48
Nɨawari. Kure niwemama wakwikari.
1 Yawé pɨmariwe, minɨawani yemekɨ 'aixɨa pɨ'ane
takakaɨyari kiekarienatsie.
Hɨrieya mɨpatsietsie, 2 hɨri witsimɨ'ane,
naitsarie kwiepa watemawierika pɨhɨkɨ.
Tsiyuni hɨriyari, tayeta katini'aneni,
Ti'aitame mɨmariwe kiekarieya kanihɨkɨtɨni.
3 Tsiyuni muwe tuxiyu 'amutewita,
Kakaɨyari kaniyuhekɨata tiyu'awiwietame 'aixɨa mɨ'ane kemɨtihɨkɨ.
4 Te'aitamete mekaniyukuxeɨrieni mekaniyutinɨni,
yunaitɨ mɨkɨ kiekari me'unietɨ mekanewakɨne,
5 peru kepauka memixei kayuwatɨ mekateniu'uni,
waɨkawa memamatɨ mekaneutayeixɨani.
6 Mana waɨkawa memamatɨ mekanakɨne,
meta 'ukaratsi mɨtiniwerɨmeni hepaɨ 'anetɨ wahetsie katininuani.
7 'Eka kwinimieme mɨtitɨrɨkaɨyekɨ,
kanuwate 'amɨpapa Taritsi mieme peputimuraxɨa.
8 Yemekɨ kehepaɨ temɨte'u'enanakai
hikɨ tepunenierixɨ,
Yawé Naimekɨmɨtɨrɨkaɨye kiekarienatsie,
meta takakaɨyari kiekarienatsie:
Mɨkɨ hatsuaku pɨkaheitiparitɨani.
9 'Atukita paitɨ, neuxei Kakaɨyari,
'anaki'eriya tepuku'eriwa.
10 'Anɨawari, neuxei Kakaɨyari, meta kepemɨtitewa hepaɨ pɨ'ane,
kwie manu'axe paitɨ kaniuyeikani,
'amamá tserieta miemetsie tita mɨtiheitserie katinihɨneni.
11 'Ekɨ 'aixɨa pemɨtiyurienekɨ
hɨri Tsiyuni kaniyutemawieka,
meta Kura kiekariyaritsie mamanetɨka kaniyutemamawieka.
12 Tsiyuni 'aurie xekenahuni,
waritana xekenakɨni
meta xekeneuti'inɨata tuxiyuya,
13 kuraruyari 'aixɨa yemekɨ xeketeneuxeiya,
xekeneutixeiyaxɨa hakewa memeyuti'awiwieta,
mɨpaɨ 'uxa'atɨni warie xemɨtewakuxaxatɨwanikɨ yuniwema meta yuteukarima.
14 'Ikɨ Kakaɨyari takakaɨyari yuheyemekɨ kanihɨkɨtɨni.
Mɨkɨ yuheyemekɨ kataniuwitɨximemɨkɨ.