1 Makkabi neh a hnukbang rhoek tah Boeipa kah mawtnah dongah bawkim neh khopuei te koep a dang uh. 2 Rhangpuei tolung kah kholong loh a sak hmueihtuk te khaw a koengloeng uh, bawknah im cet khaw a phae uh. 3 Rhoso te a ciim uh phoeiah hmueihhlutnah hmueituk a tloe koep a saii uh. Hmailung dongkah hmai te a boh uh tih hmueih a nawn uh he kum nit a tal phoeiah coeng ni. Bo-ul a nawn uh, hmaithoi a tok uh tih, rhungkung buh khaw a tawn uh. 4 Te phoeiah doei yalh uh tih te bang yoethae a tlak voel pawt ham khaw, tholh oe cakhaw a doelhyoem la toel tih, namtom hlanglueng neh soehsalkung kut ah tloeng pawt ham Boeipa te a khue uh. 5 Amah kholong rhoek loh rhokso a poeih hnin van rhoe ah ni rhokso ciimnah te a khueh uh. Te tah Khislev hla hnin kul hnin nga vaengah coeng ni. 6 Te te omngaihnah neh hin rhet khuiah a bul uh. Kum a sen hlang a poek uh voelh pawh pohlip khotue te khaw koep a khueh uh. Pohlip khotue vaengah khohong rhamsa bangla tlang ah, lungko khuiah a poeng a doe uh te a poek uh. 7 Samkhuem te a khuem uh tih thingbu a then a then, rhophoe aka hnah dueng te a hlaek uh. Amah kah hmuen cim ciim hamla tanah aka pae Boeipa taengah uemnah laa te a nawn uh. 8 Rhaengpuei kah otloek te kutthoh neh a cak sak uh coeng dongah kum takuem amah te khohnin ah tah Judah namtu boeih boeih loh te khotue te a yaeh uh.

9 Te tah Ephiphanes la a khueh Antiokus kah a kawng a bawtnah coeng ni.

10 Tahae ah Antiokus Eupator kut hmuiah aka thoeng te khaw n'thui uh pueng ni. Anih khaw hlang rhong capa ni. Rhalthoh vaengkah citcai a kungpuei te a toi la bawt ka tueng sak eh. 11 He kah hlang loh ram te a loh vaengah, Lyisa te uknah a hut sak tih, Coelsyria neh Phoenicia kha khoboei a ham la a khueh. 12 Macron la a khue Ptolemy long tah Judah rhoek taengah boethen a tueng sak. Anih long he Judah rhoek taeh boethae a saii dae tahae ah tah amih neh pawnhlainah dongah rhoepnah neh a then la tuem hamla cai. 13 A hnukah tah manghai paya rhoek loh Eupator taengah anih te tholh a pael uh. Anih long he Cyprus a toeng dongah a maelnah takuem ah hmuiyoi a ti nah te kah amah loh a yaak. Cyrus te Philometor loh anih kut ah a khueh dae a caeh tih Antiokus Epiphanes taengla a vik cet. A bibipuei long khaw a hinyah voel pawt dongah sue a loh tih a hingnah khaw bawt.

14 Gorgia te khohmuen khoboei la a om vaengah tah, kutloh caem te a khueh tih Judah rhoek te a hnuk a hmai la a tloek. 15 Te phoeiah, namtlak hmuencak aka lo Edumean rhoek loh khaw Judah rhoek te a veet. Jerusalem lamkah a vai rhoek te khaw a doe uh tih caemtloek a sennah ham a khoem uh. 16 Tedae Judas neh a caem rhoek long tah rhenbihnah phat a khueh uh tih amih te caemtloek puei ham neh, Idumean hmuencak te cuk thil hamla Pathen a khue uh. 17 Thahlue la a tloek uh dongah a hmuen te koep a dang uh tih vongtung so lamloh amih aka kap rhoek te khaw a boh uh. Amih neh aka hum uh carhui te a ngawn uh dongah aka duek khaw thawngkul lak a yol moenih.

18 A yol koek thawngko tluk long tah tanglung neh a oel tih vongtung a mak nah hmuencak imsang ah hlipyingnah a loh uh. 19 Makkabi loh Simon, Joseph khaw, Zacckhaeus neh a lambong khaw a caeh tak tih thadueng a rhoeh la amih te a dum uh. Amah te thitawn la a ngoenah hmuen la cet. 20 Tedae Simon taengkah rhoek tah tangka ngaih la om uh. Te dongah imsang khuikah hlang a ngen loh tangka neh a bawk uh. Te vaengah tangka drachmas thawng sawmrhih a doe uh tih a ngen te vil a yong sak. 21 Te tla om ol te Makkabi taenglaa pha vaengah tah pilnam kah a lu rhoek te a coi. Te phoeiah a manuca tangka la a yoih tih amih taengkah a thunkah rhoek aka hlah rhoek te a ngawn. 22 Hmuiyoi la aka om hlang rhoek te a ngawn phoeiah tah imsang rhoi te tlek a loh. 23 Caemtloeknah a khueh takuem te tanah a dang dongah tah hmuencak rhoi kah thawng kul hlai a thup.

24 Judah rhoek kah a ta Timothy loh kutcoep caem muep a coep tih, Asia lamkah marhang caem te khaw a hlangmi a yol mai moenih. Amah te cet tih Judea te hlipuei bangla loh hamla cai. 25 A yoei vaengah tah Makkabi neh a hlang rhoek loh a lu dongah laipi a phul uh tih a pumpu ah tlamhnin a yen uh phoeiah Pathen taengah huithui uh. 26 Hmueihtuk hmaikah tangtlaeng dongah bakop uh tih amih a rhennah ham khaw, olkhueng loh a thui bangla thunkha khaw thunkha bangla, kocaelh khaw kocaelh bangla khueh ham Boeipa te a khue uh.

27 Thangthuinah lamloh a thoh uh phoeiah tah a lungpok haica te a muk uh tih khopuei hawt a hla la cet uh. Rhal neh a yoei uh vaengah tah cawt pai uh. 28 Mincang khothaih a pha vaengah tah caem rhoi te caemtloeknah ah hum uh. Pakhat long tah tanah neh khophoeng pha ham te a thaomnah bueng koll pah Boeipa tongah hangdangnah a khueh. Tedae a tloe rhoek longnah a hnueih uh thae vaengah a thintoek te a lamhma sak.

29 Rhal a tlung tangkik vaengah tah vaan lamkah rhimom hlang panga te marhang dongah sui ngoldoel neh thoeng tih Judah rhoek te a mawt uh. 30 Amih khuikah panit loh Judas te a laklung ah a khueh tih a hmalaem pawt ham a tungaep. Amih loh rhal soah palaa te kho la a tlan sak tih rhaek neh a dae. Te dongah ngaihmang mikdael la om tih, pathaeng phayang la a dae uh vaengah maeh bangla a poel uh. 31 Marhang caem yarhuk phoeiah khaw hlang thawng kul phoeiah ya nga te khaw a ngawn uh bal.

32 Timothy amah ngawn tah Gazra hmuencak la yong. Te rhalmah khaw a then la om tih Chareas loh rhalboei a bi. 33 Te vaengah Makkabi neh a hlang rhoek te a kohoe uh tih rhalmah im te khohnin likip khuiah a dum uh. 34 A khuikah hlang rhoek tah hmuencak kah thadueng dongah hangdang uh tih sarhingrhup la soehsalnah neh, halang ol te a tha uh. 35 Tedae a hnin nga mincang ah tah Makkabi caem kah cadong hlang pakul tah soehsalnah ol dongah a thintoek te hmai la rhong coeng. Te dognah vongtung te a poe uh tih a hmuh sarhui te a tloek uh. 36 Amah te tlamte a tloe rhoek long khaw a kaepvai ah vongtung te a poe uh tih im sang te hmai neh a hlup uh. Rhalkap aka hoei rhoek loh vongka te a thuk uh tih khopuei te a loh uh. 37 Te vaengah tangrhom ah aka thuh Timothy khaw a mana Chareas neh Apollophanes te khaw a ngawn uh.

38 Te te bawt a coeng uh nen tah Israel taengah sitlohnah muep aka tueng sak tih amih taengah tanah aka pae Boeipa te laa neh, uemnah neh yoethen a paek uh.