49
Teyuitɨwamete wa'ukiyari. Kure niwemama wakwikari.
1 'Ikɨ xeketeneu'eni, yunaitɨ teɨteri:
xekeneu'enana, kwiepa xemɨtama naitsarie,
2 yunaitɨ xemɨwerarani meta yunaitɨ waɨkawa xemɨmamariwawe,
yunaitɨ xikutsixi meta tixaɨtɨ xemɨkateheuxeiya.
3 Nepɨtikuxatani timaiwemekɨ,
ne'iyari timaitɨ pɨtikuxatani.
4 Temaiwawemete waniuki kwi 'ahurawa nepɨ'enieni,
netiyuitɨatɨ kanarikɨ nepɨxetaxatɨani niuki mɨ'awie.
5 ¿Titayari nereumaka kepauka 'uximatɨarika nehetsie munuani?
¿Titayari nereumaka kepauka memɨnetsi'aye'unie memɨnetsinanaimatsie?
6 Pukaheuyewetse xikutsixi nemuwamakaxenikɨ yupiinitsie memɨtewiya
meta yupiinitekɨ memuyutimariwekata.
7 Nixewitɨ xeime mutawikweitsitɨani pɨkayɨwe,
meta pɨkayɨwe Kakaɨyari mɨtiupitɨani xeime tukarieyakɨ.
8 Xeime tukarieya mutawikweitsitɨani katinaye'aka,
pumawe ka'inɨaritɨ kemɨraye'axe.
9 Xewitɨtɨma yapɨkatiuyeika,
hatsuaku kamɨwetɨ.
10 Meyunaitɨ yaxeikɨa mepɨtetakukuwe,
memɨtemaiwawe meta memɨkatemaiwawe yaxeikɨa mepɨtakukuwe,
wapiinitɨarika hipatɨ wapiini pɨrayeika.
11 Tsepa kwie memeuxeiyakai yuhepaɨ titetewakame,
teukiyapa wakii yuheyemekɨ pɨhɨkɨtɨni,
wakie pɨhɨkɨtɨni yuheyemekɨ.
12 Tsepa xiku xewitɨ mayuyeitɨa, peru mɨkɨ 'apɨkareutere,
yeutari wahepaɨ mepɨtakukuwe.
13 Mɨpaɨ kani'aneni yuhetsie memɨtewiya wahuye,
mɨpaɨ mekateneutiparikuni 'iya memuyuti'ɨre.
14 Muxatsi wahepaɨ, mekane'ariyani teukiyapa,
muwa kaniware'arieni mɨki.
Wakaxari kwieta paitɨ kanetipɨnimɨkɨ,
wakii witsimɨ'anene mati'utsie 'ahetewakaku.
'Uxa'arieka ximeri teɨteri heitserie memexeiya mekateniwata'aitɨakuni.
15 Peru Kakaɨyari kanenitawikweitsitɨamɨkɨ teukiyapa
yuhamatɨa kanenanuwitɨmɨkɨ.
16 Pepɨkamaka xewitɨ xɨka xiku hayuyeitɨani
meta xɨka yukii witsi'aneme 'utawewieni,
17 mɨkɨ kepauka mɨmɨni tixaɨtɨ pɨkaranupini,
hamatɨana pɨkatiyehu piiniteya.
18 Tsepa 'a'uyeikatɨ kename 'aixɨa tiuyeika maine,
tsepa teɨteri 'aixɨa memɨtehehɨawe xiku matɨakɨ,
19 yaxeikɨa kanimɨmɨkɨ yupaapama wahepaɨ,
tawariri hekɨariya pɨkaxeiya.
20 Tsepa xiku xewitɨ mayuyeitɨa, peru mɨkɨ 'apɨkareutere,
yeutari wahepaɨ mepɨtakukuwe xeikɨa.