2
Atorang deng in ibadat
1 Laih hmunan ni, auk nodan mi le kohe-kanas bel atuli li totoang. Eta mi laok saol Ama Lamtua Allah lam, nodan le halin Un hulung atuil in nuil ne susa dale ngas. Nol nodan mamo, undeng Un daek in banan na taung oen totoang son. 2 Ela kon, kohe-kanas bel lahi-lahi las, nol totoang atuil in kil tingin nas. Nini ela lam, kit totoang nuling babanan, tetesa nol dame, muid Ama Lamtua in koma ka. Hidim nuil nol in toma el atuil in todan-lahing Una ngas. 3 In tao ela ka, man banan. Nol tao Ama Lamtua in bel boa-blingin kita ka, dalen kolo. 4 Un in koma ka le atuli li totoang haup boa-blingin, nol taan ol man in toma ka. Elia:
5 Ama Lamtua Allah na mo, mes sii.
Nol suma muik hleten mes sii, man mole-daem nal Ama Lamtua Allah nol kit atuli lia, na ka Yesus Kristus.
Hidim Yesus na mo, atuil esa-esa.
6 Un sao Un apa ka le sui nal kit totoang deng kit in kula-sala ngas.
Tom nol un oras sa lam, Ama Lamtua Allah sai Dehet Dais Banan na langa-langa le tek atuli li totoang. 7 Hidim Ama Lamtua Allah huil nal auk son, le daid Un atulin in nutus, halin laok tek atuil Yahudi lo kas se ola-ola, nol tui one, le oen kon parsai se Lamtua Yesus, nol nuil muid lalan in toma ka. Asa man auk in teka ni baktetebes ela. Auk nole lo.✡Timutius dua la 1:11
8 Auk in koma ka elia: se ola-ol le eta mi nakbua halin kohe-kanas sam, mi dalen nas musti babanan nol apa. Komali nol apa deken. Kaen apa deken. Eta nikit iman le kohe-kanas se Ama Lamtua Allah lam, mi dalen nas musti niu baktetebes muna le.
9-10 Auk kon in koma ka le bihata las mana apan nas babanan, nol pake kai-baut in toma. Naleko mi apan nas nini in tao klangan bili-ngala nol pake kai-baut osa-osa man tom lo ngas deken. Tamlom naleko lai-liis mi apan nas nini in pake lil-mea, lil-muti tamlom mutiara, le halin nam atuli ngat mia deken. Ta in tao bihata las le leko ka, oen dalen man in niu ka, nol oen in daek banan tutungus sa. Na man tom taung bihaat man in todan-lahing se Ama Lamtua Allah ngas.✡Petrus mesa la 3:3 11 Eta jemaat tas nakbua le hii in tui-tikang ngam, bihata las kon muid atorang nga le tidi hngilan babanan, halin hii in tui-tikang nas nol baktetebes. Hulu-hulu apa le lobo-lau isi deken. 12 Muid au lam, bihata las nikit apan le loka-tadu biklobe las nol tui one lam, tom lo. Banan dui ka, bihata las lobo isi deken. 13 Ta Ama Lamtua Allah koet Adam muna, hidi halas-sam Hawa.✡Dehet deng Apan-kloma ki in Dadi ka 2:7; 2:21-22 14 Nol Adam man tom in nole-lilung muna deng uikjale kas laih tuan na lo, molam bihatang nga, na Hawa. Atuli li in kaliut Ama Lamtua Allah atorang nga ka, mulai se dedeng na.✡Dehet deng Apan-kloma ki in Dadi ka 3:1-6 15 Ela kon no, bihata li haup boa-blingin nabale, undeng oen hua ana. Oen kon haup boa-blingin, sadi oen parsai baktetebes se Kristus, nuil nol in namnau, nuil nol dalen niu, hidim nuil nol in toma.* Atuil in taan Alkitab pas tek noan muik tafsiran tilu deng, “bihata las in haup boa-blingin undeng oen in hua ana ka”. Nas elia: 1) muik Ana mesa, ngala Yesus man sai lalan le totoang atuli li haup nal boa-blingin; 2) Hawa man tom in nole nol tao kula, molam un nam kon daid upu kia-kaon taung totoang atuli lia; 3) bihaat in nuil toma ngas mates se oras oen in hua ana ka lo (mo tafsiran nini kuat isi lo).
✡2:13 Dehet deng Apan-kloma ki in Dadi ka 2:7; 2:21-22
✡2:14 Dehet deng Apan-kloma ki in Dadi ka 3:1-6
*2:15 Atuil in taan Alkitab pas tek noan muik tafsiran tilu deng, “bihata las in haup boa-blingin undeng oen in hua ana ka”. Nas elia: 1) muik Ana mesa, ngala Yesus man sai lalan le totoang atuli li haup nal boa-blingin; 2) Hawa man tom in nole nol tao kula, molam un nam kon daid upu kia-kaon taung totoang atuli lia; 3) bihaat in nuil toma ngas mates se oras oen in hua ana ka lo (mo tafsiran nini kuat isi lo).