72
Tsarumuni nɨawarieya.
1 Kakaɨyari 'aku, heitserie hexeiyame kenayeitɨa 'ikɨ ti'aitame,
meta heitserie kepemɨrexeiya ti'aitame nu'aya mɨpaɨ ketineupitɨa.
2 Mɨkɨ 'ateɨterima pɨwataheitseritɨani
meta heitserie mehexeiyame pɨwarayeitɨani tixaɨtɨ memɨkateheuxeiya 'ahetsɨa miemete.
3 Hɨrite 'aixɨa pɨtiwayatsa 'ateɨterima,
hɨri 'amanutitɨtɨ heitserie pɨwapitɨani.
4 Ti'aitame tixaɨtɨ memɨkateheuxeiya heitserie pɨwapitɨani
meta yemekɨ memɨteheuyehɨwa pɨwatawikweitsitɨani,
mɨkɨ pɨwatipɨna 'axamemɨte'u'iyari.
5 Ti'aitame ke'uyeikani keti'aitametɨni xeimiriyari nuiwariyaritsie,
tau hepaɨ meta metsa.
6 'Etsaripa kemɨtiukawiwiye hepaɨ ke'aneni,
wiyeri kwie mɨtiuhawiya hepaɨ ke'aneni.
7 'Uyeikakaku mɨtiheitserie keranayuhayewani,
waɨkawa ketixuaweni tita memɨteheuyehɨwa,
kepaukake metsa makayune.
8 Ti'aitame keti'aitani huta haramarayari tsata
haa 'Epɨrata manuyeka 'atsita kwie hakewa meu'axe.
9 Hɨxiena meke'utihɨxima'uni makumawetsie nuiwarite memɨtitei,
tumuanari meke'utikwani memeye'unie
10 Taritsi kwieyaritsie te'aitamete meketeyutuaka
meta haramara tetsita 'anutaɨye
te'aitamete mekete'i'atɨiriwani
Tsawani meta Tsewa kiekatari.
11 Yunaitɨ te'aitamete hɨxiena meke'ukahɨxima'uni,
yunaitɨ nuiwarite mekete'i'uximayatsirieka.
12 Mɨkɨ piparewieni kemɨ'ane parewiya ma'iwawani,
meta tixaɨtɨ mɨkarexeiya pɨparewieni mɨkarekaparewiwame.
13 Pɨwatinenimayata tixaɨtɨ memɨkate'ayeitɨarie meta tixaɨtɨ memɨkatehexeiya,
haweri memɨ'anene watukari pɨtawikweitsitɨani.
14 Pɨwaxɨna kememɨtenanaimarie,
mɨtimatekɨ watukari meuyewetsekɨ.
15 Ti'aitame ke'uyeikani.
Huru keyetuiriyarieni Tsawa mieme.
Ketiyunenewitɨni hetsiena mieme yuheyemekɨ,
'aixɨa ke'itɨarieka naime tukaritsie.
16 Naime kwieyaritsie tɨriku kexuaweni,
hɨritsie paitɨ ke'uwetuarɨkani tɨriku.
Riwanu hepaɨ 'uriyari ke'utipaɨmere,
manukuyari tupiriya 'ɨtsita mieme hepaɨ ke'utipaɨmere.
17 Kekuxaxatsiwani yuheyemekɨ,
tau hepaɨ kereutere ku'eriwatɨ.
Hetsiena mieme nuiwarite 'aixɨa mekeyuyurieka,
yunaitɨ mɨkɨ 'aixɨa mekete'ikɨhɨaweni.
18 Yawé Kakaɨyari 'aixɨa ketikɨhɨawarɨwani,
'Ixaheri Kakaɨyarieya,
muyuxewi xeikɨa mariweme mɨtiyuriene.
19 'Aixɨa keraniuwani hetsiena mieme yuheyemekɨ,
kemɨtimariwe ke'utahekɨatsieni naitsarie.
'Aixɨa pɨ'ane, 'aixɨa pɨ'ane.
20 Rawiri nenewierieya 'Itsahi nu'aya 'enapu'axe.