104
1 Ne'iyarikɨ Yawé nepɨnɨawani.
Yawé nekakaɨyari, 'ekɨ pepɨmariwe,
witsi'aneme pepanakatɨ ti'aitame kamixaya.
2 Xawatɨmekɨ pekaneuyukunaka 'ixuriki tuxamekɨ hepaɨ,
muyuawi peputaweraxɨ 'ixuriki hepaɨ.
3 Haiwitɨritsie 'akii 'amɨpapa peputiwewi
meta hai 'akaxeta kuyaxa mieme pepayeitɨwa.
'Ekɨ pekananutiyeixani 'eka 'anateyatsie.
4 'Eka 'aniuki tuayamete pepɨwarayeitɨwa,
meta mimierika mepɨmate'uximayatsirie.
5 'Ekɨ kwie pekaniukamani tsutɨmeyaritsie,
hikɨ mana hatsuaku pɨkahewatayuani,
6 haramarakɨ pepitikemaritɨa,
meta haa hɨritsie puyuhayewaxɨ.
7 Peru 'ekɨ pewarutatieku haa mepekɨ,
'aniuki yuariyaya me'u'enieka meputinautsaxɨ.
8 Hɨritsie mekanitiyune,
mayeweweritsie kaniu'axɨani,
hakewa 'ekɨ pemɨwaretanɨ'a.
9 Hakewa memeuye'atɨkani pepɨwaru'inɨaritɨa memɨka'anuyekɨkanikɨ,
tawarita hatsuaku kwie naime mepɨka'anukanani.
10 'Ekɨ pekatiniyurieneni haixa
haa muhapanenikɨ hɨritsie mayeweweritsie,
meta yeuta muxuawenikɨ.
11 Mɨkɨtsie yunaitɨ yeutari meputihareweni,
muwa puxuri yeutari witsimekatenihareka.
12 Taheima memu'uwa wikixi mekaniyu'ituatɨaka haa 'aurie
meta mekaniutikwikani kɨyexi xawaritsata.
13 Taheima 'akie paitɨtɨ hɨrite pepɨhatuiya,
kwie 'a'uximayatsikakɨ 'aixɨa pɨreu'erie.
14 Tupiriya pepɨyɨratɨa tewaxi wahetsiemieme,
meta 'iteɨrite teɨteri memika'etsa
kwiepa timieme yu'ikwai memɨtehexeiyanikɨ:
15 kaxie winuyari 'iyari mɨtemawieritɨawe,
hatseiti meta yuhɨxie mieme mayemerɨkaɨyenikɨ,
meta 'ikwai memayenenierenikɨ.
16 Yawé kɨyexiteya 'aixɨa katinehatuiyarieka,
kariuxa kɨyeyari Riwanu paitɨ mika'e.
17 Mɨkɨtsie wikixi mepuyu'ituatɨa,
huku 'amutɨtɨtsie kwaxuri 'amemɨnene mekaniyukitɨaka.
18 Hɨri 'amanutitɨtɨtsie tsipuri yeutari mekaniu'uwani,
meta 'aita mekaneixeiyani yu'awiwietame haitsɨrixi.
19 'Ekɨ metsa pekaniutawewieni, mi'inɨatanikɨ xeimetseri hetsiemieme.
Metatsiere tau, mɨtimate kepauka makayuyuipike.
20 'Ekɨ yɨriya pekani'atɨwani, kani'axeni,
hikɨ mɨkɨ tɨkaritsie yutawima memɨteku'uwa yeutari mekanewayekɨkani.
21 Mayetsi mepuyutihaxɨatɨwa, yu'ikwai meha'iwawatɨ,
Kakaɨyari mewawirietɨ wa'ikwai mɨwaminikɨ.
22 Peru kepauka tau manatineikatsie mekanitakɨkani mekayuhekɨatakutɨ,
yuterɨta mekaneutahakeni.
23 Hikɨ teɨteri mekanayekɨkani yu'uximayatsika menɨnike,
meteta'uximayatake kepaukake mɨkɨyɨre.
24 Yawé 'aku, pɨtimɨire tita pemɨtiutiwewi.
Mɨkɨ tinaime pepɨtiutiwewi petimaiwetɨ.
Kwiepa kemakuyewa mekanihɨneni pemɨtiwarutiwewi.
25 Mana haramara kaniyemaka, 'a'atayeutɨ hawaikɨ kaheu'atɨ,
hetsiena memɨtexuawe meteyumɨiretɨ, 'amemɨtepapa meta 'etsimemɨtepepe,
kememɨteyupaɨme pɨkayɨwe mɨwaruti'inɨata.
26 Mana kanuwate 'amɨpapa kaniye'uwani meta mana kanikuyuaneni Rewiyatahini mɨmariwe,
'ekɨ pemitawewi hamatɨana pemɨwaikanenikɨ.
27 Mɨkɨ yunaitɨ mekanita'ikwewani 'ahetsie
pemɨtiwaminikɨ kepauka memɨtekwa'a.
28 'Ekɨ pepɨtiwayetuirie, mɨkɨta mepuka'itsana,
kepauka 'amamakɨ pemɨtiwamikwa, mɨkɨ waɨkawa metehexeiyatɨ mepakɨka.
29 Xɨka pewaruhayewa, meputimamawe,
xɨka wa'iiya pewarunawairieni mepɨtakukuwe meta tumuanari mepakɨka.
30 Xɨka 'a'iiya pehanɨ'ani, tawarita mepɨtixuawere,
meta mɨpaɨ kwie naitɨ puyuhekwatɨani.
31 Yawé kepemɨtimariwe yuheyemekɨ mɨpaɨ peke'aneni,
Yawé keyutemawieritɨaka tita mɨtiutawewi hetsiemieme.
32 Mɨkɨ kwie kanixeiyani meta kanitayuitɨwani,
hɨri kanikumaɨwani meta kɨtsi kaniwatinenetɨwani.
33 Yawé nenɨawatɨ nepayani kenemɨreutere,
nekakaɨyari nɨawarieya neputikwikani mexi 'akuxi ne'ayeniereni.
34 Keyutemawieka kenemɨtiku'eriwakɨ,
netsitɨ, nekaniyutemawieka Yawé hetsiemieme.
35 'Axateyuruwamete kwiepa meke'akumawere,
tawariri mepɨka'u'uwani.
Ne'iyarikɨ Yawé nepɨmetsinɨawani.
Yawé kenɨawarieka.