73
XAPA 3
Nɨawari 73-89
'Atsahapi nɨawarieya.
1 Yurikɨ, Kakaɨyari 'aixɨa pɨtiuka'iyari 'Ixaheri hetsɨa,
'iyari 'aixɨa mɨ'anene memexeiya wahetsɨa.
2 Ne nekanatiwenitɨma,
'etsiwatɨkaku nekanekaxikiuna.
3 Nepɨwarekahekatɨya newaruxeiyaka
'axateyuruwamete mete'ukaxexeiyakaku.
4 Mɨkɨ nitixaɨtɨkɨ mepɨkate'ukakukuine,
'aixɨa mepɨteheu'erie.
5 Hipatɨtɨma 'axamepɨkatewakumamateke,
hipame wahepaɨ mepɨkate'uka'eniwa.
6 Kememɨteyuti'ɨre kuka memakatɨtɨkani hepaɨ mepɨteyuxexeiya
kememɨtewananaima 'ixurikikɨ kememɨte'anuyuku'eima hepaɨ mepɨ'anene.
7 'Axamɨti'anekɨ mepɨhɨpɨne,
matsi paitɨ mepɨmatsiɨkɨ ke'axamemɨteyuriku.
8 Mepɨteyukatawe'erie, 'ayehutamekɨ meputiniuka,
meha'atɨ mepɨteyu'aitɨwa meta mepɨteyute'a.
9 Yuniukikɨ muyuawi hepaɨtsita 'axamepɨtiyuane,
yuniukikɨ kwiepa mepɨte'aita.
10 'Ayumieme wahetsɨa mepeta'axe teɨteri,
yuri mepɨtewa'eririe kememutiyuane.
11 'Atsita mɨpaɨ mekaniutiyuani: «¿Kekuta Kakaɨyari retimani?
¿Kamɨtsɨ 'Amutewi timaiwe?»
12 Mɨpaɨ mekani'aneni Kakaɨyari memɨka'ayexeiya,
tixaɨtɨkɨ mekateyu'iyaritɨatɨ, matsi waɨkawa metehexeiyatɨ mepakɨka.
13 Yurikɨ, ¿tita tiyunaki'erie
ne'iyari 'itiyakame nemayeitɨakakɨ,
meta nemamate 'atsimɨkatiyuruwanikɨ,
14 tukarikɨ netiweiwatɨ,
meta ximeri netiuka'enitsitɨariwatɨ?
15 Xɨka mɨpaɨ ne'utayɨnike: «Wahepaɨ nepɨtiuniukani»,
'anuiwarima nepuwakwamanakekai.
16 Kepauka nemɨtimaimɨkɨkai naime,
'ika nepukaxei neka'iwerime,
17 Kakaɨyari tukieyata neheutahakake,
muwa nepɨretima 'axateyuruwamete hakewa memeyehu:
18 Yurikɨ, 'ekɨ huye mɨxikiunitsie pepɨwara'uitɨa,
pepɨwaranataima memukumawerekɨ.
19 Yapauka mepeuyehɨiyani,
yemekɨ memariutsietɨ.
20 Xewitɨ tiheinɨtɨ manutaniere hepaɨ,
mɨpaɨ, kepauka Ti'aitame pemanukukeni,
mɨkɨ pepuwaratɨmaiyatsitɨani ke'axamemɨteyumate.
21 Ne'iyari puyuhiweriekai
nepɨkanewaɨriyakai,
22 'atsinekatimaitɨ.
Yeutanaka hepaɨ nepuyɨ 'ahepaɨtsita.
23 Ne matsi yuheyemekɨ 'ahamatɨa nepuyeika,
'ekɨtsɨ 'atseriekɨ pekaneniwiyani.
24 'A'ɨxatsikɨ pepɨnetsi'uwitɨxime,
'arike matsi witsi'aneme pepɨnetsi'ayeitɨani.
25 ¿Kemɨ'ane 'aku muyuawitsie nepexeiya metsɨ 'ekɨ xeikɨa?
Xɨka 'ahamatɨa ne'uyeikani, kwiepa timiemeri nepɨkareuyehɨwa.
26 Tsepa newaiyari mɨtimɨxime meta ne'iyari,
matsi Kakaɨyari ne'iyari pɨtseiriyani,
mɨkɨ nehetsiemieme xeikɨa kanihɨkɨtɨni yuheyemekɨ.
27 Mepɨkwini kemɨ'ane memɨmetsi'uku'eiri,
'ekɨ pepɨwaka'una 'ahetsie memɨkatewiya.
28 Matsi 'aixɨa pɨ'ane Kakaɨyari hamatɨa nemuyeikani 'ahurawa.
Yawé Ti'aitame nehetsie nunuwame
nepayeitɨa, naime wewiyaya nemɨtikuxatanikɨ.