1 Manghai Astyages a dueknah hnukah, Persia manghai Cyrus loh a ram ngolthil. 2 Daniel tah mangah Cyrus neh rhep aka yoei uh a hui la om tih, a paya tloe boeih lakah Daniel te a thangpom.

3 Isa 46:1; Jer 51:44Dan 6:16–24Te vaengah Babylon loh mueirhol pakhat a khueh tih Bel a ming nah. Hnin takuem ah pilnam loh Bel te vaidam cim doh hlainit, tu sawmli, misur amrhaeng parhuk rhawp a nawn uh. 4 Manghai Cyrus loh Bel te pathen la a poek dongah hnin takuem a bawk. Tedae Daniel long tah a Pathen ni a bawk.

5 Hnin at atah manghai loh Danielte, “Balae tih Bel na bawk pawh?” a ti nah.

Daniel loh, “Hlang kut loh a saii mueirhol he ka bawk moenih. Aka hing Pathen ni ka bawk. Anih long ni vaan neh diklai khaw a suen tih pumsa boeih khaw a uk,” a ti nah.

6 Manghai loh, “Kaimih kah Bel patthen he hing rhep tila na tangnah moenih a?”. “Hnin takuem ah meyet a ok tih a caak khaw na hmuh manim?” a ti nah.

7 Daniel te nuei tih, “Manghai nang te n'thainah uh boel mai saeh. Nang loh pathen la na khue Bel te amlai ni rhohum neh a ben thil dae lah ko. Te long te ca noek pawt tih bang khaw a ok noek moenih,” a ti nah.

8 Te dongah manghai te a thintoek tih Bel khosoih hlang sawmrhih te a khue. Te phoeiah amih te, “He kah nawnnah a caak taktak te kai taengah nan tueng thai pawt atah na duek uh ni. 9 Tedae Bel loh a caak taktak te nan tueng uh thai van atah Bel te pathen moenih tila aka coel Daniel te duek saeh,” a ti.

Daniel loh manghai te, “Na olthui bangla om saeh,” a ti nah.

11 Te phoeiah Bel khosoih rhoek loh, “Imkhui la kun uh sih ne, manghai namah loh maeh khaw tawn lamtah, misurtui khaw tloeng pah. Te phoeiah thohka te khak kai lamtah na kutnoek neh kutha daeng thil. 12 Mincang a pha tih na mael vaengah Bel loh bang khaw a caak pawt a tah dueknah te ka yook uh eh, te mueh atah kaimih a hong aka pup Daniel loh yook saeh,” a ti uh.

13 Tedae khosoih rhoek long te caboei hmuiah a huep la a puut a vueh uh dongah a phoeng la a ngai uh. Te lamkah te kun uh poepa tih caak ok boeih a caak uh.

14 Amih hloeih a caeh phoeiah tah manghai loh Bel hmai ah maeh a tloeng pah. Te phoeiah Then Danie loh tueiyoeih rhoek te ol a paek tih hmaiphu a loh sak, phoeiah bawkim cirhong ah te boeih a phul sak. Te a phul te manghai amah bueng long ni dawk a hmuh. Amih boeih a caeh nen tah thohka tluep a khaih tih manghai kutbuen neh kutha a daeng thil. Te phoeiah a mih rhoi khaw cet van.

15 Amah te kah khoyin ah tah a saii uh noeng bangla, khosoih rhoek neh a yuu a caa rhoek khaw cet uh boeih a caak a ok uh.

16 Mincang a pha vaengah tah manghai te thoo tih Daniel khaw a taengah om. 17 Manghai loh, “Daniel kutha ka khueh te phaeh uh a?” a ti nah hatah,

“Manghai aw, a cuemhmuet la a om lae,” a ti nah.

18 Thokah a ong van neh caboei te a hong la manghai loh a hmuh tih, “Bel nang na len pai, nang tah pathen taktak,” ti la tamhoe.

19 Te dae Daniel tah ka nuei tih manghai te, “Bawkim khui la na kun hlan ah cirhong he so lamtah u kah kholaeh nim na hmuh han thui lah,” a ti nah.

20 Manghai loh, “Tongpa kah, huta kah neh camoe rhoek kah,” a ti tih a thintoek te sai coeng. 21 Te dongah khosoih rhoek te a yuu a ca rhoek neh boeih a khue. Caboei dongkah caak ok caak hamla a huep la a kunnah te khaw manghai a tueng uh. 22 Khosoih rhoek te khaw boeih a ngawn tih Bel te Daniel taengla a paek. Daniel loh mueirhol te boeih a palet tih a bawkim te khaw a phae pah.

23 Te vaengah tuihnam a len tloe om tih Babylon rhoek loh a bawk uh. 24 Hnin at ah manghai loh Daniel te, “He kah pathen hing pawh tila nan thui thai mahpawt a? Amah te ka bawk mako!” a ti nah.

25 Daniel loh, “Kai tah Boeipa ni ka bawk, amah bueng ni aka hing Pathen. 26 Manghai nang loh saithainah na pae koinih nangmih kah tuihnam he cunghang neh caemboh a ngoe mueh la ka ngawn ni,” a ti nah.

Manghai loh, “Saithainah kan paek,” a ti nah.

27 Te dongah Daniel loh lungpat, maehtha, sam te a loh tih rhen a thong. Te te vadam bangla a hluem tih tuihnam te a cah. Tuihnam loh a caak tih a dolh vaengah tah phut pook. Te vaengah Daniel, “Nangmih loh na bawk pathen so lah he,” a ti nah.

28 Te tla a om te Babylon manghai loh a yaak vaengah tah a thintoek uh tih manghai te a tloelh uh. “Manghai khaw Jew la poeh coeng, Lamhma la Bel a phae tih khosoih rhoek a ngawn, tahae ah tuihnam a ngawn bal,” a ti uh. 29 Manghai te a paan uh tih amih taengla Daniel te tloeng sak ham a kuek uh. Manghai te a hih uh tih, “Na aal atah namah neh na imkhuiko te dueknah khuila kan voeih ni,” a ti na uh.

30 Amih kah a thui te a thuingaihnah manghai loh a ming vaengah Daniel te amih kut dongah a tloeng. 31 Anih te sathueng rhom khui la a voeih uh tih hnin rhuk a khueh uh. 32 Tekah rhom khuiah te sathueng pumrhih om tih hnin at takuem ah hlang panit neh tu panit te a vuelh uh. Tedae amah te kah hnin rhuk khui ahtah Daniel te nget kangna saeh a ti dongah bang khaw vuelh uh voel pawh.

33 Te vaengah tue ah tonghma Hakkuk tah Judah ram ah om. Buh a thong tih a cun. Te phoeiah a lo kah cangat rhoek taengla cet tih buh te am dongah pahoi a khuen pah. 34 Te vaengah anih te Boeipa kah puencawn loh, “Buh te khuen lamtah Daniel pae laeh, anih te Babyloh kah sathueng thongim ah om lahko,” a ti nah.

35 Habakkuk loh, “Boeipa, Babylon te ka hmuh noek pawt tih, sathueng khui a omnah khaw ka ming moenih,” a ti nah.

36 Ezek 8.3Te dongah puencawn loh tonghma te a sam ah a tuuk tih khohli dongah Babylon la thaeng a khuen tih sathueng khui taengah a khueh. 37 Habakkuk te pang tih, “Daniel, Daniel! Pathen loh nang ham buh n'thak sak tih lo laeh he!” a ti nah.

38 Te dongah Daniel loh, “Pathen aw namah loh kai nan poek, nang aka lungnah hlang te hlahpham moenih,” a ti. 39 Daniel te thoo tih a caak van neh Pathen puencawn loh Habakkuk khaw amah kho la tlek a thak.

40 Hnin rhih phoeiah tah Daniel hip hamla manghai te cet. Sathueng lungko taeng a pha vaengah tah a sawt hatah Daniel a ngol te lawt a hmuh. 41 Te dongah manghai te ol a len la pang tih, “Daniel kah Pathen Boeipa aw, me tluk lamlae na len mai. Nang bueng ni Pathen,” a ti. 42 Te dongah Daniel te rhom khui lamloh a doek tih, Daniel duek sak ham aka taeng rhoek te tloep a hlak. Te dongah amih a mikhmuh ah sathueng rhep boeih a ngaeh uh.