80
Teyuitɨwamete wa'ukiyari. Yuariyaya xekeneuweiyani «Tuturi tɨratuyari». 'Atsahapi nɨawarieya.
1 'Ixaheri hɨweme,
'ekɨ kutse pemuwitɨxime muxatsi wahepaɨ,
'ekɨ metsiteɨtamete watsata pe'atikaitɨ,
ketaneu'eni.
Keneuxawatɨxɨa 2 'Epɨrahini hɨxie,
Wenikamini meta Manatsexi wahɨxie.
Keneuhekɨata 'atɨrɨkariya, kenenua ketaneutawikweitsitɨa.
3 Xɨa'ui, Kakaɨyari, 'aixɨa ketaneuyuri,
'aixɨa ketatineuxeiya,
ketaneutawikweitsitɨa.
4 ¿Kepaukake tamɨ pepɨtihayewa peha'atɨ Yawé Kakaɨyari
Naimekɨmɨtɨrɨkaɨye, 'ateɨterima wanenewieri hepaɨtsita?
5 'Ikwai petatsiminike hiwerika pepɨtatsi'upitɨa temiti'ienikɨ,
memɨte'iekai wahetsiemieme, waɨkawa wa'ukai pepɨwayetuirie memiti'ienikɨ.
6 Ta'aurie kiekatari memɨtatsi'atsenikɨ
yapepɨtatsi'uyuri,
memɨtatsi'aye'unie mepɨtatsiyuriya.
7 Kakaɨyari Naimekɨmɨtɨrɨkaɨye 'aixɨa ketaneuyuri,
'aixɨa ketatineuxeiya,
ketaneutawikweitsitɨa.
8 'Ekipitu paitɨ xeime kaxie pepeyetui,
memɨka'ateɨterima pewarutaweiyaka, mana pepikaye.
9 Kwiepa 'aixɨa pemɨrakuyuritsie,
mana kanananataxɨani hikɨ kwiepa waɨkawa kaniutaxiɨni.
10 'Etɨriyaya hɨritetsie paitɨ pepuye'atɨatɨya,
kɨtsimeyari yunaime kariuxa 'amutɨtɨ pɨwara'iwakai.
11 Xawarieya haramaratsie paitɨ kaneuta'axɨani,
muwatiyɨraxɨa 'Eupɨrata paitɨ kaneuta'ani.
12 ¿Titayari kuraruya petiuka'unaxɨ?
Yunaitɨ mana memuyekɨka 'iteɨrieya kaxie mekanika'inɨweni.
13 Tuixuri yeutari mekanikumaweriyarɨmeni,
yeutari mekanikwaka.
14 Xɨa'ui Kakaɨyari, Naimekɨmɨtɨrɨkaɨye tahetsɨa kenenua.
Muyuawitsie paitɨ kenakanieri
'ikɨ kaxie kene'ɨwiyani.
15 'Atseriekɨ nanari pemukaye kanihɨhɨtɨni.
Mɨkɨ hekwamekɨ matiyɨraxɨ 'ahetsiemieme pɨhɨkɨ.
16 'Akaxie nanayari kaniuka'unarieni, taikɨ kaniutataiyarieni,
'atierikakɨ 'ateɨterima mepɨte'uka'eniwa.
17 Keneuparewi tewi pemanayexei,
'aniwe 'ahetsiemieme pemitaweriyaxɨ.
18 Tame tepɨkametsiku'eirieni,
ketananutanieritɨa, 'ana tepɨmetsihahɨaweni.
19 Yawé Kakaɨyari Naimekɨmɨtɨrɨkaɨye, 'aixɨa ketaneuyuri,
'aixɨa ketatineuxeiya,
ketaneutawikweitsitɨa.