3
Atorang deng in daid tulu man kil jemaat
1 Meman atuli las in teka ka toma, “Atuil in le daid tulu in kil jemaat ta, nahin na noan un huil tom os in dake banan isi ka na.” 2 Tulu in kil jemaat ta nam mo, musti atuil man in ngala ka niu. Un musti nuil niu nol sapa mes sii. Un musti hepa-hail taan apa ka, komali hlapat lo, atuli todan una, kom in sai un hnita ka le sium atuli, nol tui nal atuil didang. 3 Boel atuil in niun le mahu daat deken, nol kom in tuku-keng daat tas deken. In tom dudui ka, atuil in dalen na lila, atuil man kom in nuil dame, nol in kom naseke duit lo ngas. 4 Un musti mana-koet nal un um-elan na nol babanan. Un anan nas musti todan una, nol hii-ming una. 5 Ta eta atuling na mana-koet nal un um-elan na esa lo kam, taon elola le un mana-koet nal Ama Lamtua jemaat tas sa?
6 Banan dui ka, huil atuil in parsai se Kristus nesang son na. Nikit atuil in kil jemaat, man halas-sam parsai se Lamtua Yesus babalu ka deken. Ta lo kam un hlapat koaok. Ta tamlom Ama Lamtua diuk una, banansila el Ama Lamtua in diuk uikjale kas laih tuan na ka. 7 Eta noan nikit atuil le kil jemaat tam, nuting atuil in ngala banan, nol haup in todan deng atuil in parsai lo bii ngas. Nini ela lam, mam un mae lo. Nol uikjale kas laih tuan na kon, kiu nahu nal un lo.✡Titus 1:6-9
Atuil man hulung tulu in kil jemaat tas
8 Ela kon nol atuil man daek hulung tulu in kil jemaat tas. Oen nam musti atuil in muik ngalan banan, in nole-lilung dadahut lo, in niun mahu lo, nol in kaa ontong lai-lisin lo ngas. 9 Oen dalen nas musti niu, nol oen kon musti kil dididi in tui, man Ama Lamtua sai bel kit atuil in parsai ngias son na. 10 Tinang babanan oen in nuli ka nol oen in lako-dake ka. Etan atuli li haup oen in kula-sala ngas lo, halas-sam nikit oen le daek hulung tulu in kil jemaat tas.
11 Ela kon nol oen sapan nas.* Dais Yunanin in mo nia ki γυναῖκας (gunaikas deng kata dasar γυνή), nahin na bisa, 1) “oen sapa-bihatan nas”, tamlom bisa kon noan 2) “bihata” (umum). Muik atuli deeh tek noan, nahin deng dais na se nia ki kon bisa 3) bihaat in hulung le pela-noen jemaat tas. Mo nomer tilu la se dais Yunanin nam, nini dais didang (ngat ne Roma 16:1). Oen nam musti bihaat man in nuil toma nol nuil babanan. Man in bilu-aa le tao didaa atuil didang ngalan nas deken. Oen kon musti tahang nal apan, nol atuli li kon parsai nal one.
12 Atuil in daek hulung tulu in kil jemaat tas kon, musti bikloeb man in nuil niu nol sapa-bihatan mes sii. Un kon musti mana-koet taan un um-elan na nol babanan, nol musti ator taan un anan nas. 13 Atuil in lii-lau jemaat tas nol babanan na, taon elola ko atuli li todan oen keko lako. Nol oen kon brain taplaeng, hidim lii in aa deng oen in parsai se Yesus Kristus sa lo.
Peke deng kit in parsai ka
14-15 Timutius! Auk nangan le nesang lo kam auk tia meo ku. Eta noan auk muik in kukamu le tia meo ku ka nesang ngam, sadi surat ni tia lius muna se ku imam ma son. Auk dul surat ni le tek ku deng, Ama Lamtua nenan nas musti nuil elola. Nadidingun in tek noan Ama Lamtua nam, Allah man in nuli ka deken. Un atulin nas banansila el uma ka, man muik netes nol hdin ina in kuat. Nini ela lam, oen toka apa le hulung apa se Ama Lamtua Allah in tui-tikang man toma ngas.
16 Hmunan nu muik dasi mes muun isi deng kit in parsai ka buni nabale, mo halas ni Ama Lamtua tek puting dais na son. Na ka:
Kristus maa se apan-kloma ki son,
nini atuli li hnika-tuladang.
Ama Lamtua Koo la kon tulu bel noan,
Yesus nam mo, Atuil in dalen lolo.
Nol Ama Lamtua ima-ii in ne sorga nguas kon, ngat net Una.
Ama Lamtua Allah nikit Un lako ne sorga son,
hidim nikit sakeng Un ngala ka lapa-lapa.
Un dehet ta holhising didiin lako papmes apan-kloma ki son.
Se ola-ola, se apan-kloma kia, atuli li parsai Un son.
Kit in parsai ka ela!
*3:11 Dais Yunanin in mo nia ki γυναῖκας (gunaikas deng kata dasar γυνή), nahin na bisa, 1) “oen sapa-bihatan nas”, tamlom bisa kon noan 2) “bihata” (umum). Muik atuli deeh tek noan, nahin deng dais na se nia ki kon bisa 3) bihaat in hulung le pela-noen jemaat tas. Mo nomer tilu la se dais Yunanin nam, nini dais didang (ngat ne Roma 16:1).