨ kani'aneni neneni.
2 'Ekɨ tewi witsipemɨti'axexeiya pekanihɨkɨtɨni,
witsipekatiniuxaxatani,
Kakaɨyari 'aixɨa pɨmatsiyurie yuheyemekɨ.
3 Witsi'aneme mariwemekɨ,
yu'ixipara kanakawieka, 'iya mɨrayu'iwa.
4 Mariwemekɨ, kananutiyeixani rayu'iwake
tita yuri mɨraine hetsiemieme kaniyumieneni,
meta tixaɨtɨ mɨkarayuyeitɨa meta tita mɨtiheitseriekɨ,
mariweme ketiyurieneni 'atɨrɨkariya.
5 'A'ɨrɨ kwinimieme mɨranuyemɨtsɨ ti'aitame memaye'unie
wa'iyaritsie keheu'uni,
meta nuiwarite 'ahetɨa meke'ukaxɨrieni.
6 Kakaɨyari, 'a'uweni yuheyemekɨ 'apuwe,
'a'itsɨ pemɨti'aitame hetsiemieme, mɨkɨ 'itsɨ 'aixɨa mɨti'anekɨ mɨti'aita kanihɨkɨtɨni.
7 'Ekɨ 'aixɨa mɨti'ane pepɨtinaki'erie, 'axamɨti'aneta pepɨti'uxiwe'erie,
'ayumieme Kakaɨyari pɨmetsi'anayexei 'ekɨ, 'a'iwama pɨkawaranayexei,
'akakaɨyari temawierika hatseitiyari pɨmetsi'ukawiri.
8 Mixaxi 'ɨakariyari, 'aruhe meta kanera,
mɨpaɨ pu'ɨatɨka 'akemarite,
paratsiyu witsimɨtiuye'anetsie 'umetekɨ tiwaku'utɨkaimeta pe'ayekaiku,
pɨmetsitemawieritɨa kanari yuariyaya.
9 'Ukari te'aitamete waniwema witsimemɨ'anene memɨmetsiparewie watsata mekaniye'uwani,
'atserietata 'uka ti'aitame kanakani
huru 'Upixi miemekɨ 'utixawatɨretɨ.
10 Keneu'ena, 'uka yemekɨ keneu'a'ɨwiya:
'Akiekari kenatɨmaiya meta 'a'iwama.
11 Ti'aitame witsikepemɨti'ɨimari kamenihiwe'erieka,
mɨkɨ meti'aitɨwame kanihɨkɨtɨni, hɨxiena kenanakatutsita.
12 'Ukari Tiru kiekatari mekani'axɨakuni 'imikieri mete'upitɨ,
teɨteri mana kiekatari memɨxikutsixi 'aixɨa mepɨmetexeiyani.
13 'Uka witsimɨti'ɨimari 'aixɨa katiniyuxexeiyani,
yukiita wayemietɨ hurukɨ 'utixawatɨretɨ 'iwieya reuxuiyakaku.
14 Kemari ranakapitɨ 'aixɨa mɨti'anenekɨ reuxuiyatɨ
kanewitɨwani ti'aitame hɨxie,
'ɨtɨmanata 'ɨimarixi me'eweiyatɨ.
15 Temawierikakɨ mekanewitɨwani
ti'aitame paratsiyuta paitɨ.
16 'Aniwemata yupaapama wa'uwenitsie mekanayaxikuni,
memanuyetei pekaniwarayeitɨamɨkɨ naitsarie kwiepa.
17 Pemukahatɨmaiyarienikɨ yanepɨtiyurieni
yuheyemekɨ,
'ayumieme nuiwarite mepɨmetsitanɨawa,
yuheyemekɨ yuheyemekɨ.