106
(Nɨa 106:1, 47-48 – 1Kem 16:34-36)
1 Yawé kenɨawarieka.
Pamɨpariyutsi xekenepitɨaka Yawé,
mɨkɨ 'aixɨa mɨtiuka'iyarikɨ,
naki'eriyaya mɨwaɨkawa hawaikɨ pɨkaheu'axe.
2 Xewitɨ pɨkayɨwe yemekɨ mikuxatanikɨ Yawé mariweme kemɨtiuyuri,
yatɨni pɨkayɨwe minɨawanikɨ yemekɨ kemɨreuyewetse.
3 'Aixɨa meke'itɨarieka heitserie 'aixɨa memɨteyurie
meta yuheyemekɨ kemɨtinake memɨteyurie.
4 Yawé, kenenaye'eri, kepauka pemɨwatinenimayata 'ateɨterima,
kenaye'a kepauka tukari pemaye'atɨani wikweitsitɨarika pemɨtixuawitɨani.
5 Keneneupitɨa 'ateɨterima wahamatɨa nemuyeikani 'aixɨa 'iyari pemɨwapitɨanitsie,
keneneupitɨa 'ateɨterima memuyutemamawiekatsie neta nemɨnetemawiekakɨ,
meta nemɨmetsinɨawanikɨ pemɨwaranayexei wahamatɨa.
6 'Axatepɨte'uyuri, yaxeikɨa tapaapama wahepaɨ,
'axatepɨte'uyuri meta 'axamɨti'ane waɨkawa tepɨte'uyuri.
7 Kepauka tapaapama 'Ekipitu memɨtitekatsie,
mariwemekɨ kepemɨtiuyuri hetsiena yuri mepɨkate'uta'eri,
ke'aixɨa pemɨtiuka'iyari 'aheyemekɨ mɨpaɨ mepɨkatehetima
meta Haramara Mɨxeta tetsita mepuyeha'a.
8 Peru Kakaɨyari pɨwarutawikweitsitɨa, yuhetsiemieme mariweme mayuyeitɨanikɨ,
yutɨrɨkariya matsiɨkɨme mayeitɨanikɨ.
9 Haramara Mɨxeta kaniutatieni, hikɨ mɨkɨ kanakawani,
mana haramara 'amatiyewatsie kaniwaruwitɨtɨyani
makumawetsie memɨkɨne hepaɨ.
10 Kaniwarutawikweitsitɨani memɨwaraye'unie wahepaɨtsita,
kemɨ'ane memɨwaxani'eriekai wahepaɨtsita.
11 Memɨwaraye'uniekai haa waheima kaniuyeurieni,
mɨkɨ xewitɨ tɨma pɨka'utawikwei.
12 Hikɨ 'ana tapaapama niukitsie yuri mepɨte'uta'eri
meta nɨawari hetsienamieme meputakwikaxɨ.
13 Peru yapauka mekatenatɨmaiya kemɨtiuyuri
meta meta'ikwewatɨ mepɨka'akɨ kemɨtiwarahɨawekai.
14 Makumawetsie kemɨtiwanake meteyurietɨ mepu'uwakai,
yemekɨ makumawetsie me'u'uwatɨ Kakaɨyari mekaniuta'inɨata.
15 Mɨkɨta tita memɨte'itawawiri katiniwayetuirieni,
peru kwiniyata kaniwarenɨ'airieni tiyumemiwame.
16 Makumawetsie metitetɨ Muitsexi mekaniutiniukimatɨkɨne
meta 'Aruni, mɨpatsiekai Yawé hetsiemieme.
17 Kwie kanewatiyepiere hikɨ 'ana Ratani kaneukakwani,
meta kaniwareukateuku 'Awirani memaweiyakai.
18 Mɨkɨ mɨyamemɨyupaɨmekai tai kaniwarutixɨtsitɨani,
mekaniutitani 'axateyuruwamete.
19 Huré hɨriyaritɨa me'u'axɨaka tsikeru mekaniutawewieni,
kakaɨyari wewiyakame hɨxie mekaniukatunuma'uni.
20 Kakaɨyari waɨkawa watemawieritɨakaku mepiku'eiri,
tuuru pɨta 'ɨkiyaya mepanukuwei tupiriya mukwa'a.
21 Kakaɨyari mekanatɨmaiya muwarutawikweitsitɨa
meta waɨkawa mamariwaweme mɨtiuyuri 'Ekipitu kwieyaritsie:
22 mariweme katiniuyurieni Kami kwieyaritsie
metatsiere Haramara Mɨxeta tetsita.
23 Kakaɨyari mɨpaɨ putayɨ kename wakwinikekai
peru mɨpaɨ pɨkatiuyuri Muitsexi hetsiemieme menayexei,
hɨxiena kaniukeni huyetana
meta pɨka'ipitɨa ha'atɨ mɨwaka'unakɨ.
24 Kwie witsimɨ'ane mepɨka'utanaki'eri,
Kakaɨyari kemɨtiwakɨhɨawekai yuri mepɨkate'ita'eriri.
25 Yu'ixuriki xamaruyarita me'ayetetɨkaitɨ 'axamekateniutixatatɨkɨne
meta Yawé mepɨka'anu'eni.
26 'Ayumieme, mɨkɨ mɨpaɨ putayɨ wahepaɨtsita,
makumawetsie kename wakwinikekai,
27 waniwemata hipame nuiwarite watsata wakaxɨrienikekai
meta naitsarie kwiepa wataxɨriexɨanikekai.
28 Mekaniyuyetuani kakaɨyari Wahari-Pehuxi hetsɨa
meta kakaɨyarixi memɨka'ayeneniere wamawarika mepɨte'utikwai.
29 Mɨkɨkɨ Yawé mepuyehaxɨatɨa 'axameteyurietɨ,
hikɨ wahetsie kaninuani kwiniya.
30 Peru Pinexi wahetsiemieme 'aixɨa pɨtiuyuri,
'ana kwiniya paunua wahetsɨa pɨkaye'a.
31 Mɨkɨ kemɨtiuyuri 'aixɨa mɨtiuka'iyari payeitɨarie
yuheyemekɨ, hikɨ 'enamɨtiyehane 'aixɨa ketikuxaxatsiwani.
32 Haa manakaxɨrɨwe Meriwa 'aurie Yawé mekaniuyehaxɨatɨani,
mɨkɨ mɨyamemɨte'uyurikɨ Muitsexi hetsie pɨrahui.
33 Waɨkawa me'ihaxɨatɨakaku mɨkɨ kaniutaniuni,
kahayu'eriwatɨ kemutainekai.
34 Mepɨkawaruka'unaxɨ hipame teɨteri
Yawé mɨwaruta'aitakai memɨwakwinikɨ,
35 matsi 'axateyuruwamete mekaniwarutinɨni
wayeiyari mehayexeiyatɨ mekanakɨne.
36 Mepɨwarayexeiyakai wakakaɨyarixi,
hikɨ mɨkɨ wawiniyari kanayani.
37 Yuniwema 'ukitsi meta 'ukari mekaniwamawakaitɨni
mɨkɨ kakaɨyarixi 'axamemɨ'anene wahetsiemieme.
38 Mekaniwarukwini 'atsimemɨkateyuriekame,
yuniwema 'ukitsi meta 'ukari.
Kepauka kakaɨyarixi Kanani miemete memɨwarutimawiri,
mɨkɨ waxuriyakɨ mɨkɨ kwie 'axa'itɨarietɨ patɨa.
39 Mɨkɨ mɨyamɨti'ane meka'itiyakame pɨwarayeitɨa,
meta mɨkɨkɨ mepuyutsewixima.
40 Yawé waɨkawa puyeha'a yuteɨterima wahetsiemieme,
hetsɨana memɨmiemetetɨkai waxani'erietɨ patɨa.
41 'Ayumieme kaniwayetuani nuiwarite 'axateyuruwamete wahetsɨa,
hikɨ waɨriyarika metewa'aitɨatɨ mepakɨ memɨwaraye'uniekai.
42 Memɨwaraye'uniekai mepɨtewaruta'uximayatsitɨa,
kemɨtiwanake mepɨtewaruta'aitɨa.
43 Mɨixa Kakaɨyari wahetsie putanua,
peru mɨkɨ, memɨ'iyamakaikɨ 'axameteyurietɨ,
yaxeikɨa 'axameteyurietɨ mepakɨ.
44 Kepauka Kakaɨyari mɨwaruxei meyuhiweriekame,
meta kepauka mi'eni wa'aiwari hiwariyari,
45 yutɨratu paye'eri wahamatɨa miwewi,
naki'eriyaya mɨmariwekɨ kaniwarutinenimayata.
46 Yakatiniuyurieni memɨwaraye'unie wahetsiemieme,
mɨkɨta memuwatinenimayatakɨ.
47 Yawé, ketaneutawikweitsitɨa, takakaɨyari pemɨhɨkɨ,
tawarita ketaneukuxeɨri takwieyaritsie,
pamɨpariyutsi temɨmetsipitɨakakɨ pepatsietɨ kepemɨtitewa,
meta teyutemamawietɨ temɨmetsinɨawanikɨ.
48 Yawé 'aixɨa kerahɨawarɨwani, 'Ixaheri Kakaɨyarieya,
yuheyemekɨ meta kaheu'akamekɨ.
Yunaitɨ teɨteri mɨpaɨ meke'utiyuani: «Mɨpaɨ ketiɨyɨni».
Yawé kenɨawarieka.