17
Ama Lamtua Allah tulu Lamtua Yesus in muun na
(Markus 9:2-13; Lukas 9:28-36)
1 Hidi nal lelo eneng kon, Yesus haman Petrus, Yakobus nol un palin Yuhanis, le oen leo-leo lakos sakes se leten tene mes dapas, halin oen siis se las. 2 Lius se leten na dapas kon, oen ngat tam Yesus tuladang nga kisa son. Un sila ka kaloe, banansila el lelo ka, nol Un kai-batu las daid muti kaloeꞌ. 3 Suknahkitu lam, oen ngat net Un nahdeh nol upung Elia nol upung Musa. 4 Kon Petrus nangan hapun lo, didiin un aa dadahut noan, “Papa! Se nia lam, kaim nataka kam banan isi! Tiata banan dui ka, kaim koet hlepe tilu. Mes bel Papa, mes bel upung Musa, nol mesan na pait bel upung Elia.”
5 Petrus aa mamaus ela lam, suknahkitum nopen niu maa bua one. Kon oen tilus herang-herang, oen kon ming fala mes puti deng nopen na tek noan, “Hii ke! Yesus nia mo, Auk anang in namnau ka. Un tao Auk daleng ngi kolo tutungus. Hii-ming babanan se Una le!”✡Petrus dua la 1:17-18; Dehet deng Apan-kloma ki in Dadi ka 22:2; Buk in Naka-nahalit 2:7; Yesaya 42:1; Matius 3:17; 12:18; Markus 1:11; Lukas 3:22; Dehet Ulang deng Lalan in Nuli 18:15
6 Ming ela kon, ima-ii las lii isi, didiin oen leas hokobang. 7 Mo Yesus maa huud oen le tekas noan, “Hoe! Hangu. Lii deken!” 8 Tiata oen botas bon nas, mo oen net atuil didang se na lo, suma Yesus sii.
9 Hidi na kon, oen nius deng leten na. Kon Yesus kaing oen noan, “Asa man mi in neta apin na, tek atuil deken le! Ta Au, Atuling Baktetebes sia, musti mateng muna le. Hidim eta Auk nuling pait son, halas-sam mi bisa tek atuli.”
10 Kon oen ketan Un noan, “Paap niam meman Kristus, mo upung Elia ne ola ka? Ta guru agama las tui noan, upung Elia musti maa muna le, halas-sam Kristus maa. Mo muid Papa lam, elola la?”✡Meliaki 4:5
11 Yesus situs noan, “Meman toma. Upung Elia musti maa muna, le halin sai lalan bel Kristus. 12 Molam hii babanan ne! Upung Elia maa son, mo atuli li tanan lo. Oen tao sus una, muid oen in koma ka. Ela kon, mam oen tao sus Au, Atuling Baktetebes sia.”✡Matius 11:14
13 Ming hidi ela halas-sam oen tana noan, upung Elia man Yesus in teka na, mo Yuhanis in Sarain Atuli ka.
Lamtua Yesus tao banan tana-ana mesa, man tom uikjale
(Markus 9:14-29; Lukas 9:37-43a)
14 Yesus nol Un ima-ii las pait kon, oen tutnaal atuli hut mamo, natang one. Kon muik blalan biklobeng mes maa hai buku ka, le nodan tulung se Yesus noan, 15 “Tuang! Namnau auk anang ngu tia! Ta un iil nuin laen, tiata un bosor isi. Eta ili la maa kam, un naih taam lako ui dalen, lo son nam ai dalen. Tulung kaim tia Tuang! 16 Auk nolan lako se Tuang ima-ii las son, mo oen tao banan nalan lo.”
17 Ming ela kon, Yesus baet Un ima-ii las noan, “Hoeh! Mi niam lai-lisin son! Auk tui mi tutungus son, mo mi nangan taan babanan lo bii nabale. Nol mi kon parsai Auk baktetebes lo! Auk musti keeh nol mi didiin bling pait ta? Kil nol tana-ana na maa se nia!”
18 Ta oen kil belen tana-ana ka, kon nam Un nulut puting uikjale ka deng tana-ana na. Tiata nol na kon, un banan meman.
19 Hidi deng na, le Yesus nol Un ima-ii las siis kon, oen ketan Un noan, “Papa! Tasao le kaim nulut puting nal uikjale na lo kia?”
20 Yesus situs noan, “Mi nulut puting nal uikjale na lo, lole mi parsai baktetebes lo kam. Nangan ne! Eta mi parsai baktetebes se Au, suma ana bubuit banansila el kai beas ana blutu mes tuun kon,* Lamtua Yesus sukat atuli li in parsai ka nini kai beas ana blutu mesa. Tiata kai beas sa tenen na, man kit musti nangan, mo kai ina hnika elola ka deken. Alkitab dais Indonesian na dul noan, ‘biji sesawi’, mo muid atuil in tana dehe lam, tafsiran ni kula. mi prenta nal leten mes noan, ‘Hoe leten! Lako seda se nua!’ Lam taon elola ko un lako seda se nua. Ta mi tao nal asa tuun, sadi mi parsai baktetebes se Ama Lamtua.✡Matius 21:21; Markus 11:23; Korintus mesa la 13:2 21 [Molam hii babanan! Uikjale kas meman daat isi. Ta mi musti kohe-kanas nol telang, le nodan tulung se Ama Lamtua, lo kam mi nulut puting nal uikjale tuladang ela lo.”]† In dula dais Yunanin man blaan dui nol banan dui ngas dul bango 21 ki lo.
Lamtua Yesus aa deng Un in mate ka, lalis dua la
(Markus 9:30-32; Lukas 9:43b-45)
22 Oe mesan na, Yesus nol Un ima-ii las nakbua se propinsi Galilea. Kon Un tekas noan, “Nesang lo ka kam, oen le hee Auk lakong se atuil didang. 23 Hidim oen keo tele Au, Atuling Baktetebes nia. Meman Auk mateng, mo bingin dua ka lam, Auk nuling pait.”
Ming Un in aa ela ka kon, Un ima-ii las dalen iil isi.
Lamtua Yesus aa deng Um in Kohe-kanas Tene ka bea la
24 Dedeng Yesus nol Un ima-ii las lakos se kota Kapernaum kon, atuil in sium bea ngas maa ketan Petrus noan, “Mi gurun na baen Um in Kohe-kanas Tene ka bea la, tam lo ka?”✡Dehet in Puit deng Dale Mesir 30:13; 38:26
25 Kon Petrus siut noan, “Aeh, baen!”
Mo Petrus pait maa lius uma, le un tek Yesus lo bii kam, Yesus aa muna son noan, “Simun, olan ku nangan ne. Lahi-laih in ne apan-kloma ki ngias, sium bea deng asii la? Deng oen anan nas esan, tamlom deng atuil didang nga?”
26 Petrus siut noan, “Deng atuil didang!”
Kon Yesus aa napiut noan, “Eta ela lam, lahing nga ana ka baen baab lo, ta lo? 27 Ela kon nol Um in Kohe-kanas Tene ka bea la. Mo kit tao atuil in sium bea ngas le komali deken tia. Tiata banan dui ka, ku laok ngain ikan se tubu kua. Ku ngain nal ikan hmunan na lam, ngaing un baha ka. Tiam ku haup duit lil-muti mes se la. Hidim pake duit na le laok baen kit duat bea la. Ta duit na nol taung kit duat son na.”‡ Taun-taun nam, bikloeb Yahudi man umur taun 20 saek bus el dapa ngas, musti baen bea le halin pake taung in doha-tinang Um in Kohe-kanas Tene ka. (Les se Dehet in Puit Deng Dale Mesir peke 30:12-16). Se dedeng Lamtua Yesus sa ka, oen kaih bea la nini duit didrakma. Didrakma mesa lam osa ka, dinari dua. Dinari mesa lam, sama nol tukang mes gaji lelo mesa. In mo nia ki, Yesus tek Petrus noan, ‘mam ku haup duit stater mes se ikan na baha ka’. Stater mesa lam, osa ka duitdidrakma dua, tamlom, dinari aat. Ta nol in baen bea taung at dua, na Yesus nol Petrus.
✡17:5 Petrus dua la 1:17-18; Dehet deng Apan-kloma ki in Dadi ka 22:2; Buk in Naka-nahalit 2:7; Yesaya 42:1; Matius 3:17; 12:18; Markus 1:11; Lukas 3:22; Dehet Ulang deng Lalan in Nuli 18:15
✡17:10 Meliaki 4:5
*17:20 Lamtua Yesus sukat atuli li in parsai ka nini kai beas ana blutu mesa. Tiata kai beas sa tenen na, man kit musti nangan, mo kai ina hnika elola ka deken. Alkitab dais Indonesian na dul noan, ‘biji sesawi’, mo muid atuil in tana dehe lam, tafsiran ni kula.
✡17:20 Matius 21:21; Markus 11:23; Korintus mesa la 13:2
†17:21 In dula dais Yunanin man blaan dui nol banan dui ngas dul bango 21 ki lo.
✡17:24 Dehet in Puit deng Dale Mesir 30:13; 38:26
‡17:27 Taun-taun nam, bikloeb Yahudi man umur taun 20 saek bus el dapa ngas, musti baen bea le halin pake taung in doha-tinang Um in Kohe-kanas Tene ka. (Les se Dehet in Puit Deng Dale Mesir peke 30:12-16). Se dedeng Lamtua Yesus sa ka, oen kaih bea la nini duit didrakma. Didrakma mesa lam osa ka, dinari dua. Dinari mesa lam, sama nol tukang mes gaji lelo mesa. In mo nia ki, Yesus tek Petrus noan, ‘mam ku haup duit stater mes se ikan na baha ka’. Stater mesa lam, osa ka duitdidrakma dua, tamlom, dinari aat. Ta nol in baen bea taung at dua, na Yesus nol Petrus.