105
(Nɨa 105:1-15 – 1Kem 16:8-22)
1 Pamɨpariyutsi Yawé xekenepitɨaka, mɨkɨ xekenahɨaweni,
yunaime nuiwarite wahetsɨa 'uximayatsikaya xekenehekɨatani.
2 Xekenekwikani, nɨawarieyakɨ xekeneyutemamawieka,
naime mariweme kemɨtiuyuri mɨkɨ xeketenekuxatani.
3 Yemekɨ xekeneuyuti'ɨreni patsiekamekɨ kemɨtitewakɨ hetsiemieme,
Yawé memɨkuwautɨwe wa'iyari keyutemamawieka.
4 'Ahurawa xekeneɨkɨni Yawé hetsɨa meta tɨrɨkariyaya hetsɨa,
xepɨkatehayewani xe'ikuwaɨtɨwetɨ.
5 Xekenaye'eriwani mariwemekɨ kemɨtiuyuri,
'inɨari kemɨtiuwewi, meta 'aitsika ke'aneneme mɨyetua.
6 Xeme, 'Apɨrahami xiɨyarimama, mɨkɨ Kakaɨyari ti'uximayatsiriwame.
Xeme, Kakuwu niwemama, Kakaɨyari mɨxe'anayexei.
7 Mɨkɨ Yawé kanihɨkɨtɨni, tame takakaɨyari,
'ena kwiepa naitsarie 'aitsikaya kanixuaweni.
8 Mɨkɨ yutɨratu yuheyemekɨ pa'eriwa,
kemutayɨ yuniukikɨ xeimiriyari nuiwariyari wahetsiemieme.
9 Mɨkɨ kanihɨkɨtɨni tɨratu 'Apɨrahami hamatɨa muwewi,
'Itsahaki hamatɨa kemɨtiuyuhɨritɨa.
10 Kakuwu yakatiniutahɨawe 'aitsika kaneyeitɨirieni,
'Ixaheritsixi wahetsiemieme tɨratu yuheyeme mieme kanayeitɨani,
11 kepauka mɨpaɨ mutayɨ: «Kanani kwieyari nekameniyetuiriemɨkɨ,
piinitɨarika 'ahetsie mɨtinakenikɨ».
12 Kepauka 'akuxi temɨkayumuirekai,
teewanarixi tekanihɨkɨtɨkaitɨni yakɨ teyupaɨmetɨ mɨkɨ kwieyatsie,
13 ku'uwamete mekanihɨkɨtɨkaitɨni tsepa kemɨ'ane kwieyaritsie,
meta tsepa kemɨ'ane te'aitamete wahetsɨa,
14 xeime pɨka'upitɨa waɨriyarika mɨtiwata'aitɨanikɨ,
matsi wahetsiemieme te'aitamete kaniwarutatieni:
15 «Neteɨterima nemuwaranayexei xepɨkawa'uximatɨaka,
Neniukamete xepɨkatewakwinitɨaka».
16 Kakaɨyari haakaxa kanayeitɨani mɨkɨ kwieyaritsie
tɨriku kaneuyehɨani naime.
17 Peru mɨkɨ wahɨxie xeime kanenɨ'ani:
Kutse titewakame, waɨriyarika ti'uximayatame hepaɨ kaniutuiyani.
18 'Ɨkateyatsie tepɨa mepeiwɨtɨiriexɨa,
panutahɨiyakai yukɨipitɨa tepɨa patekakai.
19 Kepaukake maye'a kemutayɨ kemɨtiyɨnikekai,
'ana Yawé niukieya matsiɨkɨtɨ patɨa kename yuritɨkai.
20 'Ana ti'aitame katiniuta'aita mɨxɨnarienikɨ,
teɨteri mɨtiwa'aitɨakai kaniwayeyepieni.
21 Ti'aitame kaneyeitɨani yukie naime hepaɨtsita
meta tita mɨrexeiyakai katinihɨritɨani,
22 kanipitɨani mana kemɨ'ane memɨmexɨakate mɨtiwati'ɨkitɨanikɨ,
meta kemɨtimaiwekai 'ukirawetsixi mɨtiwakuxaxatɨwanikɨ.
23 Hikɨ 'Ixaheri 'Ekipitu paitɨ kaninuani,
Kakuwu teewatanaka pɨhɨkɨtɨkai Kami kwieyatsie.
24 Yawé yapɨtiuyuri memɨtamɨirekɨ teɨterimama
yumɨireme pɨwarayeitɨa, memeye'uniekai matsi mepɨkayumɨirekai,
25 'ayumieme mepɨwaruyehekaxɨ teɨterimama
meta te'i'uximayatsiriwamete mewananaimatɨ mepakɨ.
26 Hikɨ kaniwarutanɨ'ani Muitsexi
meta 'Aruni, mɨkɨ muwaranayexei,
27 mɨkɨ 'inɨari mepuwewi watsata,
mariweme mepɨte'uyuri Kami kwieyaritsie.
28 Yɨriya wahetsɨa kanenɨ'ani, mɨkɨ kwieyaritsie kanakuyɨre,
peru mɨkɨ niukieya mepɨka'u'eni.
29 Haa wahetsɨa mieme xuriya payeitɨa
tsapari meta mekaniukwini.
30 Naitɨ 'Ekipitu kwieyaritsie temutsi mekaniutaweni,
te'aitamete wakiita paitɨ mepuxuawekai.
31 Kepauka Kakaɨyari mutaniu, naitsarie mɨkɨ kwieyaritsie meputixuawerixɨ,
nakatarixi meyumɨiretɨ meta xaipɨtsi memɨteyukewe.
32 Wiyeri tee wiyeriyari pɨta kanayeitɨani,
meta mimierɨkari waɨkawa mɨkɨ kwieyaritsie kanenɨ'ani,
33 naime kaxie haraweriyari kaniumura meta piní haraweriyari,
naitsarie mɨkɨ kwieyaritsie kɨyexi katiniumure.
34 Kakaɨyari kepauka yamutayɨ, mekaniu'axɨani 'utsikari,
mekayu'inɨatsinɨatɨ.
35 Tinaime mekateniutikwani tupiriya yɨrariyari xawariyari mɨkɨ kwieyaritsie,
'etsaripa 'ikwaxi naime mekateneukuxɨxɨani.
36 Kaniwarukwini yunaime tɨɨri mexɨakate mɨkɨ kwieyaritsie miemete,
tɨɨri 'aixɨa memɨ'anene mekaniukwini.
37 'Ixaheritsixi kaniwarayewitɨni huru me'utɨkɨme meta pɨrata,
yunaitɨ mɨkɨ xiɨyari xewitɨ tɨma pɨkahekawe.
38 'Ekipitutari mepuyukatemamawi kepauka memayekɨ,
memɨwamakaxekaikɨ 'ixaheritsixi.
39 Yawé haiwitɨrikɨ kaniwa'etɨriwiyakaitɨni,
meta taikɨ yɨwikɨta kaniwahekɨariwiyakaitɨni.
40 Kepauka 'ikwai memuta'iwau, mɨkɨ xɨ'aurixi kaniwareyenɨ'airieni,
'ikwai muyuawitsie miemekɨ kaniwarutihuxaitɨani.
41 'Ai kaneuyepieni, 'ana haa kananeni
makumawetsie kaniuhanekaitɨni hatɨa hepaɨ.
42 Kakaɨyari yutɨratu mɨpatsie pɨkahatɨmai,
'Apɨrahami mɨti'uximayatsiriwame hamatɨa miwewi.
43 Yuteɨterima kaniwarayewitɨni, muwaranayexei,
waɨkawa temawierimakamekɨ meta temawierima me'utihiwame.
44 Kaniwayetuirieni nuiwarite wakwietɨkai,
tita mana teɨteri memɨte'uka'etsakai wapiini pɨratɨa,
45 para yukakaɨyari 'aitsikaya memayexeiyanikɨ
meta mɨpaɨ memɨte'u'uwanikɨ kemaitɨka.
Yawé kenɨawarieka.