107
XAPA 5
Nɨawari 107-150
1 Yawé pamɨpariyutsi xekenepitɨaka, karikɨ mɨkɨ 'aixɨa katiniuka'iyarini,
naki'eriyaya yuheyemekɨ katiniteriweni.
2 Mɨpaɨ meke'utiyuaneni Yawé mɨwarutawikweitsitɨa,
mɨwaruxɨnaxɨ mɨwaraye'unie tiwa'aitɨakaku,
3 Naitsarie kwiepa wara'iniexɨaka mɨwarukuxeɨri,
tayeta meta tatsutɨa miemete, tatserieta meta ta'utata miemete.
4 Memeuyexɨriekai makumawetsie meu'uwatɨ,
huye kiekaritsie haneme mekahexeiyatɨ mekahemaririetɨ.
5 Meheuharikutɨ meta meheuhakakwikutɨ,
mepɨkwiximekai.
6 Yawé mekaniutahiwieni me'utitsuatɨ mete'uka'eniwatɨ,
hikɨ mɨkɨ mete'uka'eniwakaku kaniwaruxɨna.
7 Huye mɨheitserie 'utɨma kaniwarewitɨni,
'atsita kiekaritsie kaniwaye'atɨani.
8 Yawé naki'eriyaya mɨmariwekɨ, pamɨpariyutsi xekenepitɨaka,
mariweme mɨtiuyurikɨ teɨteri wahetsiemieme.
9 Kemɨ'ane meuharimɨkɨ mɨkɨ pɨharitɨa,
meta kemɨ'ane meuhakamɨkɨ 'aixɨa mɨti'anekɨ pitahuxaitɨa.
10 Meyuhiwerietɨ mehɨatɨkaitɨ,
'amepu'uwakai waɨkawa makɨyɨwitsie.
11 Kakaɨyari niukieya memɨka'u'enikɨ,
'Amutewi kemɨtiwa'ɨxatsitɨakai yamemɨkatekakɨkɨ.
12 'Uximayatsika mahete kaniwarupitɨani,
mepekaxɨrɨwekai, xewitɨ pumawekai mɨwaparewienikɨ.
13 Meyuhiwerietɨ Yawé mekaniutahiwieni,
hikɨ mɨkɨ kememɨte'uka'eniwakai pɨwarutawikweitsitɨa.
14 Yemekɨ yɨriyatsata kaniwarayehapani
meta kaniwaruxɨna memɨhɨatɨkatei kaneutekixɨani.
15 Yawé naki'eriyaya mɨmariwekɨ, pamɨpariyutsi xekenepituaka,
mariweme mɨtiyurienekɨ teɨteri wahetsiemieme.
16 Wurunitse 'itupariyari putitaraxɨ,
meta tepɨa kɨyeyari 'etsipepetɨ kaneutanexɨani.
17 Mepɨte'ukwinitɨarie memɨka'anu'enanakɨ,
mepu'uximatɨarie 'axamemɨte'uyurikɨ.
18 Naitɨ 'ikwaite pɨkawanakekai me'ixeiyatɨ meputihewakai,
'etsiwatɨkaku mekaniukwikaitɨni.
19 Meyuhiwerietɨ Yawé mekaniutahiwieni,
hikɨ mɨkɨ kememɨte'uka'eniwakaikɨ pɨwarutawikweitsitɨa.
20 Yuniuki kanenɨ'ani 'aixɨa meteheu'eriekame mɨwarayeitɨanikɨ,
mɨkɨ mɨpaɨ katiniwarutawikweitsitɨani teukiyapa.
21 Yawé naki'eriyaya mɨmariwekɨ, pamɨpariyutsi xekenepitɨaka,
mariweme mɨtiyurienekɨ teɨteri wahetsiemieme.
22 Mawari meke'iyetuirieka pamɨpariyutsi me'ipitɨatɨ,
'uximayatsikaya mekekuxatani me'utihiwatɨ temawierikakɨ.
23 Haramaratsie mepɨkɨnetɨwekai yukanuwate 'amɨpapatsie,
meyukuharerutatɨwetɨ haramaratsie 'ateewapai mepeta'axekai.
24 Mana haramara meukatewatsie,
Yawé 'uximayatsikaya mekaniuxeiya meta mariweme kemɨtiuyuri.
25 Kepauka Kakaɨyari mutaniu, 'eka tɨrɨkaɨyetɨ kaniukuyani,
'ana 'apapatɨ kaniwakɨkakaitɨni hamewari,
26 muyuawitsie ye'axetɨ meta meukatewatsie heukakɨkatɨ.
Kweriwa 'anekɨa, mɨkɨ mekaneuyuyexɨrieni.
27 Memɨtarɨweka hepaɨ mepekaxɨrɨwekai, mepɨtakeitsarietɨkɨkakai,
tixaɨtɨ mepɨkateyunaki'eriekai, tsepa memɨtemaiwawe memɨyɨakai.
28 Waɨkawa meyuhiwerietɨ Yawé mekaniutahiwieni me'utitsuatɨ,
hikɨ mɨkɨ kememɨte'uka'eniwakaikɨ kaniwarutawikweitsitɨani.
29 'Eka mɨtɨrɨkaɨye kaniupata wiyeri 'etsimupepekɨ:
hamewari 'amɨnene kayuwatɨ kaniutamare.
30 'Ana kayuwatɨ mutamarixɨtsie mekaniyukatemamawieni.
Meta 'ana Kakaɨyari kaniwarewitɨni hakewa memeɨkɨnekai.
31 Yawé naki'eriyaya mɨmariwekɨ, pamɨpariyutsi xekenepitɨaka,
mariweme mɨtiyurienekɨ teɨteri wahetsiemieme.
32 Yunaitɨ teɨterimama meyuxeɨrietɨ mariweme mekehayeitɨaka.
'Ukirawetsixi 'itsɨkate 'aixɨa meke'utiyuaneni hetsiena mieme.
33 Haa 'amɨpapa muyehapane makumawe Kakaɨyari payeitɨa,
haixa mukunenieretsie muwakitsie payeitɨa,
34 kwie 'aixɨa mɨtiu'anekai kwie muxiekariya payeitɨa,
mana kiekatari 'axamemɨte'uyurikɨ.
35 Makumawetsie haa waɨkawa xuaweme payeitɨa,
kwie mɨwakitsie haixa xuaweme payeitɨa,
36 mana memɨkiekakɨ pɨwa'atɨa memɨyehakakwitɨwe,
hikɨ mɨkɨ mana kiekari mekaniukamani.
37 Mekaniuka'eni, kaxie haraweriyari mekaniutiwewieni,
waɨkawa mekateniukaxeiya.
38 Kakaɨyari 'aixɨa kaniwaruyurieni, hikɨ mɨkɨ mekaniyutimɨire,
meta yaxeikɨa watewama kaniwarutimɨiriya.
39 Kepauka mɨkɨ 'etsimemɨyupaɨmeni,
waɨriyarika mete'uximayatsitɨarietɨ 'axamɨti'anekɨ meta hiwerikakɨ.
40 Kakaɨyari 'uximatɨarika pɨwakupitɨwa memamariwaweme memayuyeitɨwa,
meta kaniwarenɨ'awani makumawetsie yeuta.
41 Peru tixaɨtɨ memɨkateheuxeiya 'aixɨa 'anekɨa kaniwa'atɨwani,
meta watɨɨriyama tewaxi wahepaɨ katiniwamɨiriyani.
42 Kepauka 'aixɨa memɨte'u'iyari mɨpaɨ memɨteneniere mepuyukatemamawieni,
peru yunaitɨ 'axamemɨte'u'iyari kayuwatɨ mepɨtamare.
43 Kemɨ'ane mɨtimaiwe, mɨpaɨ timaitɨ kehayani
meta 'aixɨa kereitimani Yawé naki'eriyaya mɨmariwe.