79
'Atsahapi nɨawarieya.
1 Kakaɨyari 'aku, teɨteri memɨka'ahetsɨa miemete mepɨtatsi'unawairi tita pemɨtatiyetuiriekai,
'atuki mɨpatsie kapatsiekame mepayeitɨa,
Kerutsareme 'unime mepayeitɨa.
2 'Ateɨterima wakaxari
wirɨkɨxi wa'ikwai mepɨwarayeitɨa,
yamemɨtekahu wawaiyari
yeutari wa'ikwai katinayani.
3 Naitsarie Kerutsaremetsie xuriya meputayeuri,
haa memutayeurieni hepaɨ,
meta mɨkite muwakateuku kaniumaweni.
4 Ta'aurie kiekatari tahetsiemieme niuki mekaniwewieka,
tame tekanihɨkɨtɨni 'atsieriwamete ta'aurie memahane wahetsiemieme.
5 ¿Yawé, kepaukake tamɨ?
¿Kamɨtsɨ 'aheyemekɨ petiha'aka?
¿'Ahaxɨa kamɨtsɨ tai hepaɨ tiutataweni?
6 Keniwaruyeheka 'iya nuiwarite memɨkametsimatekɨ,
te'aitamete memɨkametsihahɨawekɨ.
7 Neuxei Kakuwu kaniutakwaiyani,
meta mɨkɨ kwieyari 'unime mekanayeitɨani.
8 Meripaitɨ ke'axatemɨte'uyuri kenatɨmaiya,
yapauka ketaneutinenimayata,
neuxei tame tekaniyumuinani.
9 Xɨa'ui Kakaɨyari, tatsiwikweitsitɨwame,
mariweme pemɨtiyuriwe kepemɨtitewakɨ, ketaneuparewi,
'aixɨa pemɨtiuka'iyarikɨ, ketaneɨxɨna 'axatemɨte'uyurikɨ ketatineuyehɨwiri.
10 Neuxei nuiwarite mɨpaɨ mekanitiyuakuni:
«¿Tamɨri hakewa wakakaɨyari?»
Ketaneuxeiyatsitɨa, teɨteri 'ahetsɨa memɨkamiemete
wahɨxie yaketiniwarakapitɨa, 'ateɨterima waxuriya memutayeurikɨ mɨpaɨ keniwaruyuri 'ekɨta.
11 'Ahetsɨa paitɨ keheye'ani
memehapanie watsuari,
'atɨrɨkariyakɨ
memɨkwi'iwa keniwarutawikweitsitɨa.
12 Ti'aitame, ta'aurie kiekatari
'atahutamexɨa ketiniwarakapitɨa
'axamemutiyuakɨ 'ahepaɨtsita.
13 Tameta, 'ateɨterima meta 'amuxatsima 'akuraruta miemete,
tepɨmetsinɨawani yuheyemekɨ,
nuiwarite memanuyekɨka nuiwarite memanuyekɨka
kwikari 'ahetsiemieme teputikwikani.