144
Rawiri nɨawarieya.
1 Yawé 'aixɨa ke'itɨarieka, ne'ai mɨhɨkɨkɨ,
pɨneti'ɨkitɨa kuyaxa timiemekɨ,
nemamate pukuha'aritɨwa nemeuyutamiewenikɨ.
2 Mɨkɨ nekakaɨyari kanihɨkɨtɨni mɨtiyukanaki'erie, nehetsie nunuwame,
mɨmariwe hetsiena nemɨne'awieta, netsixɨname,
kɨmana nemɨyukunarɨma kanihɨkɨtɨni.
Mɨkɨ mɨnetsipitɨa kanihɨkɨtɨni neteɨterima nemɨtiwa'aitɨakakɨ.
3 Yawé, ¿tita tihɨkɨ tewi pemi'ɨwiyanikɨ?
¿Tita teɨteri metehɨkɨ pemɨwaku'eriwanikɨ?
4 Teyunaitɨ teɨteri xeimieme muka'ietɨyani hepaɨ tepɨ'anene,
tatukari 'etɨri hepaɨ pɨ'ane yapauka mukumamawere.
5 Yawé, muyuawi taheima muyema kenanutayepieka, muwa kenakayaka,
hɨrite keneumayɨaxɨa, yaketineuyuri kɨtsi muwatinexɨanikɨ.
6 'Amimierɨkari keneukaxɨri keniwareutaxɨriexɨa,
'a'ɨrɨkɨ ketineutamɨ'i, meta keniwarutaweiya memɨtatsi'aye'unie.
7 Muyuawitsie paitɨ 'atɨrɨkariya kenenanakanɨ'airi
hikɨ keneneutawikweitsitɨa hapa nekayunirɨmekaku,
nehetsie keneutanua teɨteri nemɨkawamate memɨnetsi'uweiyakɨ.
8 Kepauka memutiniuka, 'itarika mepɨkuxata,
yumamá yutserieta mieme mepanukuhapana, yakɨ xeikɨa metekuxatatɨ.
9 Kakaɨyari, xeime hekwame kwikari nepɨtakwika 'ahetsiemieme,
nɨawari 'ahetsiemieme nepɨtikwika kanari tamamata mawɨtsie.
10 'Ekɨ te'aitamete memɨte'ayu'iwanikɨ pepɨwapitɨa,
Rawiri ti'a'uximayatsiriwame pepɨ'ɨwiya 'ixipara mɨka'imienikɨ.
11 Kenenewikweitsitɨaka,
hipatɨ teɨteri memɨnetsi'uweiyakɨ nehetsie keneutanua.
Kepauka memutiniuka, 'itarikakɨ mepɨtekuxata,
yumamá mepanukuhapana, yakɨ xeikɨa metekuxatatɨ.
12 Taniwema, kepauka temari memakɨne,
meke'utiwawere kɨyexi waɨkawa mɨ'etɨriwiwawe hepaɨ,
taniwema 'ukari 'ixumeri kii mutuikatɨka hepaɨ meke'aneneni
witsimɨreukuwewiyatɨka paratsiyu witsimɨtiyuxexeiyanikɨ.
13 Yaketineuyuri ta'iku temakayayatsatsie ketineutihɨniya
'ikwai waɨkawa ketiutimɨire.
Tamuxatsima miriyarite keniwarayeitɨa,
'atsita mekayu'inɨatsinɨakame keniwarayeitɨa takwieyaritsie.
14 Tatuurutsixi kwietsanamete raheteme memɨtekemakakɨ keniwarupitɨa,
takiekaritsie 'aixɨa reukukurarutɨariekame kenayeitɨa,
meta 'aiwari hiwariyari ke'umaweni takaye'utɨma.
15 Kemɨ'ane kiekari mɨpaɨ mɨrexeiya 'aixɨa ke'itɨarieka.
'Aixɨa mepɨ'itɨarie kemɨ'ane kiekari Yawé yukakaɨyaritɨme memayexeiya.