143
Rawiri nɨawarieya.
1 Yawé, nenewieri keneu'eni,
kenemɨmetiwawirie keneneuta'eiya.
'Aixɨa pemɨtikamiekɨ meta kemɨtiheitseriekɨ pemuyeikakɨ,
keneneuta'eiya.
2 'Ekɨ meti'uximayatsiriwame pepɨka'utakwekwewiwani pemita'iwawiyakɨ,
'ahɨxie xewitɨ mɨkayɨwekɨ mɨpaɨ mutayɨnikɨ ne 'atsinepɨkatiyuruwame.
3 Mepɨnetsimieku memɨnetsi'aye'unie:
kwiepa mepɨnetsi 'ɨhɨa nehɨxima.
Yɨwita nemuyeikanikɨri waɨriyarika mepɨnetsipitɨa,
meripaitɨ memukwi wahepaɨ.
4 Kenemɨtinewaɨriyakai pumaweri netɨrɨkariya,
ne'iyariri pɨka'uyuane nepɨka'i'enie.
5 Nepɨtiku'eriwa meripaitɨ kemɨtiɨyɨ:
mariweme kepemɨtiuyuri nepuku'eriwa,
mɨpaɨ nepɨtimate kepemɨtiuyuri 'amamakɨ.
6 Nemamatekɨ 'ahepa nepeutame'e,
waɨkawa nemɨmetsiheuyehɨwakɨ, kwie muwaki haa kemɨreuyehɨwa hepaɨ.
7 Yawé, yapauka keneneuta'eiya,
'ari netukari pɨtixɨxime.
Pepɨkanetsiwarixiwiyani,
xɨka mɨpaɨ pe'aneni, mɨwatixawata memeukakɨka wahepaɨ nekaniyɨmɨkɨ.
8 Ximeri mukatataretsie 'anaki'eriyakɨ kenenaye'eritɨwani,
'ahetsie yuri nemɨti'eriekɨ.
Huye keneneuxeitsitɨa ke'aneme nemuweiyani,
'ekɨ xeikɨa ne'iyari nemɨmetsiyetuiriekɨ.
9 Yawé, memɨnetsi'aye'unie wahepaɨtsita keneneɨxɨna,
'ahetsie xeikɨa nemikuwaunekɨ nemɨyu'awietani.
10 Kemɨmetinake kenetineuta'ɨkitɨa mɨpaɨ nemɨtiyurienenikɨ,
'ekɨ nekakaɨyari pemɨhɨkɨkɨ.
'A'iyari 'aixɨa mɨ'ane kenetsi'uwitɨximeni
'uwerikaku hetsiena temetiketamɨre 'umawekaku.
11 Yawé, 'ekɨ Kakaɨyari 'aixɨa pemɨtiuka'iyarikɨ, tukari keneneupitɨa,
heitseriemekɨ pemɨti'uximaya, nemɨtsaipɨnekɨ keneneɨxɨna.
12 Pemɨtiyukanaki'eriekɨ memɨnetsi'aye'unie keniwarukumaweriya,
yunaime memɨnetsi'aye'unie keniwarukuya,
ne ti'a'uximayatsiriwame nemɨhɨkɨkɨ.