78
'Atsahapi 'ɨkitɨarikaya.
1 Neteɨterima, ne'ɨkitɨarika xekene'enieka,
kenemaine xekene'enanaka.
2 Ne 'ɨxatsikɨ nepɨtitaxata,
meta meripaitɨ timieme tita 'atsimɨkatimatsiɨkɨkai,
3 tita temɨte'u'eni meta tita temɨtemate,
tapaapama memɨtate'utaxatɨa.
4 Tanuiwari tepɨkawati'awitsirieni,
'umemahu tepɨtewataxatɨani.
Yawé tɨrɨkariyaya meta mamariwaweme kemɨtiuyuri
meta witsiti'aneme kemɨtiuyuri.
5 Mɨkɨ 'aitsika putaxa Kakuwu hetsiemieme,
'aitsika putahekɨataxɨ 'Ixaheri hetsiemieme,
tatutsima pɨtiwaruta'aitɨa
yunuiwarima memɨtewata'ɨkitɨanikɨ,
6 memimaikakɨ nuiwarite 'umemahu
meta waniwema memɨtinunuiwa,
mɨkɨta yuniwema memɨtewati'ɨkitɨanikɨ.
7 'Ana mɨpaɨ Kakaɨyari hetsie metewiyatɨ memakɨnekɨ
meta kemɨtiuyuri memɨkahatɨtɨmaiyanikɨ,
matsi memeye'atɨwanikɨ 'aitsikateya.
8 Mɨpaɨ yututsima wahepaɨ memɨka'anenikɨ:
mɨkɨ nuiwari memɨkayukɨhɨawekai,
memɨka'u'iyarikai,
mɨkɨ yu'iyarikɨ Kakaɨyari hetsie memɨkatewiyakai.
9 'Epɨrahini nuiwarimama, yu'ɨrɨ me'utɨtɨ
mepuyuta'unaxɨ kepauka memuyutakwitsie.
10 Mɨkɨ Kakaɨyari wahamatɨa tɨratu kemɨtiuwewiekai mepɨkaheye'atɨa,
matsi pɨta mepiku'eiri 'aitsikateya.
11 Mepetɨmai kemɨtiuyuri,
mariweme wahɨxie kemɨtiuwewi,
12 wapaapama wahɨxie mariweme kemɨtiuyuri,
'Ekipitutsie Tsuhani kwieyaritsie.
13 Haramara hixɨapa puhuyetaxɨ mana memukɨnekɨ,
haa pɨti'ukai 'ixumeri hepaɨ peutiheitseriekai.
14 Tukarikɨ haiwitɨri puwaruwitɨximekai,
tɨkarikɨta taikɨ pɨwahekɨariwiyakai.
15 Makumawetsie 'ai hixɨapa puxite,
pɨwaruharitɨa haa kwinimieme tiuhaneme,
16 'aitsie haa panetɨa haa 'aki'utɨma mieme hepaɨ,
haa panetɨa hatɨa mieme hepaɨ.
17 Peru tawarita hepaɨtsitana 'axamepɨte'uyuri,
makumawetsie Kakaɨyari 'Amutewi mepaye'uniekai.
18 Naimekɨ Kakaɨyari meputa'inɨataxɨ,
'ikwai mepitawawiri tita memɨteheukwaikukai.
19 Niuki mepɨxɨatɨakai Kakaɨyari hepaɨtsita, matsi 'akuxi mɨpaɨ meputiyua:
«¿Kakaɨyari kamɨtsɨ tiyɨwe mexa makumawetsie mutakeni tatiminike?
20 Kepauka tete muwatsie,
haa kwinie panetɨya tɨrɨkaɨyetɨ,
perutsɨ ¿'ikwai tatiumiwe tsiere?,
¿yuteɨterima wai tsɨkamɨ tiwarumiwe?»
21 Yawé kepauka mɨkɨ mɨtiu'eni, waɨkawa kaniuyeha'ani,
puyeha'a Kakuwu hepaɨtsita,
puyeha'a 'Ixaheri hepaɨtsita.
22 Kakaɨyari hetsie memɨkate'uwikɨ,
yuri memɨkate'eriekaikɨ kename mɨkɨ watawikweitsitɨani.
23 Meutitewatsie paitɨ haiwitɨri mɨpaɨ katiniuta'aitɨani,
hikɨ muyuawitsie katineuyepiere.
24 Manana mɨkawiyekɨ yatiniuyurieni memɨtekwanikɨ,
hatsi muyuawitsie mieme kaniwarumini.
25 Yunaitɨ mɨkɨ niukituayamete wa'ikwai mekaniutikwani,
Kakaɨyari 'ikwai kaniwareyenɨ'airieni kaniwarutihuxaitɨani.
26 Kakaɨyari 'eka tɨrɨkaɨyeme kaniuyuitɨani tau manatineikatsie,
yutɨrɨkariyakɨ 'eka tatsutɨa mieme kanewatihana.
27 'Eka tumuanari kemɨtiukawiwiwa, mɨpaɨ wai katiniukawiwieni,
wikixi haiwitɨriyari kaniwa'atɨirieni, xiekari hepaɨ mepɨteyuxexeiyakai.
28 Mematitekai wahixɨapa kaniwarukaxɨrieni
meta waxamaru 'aurie.
29 Meteniukwani wa'iyaritsie katineuyeyani,
Kakaɨyari katiniwaraye'atɨirieni kememutiyua.
30 Peru waheiwe'erika 'apɨkareuterixɨ:
'ikwai yuteta 'akuxi mepayeyekai,
31 kepauka Kakaɨyari haxɨaya wahetsie munua:
'ukitsi waɨkawa memɨtɨrɨkawi kaniwarukwini,
temari 'ixaheritsixi 'aixɨa memɨ'anene kaniwarukwini.
32 Mɨyamete'anuyekɨnekatɨtɨ,
yaxeikɨa 'axamekateniyuriekaitɨni
yuri mekapɨte'uta'eri mariweme kemɨtiyurienekai.
33 'Ayumieme, Kakaɨyari watukari
'etsitewime kanayeitɨani xei'itukariyari hepaɨ,
watukari waɨkawa mematimariutsiwatsie kanitixɨrɨweni.
34 Kepauka Kakaɨyari muwaku'uximatɨwakai, mɨkɨta 'anake mekanitiwawakaitɨni,
meyuwaɨriyatɨ tawarita mekani'axekaitɨni hetsɨana.
35 Mekanaye'eriwakaitɨni kename Kakaɨyari wa'ai hɨkɨ,
kename Kakaɨyari 'Amutewi wawikweitsitɨwame hɨkɨ.
36 Peru 'arike yutetakɨ mekanikwamanakaitɨni,
yunenikɨ mekani'itakaitɨni.
37 Yu'iyarikɨ Kakaɨyari mepɨka'ayexeiyakai,
yamepɨkatekakɨ tɨratuya kemainekai.
38 Hikɨ mɨkɨ puwarutinenimayataxɨ, wakwewietɨ,
pɨtiwareuyehɨwiri 'axakememɨte'uyuri,
pɨkawaruka'unaxɨ.
Mɨixa pɨka'uyeha'a pɨyunɨtɨakai,
pɨtinewakai kemɨtiyɨanekai pɨkaha'akai.
39 Paye'eri kename tixaɨtɨ mekatehɨkɨtɨkai mekwiwawekai,
'etsiwa xeikɨa yamɨreutetere 'eka hepaɨ tawarita pɨkanuani.
40 Mɨixa me'eye'unietɨ mepakɨ makumawetsie
mepinutuitaxɨ yemekɨ makuwakitsie.
41 Kakaɨyari yamepɨte'inɨatatɨwekai,
Mɨpatsie 'Ixaheri hetsiemieme mepɨhaxɨatɨakai.
42 Mepɨkaheye'eri kemɨtitɨrɨkaɨyekai,
kemɨtiwaruwitɨ me'uximatɨariekaku,
43 'Ekipitu mariwemekɨ kemɨtiuyuri,
meta kemɨtiuyuri yutɨrɨkariyakɨ Tsuhani kwieyaritsie,
44 kepauka haa 'Ekipitu mieme xuriya mayeitɨa
mepɨkayɨwawekai memɨtihareni 'aki'utɨma,
45 kepauka nakatarixi mɨwarenɨ'a memɨwatikenikɨ,
meta temutsi memɨwaka'unakɨ,
46 kepauka 'utsikari wawaxata mɨwarenɨ'a,
'utsikari memuyuwaɨkawa wa'etsita memɨte'ukaxɨ,
47 kepauka tee wakaxie nanari mutituaxixɨ
meta xapa 'iteɨriyari 'ɨwi mitiwatsiɨxaxɨ,
48 kepauka tee tewaxi mɨwarukwi,
meta muxatsi mimierɨkarikɨ,
49 kepauka wahetsɨa yuhaxɨa meutahɨa,
ha'atɨ, kawanenimayatɨ, waraye'unietɨ:
kuyaxi niuki tuayamete teyu'unamete pɨwarenɨ'a.
50 Yuhaxɨa kaniutatuani,
pɨkawarutawikweitsitɨa mɨkitsata,
matsi pɨwayetua kwiniya tsata.
51 Tɨɨri yunaime pɨwarukwi mexɨakate 'Ekipitutsie,
matɨari miemete Kami memakutekaitsie.
52 Yuteɨterima pɨware'ari muxatsi wahepaɨ,
makumawetsie pɨwarewitɨ, muxatsi wahepaɨ,
53 tiwa'ɨkitɨatɨ hetsiena memɨtewiyanikɨ memɨkaheumamakakɨ.
Peru memɨwaraye'uniekai haramarakɨ kaniwaranukanani.
54 Yuteɨterima kwie mɨpatsietsie kaniwa'atɨani,
'ikɨ hɨri yutseriekɨ me'iwaxɨ.
55 'Ixaheritsixi wahetsiemieme nuiwarite kaniwarayeweiya,
mɨkɨ kwie yuteɨterima kaniwayetuirieni,
memɨwayetekaitsieta 'ixaheritsixi kaniwareutayatsa.
56 Peru mɨkɨ Kakaɨyari mekaniuta'inɨata:
Mɨmariwe me'aye'unietɨ mekanakɨne
'aitsikateya mepɨka'anu'eni.
57 Heitserie mepɨka'u'uwakai 'axamepɨte'u'iyarikai,
yupaapama wahepaɨ,
'axamepɨte'u'iyarikai watupi mututuni hepaɨ mepɨ'anenekai.
58 Mekaniyehaxɨatɨani tukite 'etsimupepe memutiwewikɨ,
mamakɨ wewiyakate memuwarayexeiyakaikɨ.
59 Kakaɨyari retimaika waɨkawa kaniuyeha'ani,
mɨkɨkɨ 'ixaheritsixi kaniwaruku'eirieni.
60 Tuki Tsiru muwekai kaniuku'eirieni,
tukieya manuwekai 'ena kwiepa,
61 memɨwaraye'unie kaniwarupitɨani tɨrɨkariyaya witsimɨ'ane memanukwenikɨ.
62 Kwinimieme pɨtiuyeha'a yuteuterima wahetsiemieme,
hipame 'ixiparakɨ memɨwakwinikɨ kaniwarupitɨani.
63 Temari taikɨ mekaniukwi'iwa,
kwikari 'ukari mematiwikiwa wahetsiemieme pukumawerixɨ,
64 mawari wewiwamete 'ixiparakɨ mepukwi'iwaxɨ,
wiuraxi mepɨka'uyɨwekaxɨa wahetsiemieme memuyuhiwerieka.
65 Hikɨ 'ana Ti'aitame kananutaniere,
tiheinɨtɨ xewitɨ manutaniere hepaɨ,
yumemiwame winukɨ kwinimieme mɨtiuhiwa hepaɨ.
66 Memɨwaraye'uniekai mema'iwarienikɨ yakatiniuyurieni,
memɨyutitetewiyakɨ yuheyemekɨ yakatiniuyurieni.
67 Kutse niwemama kaniwarexɨrieni,
'Epɨrahini xiɨyarimama pɨkawaranayexei,
68 matsi pɨta, Kura nuiwarimama pɨwaranayexei,
meta Tsiyuni hɨriyari mɨnaki'erie.
69 Yutuki kaniutawewieni, heutitewame muyuawi hepaɨ,
kwie hepaɨ, ke'aixɨa miyuri yuheyemekɨ.
70 Rawiri tiyu'uximayatsiriwame kananayexeiya,
muxatsi mɨwahɨwemetɨkai,
71 kaninawairieni muxatsi wa'arɨwame mɨhɨkɨtɨkai,
Kakuwu hɨwemeya mayanikɨ meta teɨterimama,
'ixaheritsixi wahɨweme hetsɨana miemete.
72 Rawiri yu'iyarikɨ kaniwarutahɨni,
timaiwetɨ kaniwaku'arienekaitɨni.