46
Teyuitɨwamete wa'ukiyari. Kure niwemama wakwikari 'etsi'uyuatɨ mutakwika.
1 Kakaɨyari tahetsie nunuwame kanihɨkɨtɨni, hetsiena temɨta'awieta,
yuheyemekɨ tatsiparewiwame kepauka temu'uximatɨarie.
2 'Ayumieme tepɨkaheumamaka,
tsepa kwiepa kemɨtiyɨane
tsepa yemurite haramara hixɨapa mɨtiukayunixɨa,
3 tsepa hamewarieya kwinimieme mɨtiutatɨrarɨka,
ha'akaku hɨxiena tsepa hɨrite mutiyuane.
4 Haa mana kaniuyehaneni Kakaɨyari kiekarieya mɨtemawieritɨa,
'Amutewi kie makupatsietsie.
5 Mana Kakaɨyari kaniukani, kiekari hatsuaku pɨkahatiweni,
kepauka mukahekɨkɨaretsie Kakaɨyari kaniwaparewiekamɨkɨ.
6 Nuiwari mukumane mekanimamaka, te'aitamete mekaniuyɨyɨakatɨkani,
kepauka Kakaɨyari mutaniuka, kwie kanita'unikeni.
7 Yawé, Naimekɨmɨtɨrɨkaɨye tahamatɨa kaniuyeikani,
hetsiena temɨta'awieta Kakuwu Kakaɨyarieya kanihɨkɨtɨni.
8 Xekenakɨni xekeneuxeiya Yawé mamariwaweme pɨtiyuriene,
mɨkɨ kwiepa makumawenikɨ pɨtiuyuri.
9 Kuyaxa kaneutipariya naitsarie kwiepa.
Tupi kaniutimura, pitsika 'amɨtɨtɨ kaniutimura,
kaxetate kuyaxa mieme taipa kaneuxɨrieni.
10 «Kayuwatɨ xeketeneteni, mɨpaɨ xeketenetimati ne Kakaɨyari nemɨhɨkɨkɨ.
Ne 'aixɨa nekatinitahɨawariemɨkɨ nuiwarite watsata.
Ne nemariwetɨ nekanayeitɨariemɨkɨ kwiepa».
11 Yawé Naimekɨmɨtɨrɨkaɨye tahamatɨa kaniuyeikani,
hetsɨana temɨta'awieta Kakuwu Kakaɨyarieya kanihɨkɨtɨni.