65
Boeipa kah Hlatnah
1 Rom 10.20Kai aka dawt pawt rhoek loh kai n'toem
aka tlap pawt loh m'hmuh coeng.
Kai ming aka khue noek pawh namtom taengah,
“Kai ni he, kai ni he,” ka ti nah.
2 Rom 10.21A kopoek hnukah a then pawt la
longpuei aka vai pilnam thinthah taengah
khohnin yung ah ka kut ka phuel.
3 Ka mikhmuh ah kai aka veet tih
dum ah aka ngawn nainoe neh
ka laiboeng dongah aka phum.
4 Phuel ah kho aka sa tih
rhalrhing neh aka rhaeh,
ok saa neh maehhang te
a am dongah dikyik dikyak la a sok.
5 “Nang te khoem uh laeh,
kai taengla ha mop boeh,” aka ti rhoek aw
he hmaikhu, khohnin yung kah
hmai aka rhong neh ka hnarhong khuiah nan hawth uh.
6 Ka mikhmuh ah a daek tangtae coeng ni he,
ka ngam mahpawh.
Amih kah rhang dongah
ka thuung rhoe ka thuung ni.
7 Nangmih kah thaesainah neh
na pa rhoek kah thaesainah khaw
BOEIPA loh rhenten a thui coeng.
Tlang ah a phum tih som ah kai m'veet uh.
Te dongah a thaphu te amamih kah rhang dongah
lamhma la ka loeng pah ni.
8 Thaihsu khuikah misur thai te a hmuh vaengah
BOEIPA loh he ni a thui.
“A khuiah a yoethennah dongah anih te phae boeh,” a ti.
Boeih a phae pawt hamni ka sal rhoek ham ka saii tangloeng eh.
9 Jakob lamkah a tiingan neh
ka tlang aka pang ham te Judah lamloh ka thoeng sak ni.
Te te ka coelh rhoek loh a pang uh vetih
te ah te ka sal rhoek loh kho a sak uh ni.
10 Jos 7.24-26Kai aka toem ka pilnam ham tah
Sharon te boiva kah tolkhoeng la,
Akor kol saelhung kah a kolhmuen la om ni.
11 Tedae nangmih tah BOEIPA aka hnoo,
ka tlang cim aka hnilh,
Yoekam ham caboei aka phaih,
Meni ham yu aka doh,
12 nangmih te cunghang neh kan tae thil vetih
nangmih te maeh la boeih na koisu uh ni.
Kang khue lalah nan doo pawh.
Ka thui lalah na hnatun pawt tih
ka mikhmuh ah a thae na saii.
Te dongah na tuek vaengah te ka ngaih rhoe moenih.
13 Te dongah ka Boeipa Yahovah loh he ni a thui.
Ka sal rhoek loh a caak uh vaengah
nangmih tah na lamlum uh ni he.
Ka sal rhoek loh a ok uh vaengah na halthi uh ni he.
Ka sal rhoek loh ko a hoe uh vaengah
nangmih tah yah na poh uh ni he.
14 Ka sal rhoek te
lungbuei thennah neh a tamhoe uh vaengah
nangmih tah lungbuei thakkhoeihnah na pang uh vetih
mueihla pocinah neh na rhung uh ni.
15 Nangmih ming tah
ka coelh rhoek taengah olhlo la kap vetih
nang te ka Boeipa Yahovah loh n'duek sak ni.
Tedae a sal rhoek te ming a tloe neh a khue ni.
16 Diklai ah aka uem te tah
Amen Pathen loh a uem vetih
diklai ah aka toemngam tah
Amen Pathen loh a toemngam ni.
Hnukbuet kah citcai te a hnilh uh vetih
ka mikhmuh ah thuh uh ni.
Saihluen Thai
17 Isa 66.22; 2Pe 3.13; Olp 21.1Vaan thai neh diklai thai ka suen coeng he.
Lamhma te poek uh voel pawt vetih
lungbuei ah khaw cuen voel mahpawh.
18 Tedae lat ngaingaih uh lamtah
kai loh ka suen te a yoeyah la omngaih puei uh.
Kai loh Jerusalem kah omngaihnah neh
a pilnam kah omthennah te ka suen coeng.
19 Olp 21.4Jerusalem soah ka omngaih vetih
ka pilnam soah ka ngaingaih bal ni.
A khuiah rhah ol neh pang ol n'yaak voel mahpawh.
20 Te ah tah a kum aka cahni neh
a kum aka soep mueh patong khaw koep om mahpawh.
Camoe khaw kum yakhat ca thoeng ah duek ni.
Tedae kum yakhat ca thoeng duela
lai aka hmu tah thae a phoei thil ni.
21 Im a sak uh vetih kho a sak uh ni.
Misur a phung uh vetih a thaih a caak uh ni.
22 A sak uh phoeiah tah a tloe loh khosak thil mahpawh.
A phung phoeiah a tloe loh ca mahpawh.
Ka pilnam kah kum he thingkung kah kum bangla om vetih
a kut kah bitat te ka coelh rhoek loh a hmawn puei ni.
23 A poeyoek la kohnue uh pawt vetih
lungmitnah la ca cun uh mahpawh.
Amih kah tiingan neh a taengkah a cadil cahma khaw
BOEIPA kah yoethen a paek rhoek ni.
24 Om ngawn bitni,
ng'khue uh hlanah khaw kai loh ka doo ni.
A thui uh li vaengah kai loh ka yaak pawn ni.
25 Isa 11.6-9Uithang neh tuca te pakhat la luem rhoi ni.
Sathueng loh saelhung bangla cangkong a caak ni.
Rhul tah laipi te a buh nah vetih thaehuet mahpawh,
ka tlang cim tom ah phop uh voel mahpawh.
BOEIPA loh a thui coeng.