MATTHAI
(The Gospel According to Matthew)
Mathai Cabu Kawng
Mathai he tah Jesuh kah hnukbang pakhat la om. A bibi hamla Jesuh loh a khue vaengah Mathai he lamkhong mangmu a coi. Anih he Levi khaw a ming nah. (Matt 9:9-13; Mark 2:13-17; Luke 5:27-32). Amah loh he Mathai Olthangthen cabu ka tael ti tah thui pawh. Tedae kum yacut a pacuek lamkah Khrihca rhoek loh anih kah a tael ni tila a tangnah uh. Tedae Bible cabu boeih he aka daekkung tak tak Pathen amah ni tila tangnah ham om. Hlang hing tah Pathen kah a hnonah tubael mai ni.( 2 Tim 3:16,17; 2 Pet 1:21). Te dongah ni Bible aka taelkung hlanghing ming he a tueng sak pawh, a ming khaw a ming sak pawh. Pathen kah a hnonah conghol paitaeh he Pathen hmuen ah a khueh moenih.
He cabu he Jesuh duek tih a thohkoep phoeikah kum yacut a pacuek nah dongah a tael dae kum tah rhep thui thai la om pawh.
Mathai cabu dongah he Jesuh cunnah neh khosaknah, thuituennah neh khoboe, dueknah neh thohkoepnah, Olkhueh Rhuem dongah a thui bangla a koelh messiah tah anih ni, Pathen ram kah manghai boeipa kawng a tael. Olkhueh rhuem dongkah tonghma ol sawmrhuk tluk he Mathai loh koep a thoelh.
Sawt Yoeinah
I. Israel hamla David capa manghai boei1.1—25.46
A. Maghai kah rhuirhong 1.1-25
B. Manghai Camoe vaengkah 2.1-23
C. Manghai Ram Pai coeng dae a hnawt uh 3.1—11.1
D. Manghai kah khokhannah thai11.2—13.52
E. Manghai kah bibi nah 13.53—23.39
F. Manghai ham thangpomnah olkhueh 24.1—25.46
II. Manghai kah thohkoepnah 26.1—28.8
III. Manghai kah saithainah neh tuentah ol 28.9-20
1
Khrih kah Rhuirhong
1 He tah Abraham kah cadil, David kah cadil, Jesuh Khrih kah rhuirhong cabu ni.
Abraham lamkah David
2 Abraham loh Isaak a sak tih, Isaak loh Jakob a sak, Jakob loh Judah boeinaphung a sak. 3 Judah neh Tamar loh Perez neh Zerah a sak tih, Perez loh Hezron a sak, Hezron loh Aram a sak. 4 Aram loh Amminadab a sak tih, Aminadab loh Nashon a sak. Nahshon loh Salmon a sak. 5 Salmon neh Rahab loh Boaz a sak rhoi, Boaz neh Ruth loh Obed a sak, Obed loh Jesse a sak.
6 2Mg 24.14,15; 2Kh 36.10; Jer 27.20Jesse loh manghai David a sak tih, David neh Uriah kah yurho loh Solomon a sak. 7 Solomon loh Rehoboam a sak tih, Rehoboam loh Abijah a sak, Abijah loh Asa a sak. 8 Asa loh Jehoshaphat a sak tih, Jehoshaphat loh Joram a sak, Joram loh Uzziah a sak. 9 Uzziah loh Jotham a sak tih, Jotham loh Ahaz a sak, Ahaz loh Hezekiah a sak, 10 Hezekiah loh Manasseh a sak tih, Manasseh loh Amos a sak, Amos loh Josiah a sak. 11 Josiah he Babylon la a puennah kungah Jekhoniah neh a manuca rhoek te a sak.
12 Babylon la a puennah hnukah, Jekhoniah loh Shealtiel a sak, Shealtiel loh Zerubbabel a sak, 13 Zerubbabel loh Abiud a sak tih, Abiud loh Eliakim a sak, Eliakim loh Azor a sak, 14 Azor loh Zadok a sak tih, Zadok loh Achim a sak, Achim loh Eliud a sak, 15 Eliud loh Eleazar a sak tih, Eleazar loh Matthan a sak, Matthan loh Jakob a sak, 16 Jakob loh Mary kah a va Joseph a sak. Anih lamloh Khrih la a khue Jesuh a sak.
17 Te dongah Abraham lamloh David duela a khong la khong hlaili tih, David lamloh Babylon la a puennah duela khong hlaili, Babylon la a puennah lamloh Khrih duela boeih ah khong hlaili lo.
Jesuh Khrih kah A Thangnah
18 Luk 1.27Jesuh Khrih kah rhuirhong khaw ana om tangloeng. A manu Mary he Joseph hamla a bae dae a om rhoi hlan ah Mueihla Cim loh bungvawn la a om sak te a ming. 19 A va Joseph tah aka dueng la om tih anih te yan ham a ngaih pawt dongah toeng hamla duem cai. 20 He a poek vaengah, boeipa kah puencawn loh anih taengla a mang ah pakcak a phoe pah tih, “David capa Joseph Mary te na yuu la loh ham rhih boeh, anih a vawn he Mueihla Cim rhangnen ni. 21 Luk 1.31Capa a cun vaengah a ming te Jesuh na sui ni. Anih long tah a pilnam te a tholh khui lamloh a khang ni. 22 Boeipa kah a thui te soep sak hamla he he boeih thoeng coeng. 23 Isa 7.14Tonghma lamlong khaw,
Oila te bungvawn la om vetih capa a cun ni,
a ming tah Emmanuel la a khue uh ni he.
Te tah mamih taengah aka om Pathen ni a thuingaih,” a ti nah. 24 Joseph tah a ih kung lamkah a thoh vaengah Boeipa kah puencawn loh anih a uen bangla a ngai tih a yuu te a loh. 25 Luk 2.21Tedae capa a cun hil Mary te ming pawh. A ming te khaw Jesuh a sui.