2
Kholo Hlangcueih Rhoek
Manghai Herod tue vaengah Jesuh tah Judah ram Bethlehem ah thang, te vaengah khothoeng ben lamkah kholo hlangcueih rhoek Jerusalem la ha pawk uh. “Judah manghai aka thaang te melam a om? Anih kah aisi te khothoeng ben ah ka hmuh uh tih, anih bawk hamla ka pawk uh coeng,” a ti uh.
Manghai Herod loh a yaak vaengah amah khaw, Jerusalem khaw boeih a hinghuen. Khosoihham rhoek neh pilnam khuikah cadaek rhoek te boeih a coi tih, “Me kah Khrih nim aka thaang,” a ti nah. “Judea Bethlehem ah,” tila tonghma rhoek loh a daek te a thui pa uh.
Mai 5.2“Judah ram kah Bethlehem nang ngawn tah
Judah khoboei rhoek khuiah a yit la na om moenih.
Nang lamloh hlang aka mawt ha thoeng ni.
Anih loh ka pilnam Israel te a dawndah ni.
Herod loh kholo hlangcueih rhoek te a huep la a khue tih aisi a phoe tue te amih taengah a cae. Te phoeiah Bethlehem la a tueih tih, “Cet uh lamtah camoe kawng te khaeh khaeh dawt uh, na hmuh uh vaengah kai taengla, ha puen uh, te daengah ni ka lo vetih anih te ka bawk eh,” a ti nah.
Manghai ol te a yaak uh nen tah vik cet uh. Te daengah khothoeng ah aisi te lawt a hmuh uh. Te dongah amih te camoe om nah a pha hil a lamhma pah tih a soah a pai pah. 10 Aisi te a hmuh uh vaengah omngaihnah neh a nah la bahoeng omngaih uh. 11 Im la a pha uh vaengah camoe neh a manu Mary te a hmuh uh dongah bakop doe ah a bawk uh. Te phoeiah a khohrhang te a ong uh tih a kutdoe la sui, hmueihtui neh myrrh te a paek uh. 12 Tedae Herod taengah bal pawt ham a mang ah a mangthui pa tih a kho la a tloe longpuei longah bal uh.
Egypt la a Rhaelrham Puei
13 Amih a caeh uh phoeiah Boeipa kah puencawn loh Joseph mang ah pakcak phoe tih, “Thoo, camoe neh a manu te lo, Egypt la rhaelrham laeh, nang taengah kan thui hlan duela pahoi om laeh. Herod loh camoe te poci sak hamla cai tih a toem coeng,” a ti nah.
14 Te dongah thoo tih camoe neh a manu te khoyin ah a loh tih, Egypt la cet. 15  Hos 11.1Te dongah Herod kah a dueknah rhi hil pahoi om. Te nen ni BOEIPA kah tonghma lamloh a thui tih,
“Ka capa te Egypt lamkah ka khue,”
a ti te a soep. 16 Te vaengah Herod loh kholo hlangcueih kah a tamdaeng te a ming tih bahoeng a thinhul. A tue te kholo hlangcueih taeng lamloh a cae vanbangla Bethlehem khui neh a vaang pum khuikah hlang a tueih tih camoe kum nit hmui te boeih a ngawn. 17 Te vaengah tonghma Jeremiah lamloh a thui tih,
18  Jer 31.15 “Rhama ah ol a yaak.
Rhahnah neh nguekcoinah loh yet.
Rakhel loh a ca rhoek te a rhah.
Tedae a om uh voel pawt dongah
a hloep te ngaih pawh,”
a ti te soep.
Nazareth La Habal Koep
19 Herod a duek phoeiah, Boeipa kah puencawn tah Egypt kah Joseph mang ah pakcak phoe tih, 20 “Thoo, camoe neh a manu te lo lamtah Israel kho la cet laeh, camoe kah hinglu aka mae rhoek tah duek uh coeng,” a ti nah.
21 Te dongah thoo tih camoe neh a manu te a khuen tih, Israel kho la a kun puei. 22 Tedae Arkhelas loh a napa Herod yueng la Judea te a uk tila a yaak tih tela caeh ham a rhih. Te cakhaw mang ah a mangthui pah bangla Galilee pingpang la cet. 23  Mrk 1.24; Luk 2.39; Jhn 1.45Te phoeiah Nazareth la a khue khopuei la cet tih kho a sak. Te tlam ni tonghma rhoek lamloh, “Nazaren la a khue ni,” a ti te a soep eh.

2:6 Mai 5.2

2:15 Hos 11.1

2:18 Jer 31.15

2:23 Mrk 1.24; Luk 2.39; Jhn 1.45