1 लॉकुरी याद तोर्स कि शासक अदिक अधिकारीगोळ हात्‍ती ईरूल, अदिक आंदुर्द आग्या मानसुल, अदिक हर ऊंद वळ्लीद क्याल्सा साटी तयार ईरूल, 2 आंदरी हेळ कि यारदु बारा दा बुरा अनबाळुल, लेकीन शांती प्रिय अदिक संगीभाव देल ईरूल, अदिक सप्पा मुंदुर सांगुळ हमेशा शालीन व्यवहार ईटुल. 3 यतिकी नाव भी पयले निर्बुद्धी, अदिक आग्या ईला मान्सावाळेर, अदिक गलत ईरेव. अदिक अलग अलग प्रकार इन अभिलाषागोळ अदिक सुखविलास इन गुलामी दा ईरेव, अदिक दुश्मनी भाव, अदिक जलनखोरी माळदुर दा जीवन व्यतीत माळतोगेव, अदिक बेकार ईरेव, अदिक आबुर दाबुर से दुश्मनी ईटतोगेव. 4 लेकीन याग नाम उद्धारकर्ता परमेश्वर उन करूणा अदिक प्यार प्रगट आत, 5 रा आव नाम उद्धार माळदुन; अदिक ईद वळ्लेव कर्मगोळ वजह देल ईला, जो नाव खुद माळेव, लेकीन आऊन दया देल नामी उळ्सदुन पवित्र आत्मा अन द्वारा, जो नामी व्हाशोद जनम कोळतान अदिक शुद्ध माळकु व्हाशोद जीवन कोळतान. 6 परमेश्वर नाम मा पवित्र आत्मा अक उद्धारकर्ता यीशु मसीह अन द्वारा भरपुरी देल कोटान. 7 इदुरसाटी परमेश्वर नामी तान अनुग्रह अन द्वारा आऊन सांगुळ न्यायी ठहरूस्यान ताकी यार्द आशा नाव माळेव आ अनन्त जीवन इन उत्‍तराधिकारी इक हासिल माळ सक्केव.

8 ईद सही अनकु आग्याद, अदिक ना चाहासतीन कि नी ई मातगोळ्द बारा दा हिम्मत देल माताळ इदुरसाटी कि यार परमेश्वर मा विश्वास माळ्यार, आंदुर वळ्लीद-वळ्लीद क्याल्सागोळ दा हतकु ईरोद ध्यान ईटुल. ई मातगोळ वळ्लेव अदिक मंळसागोळ्द फायदा नव आव. 9 लेकीन मूर्खपन इंद विवादगोळ अदिक वंशावलीगोळ, अदिक विरोध अदिक झगळागोळ देल जो व्यवस्था अन्द बारा दा आद, रा ऊळ्दकु ईर; यतिकी अव निष्फल अदिक व्यर्थ आव. 10 यावारा फूट हाकावाळा मंळसा अक कम से कम येढ्ढ घन चेतावनी कोळ, अदिक बाक आऊन सांगुळ ज्यादा येनु माळबाळ. 11 यतिकी नीव जान्सतीर कि ईत्‍ता लॉकुर भ्रष्ट आगेग्यार अदिक आंदुर पाप आंदुर्द गलत आगोद प्रमाण कोळताव.

12 ✡प्रेरितगोळ २०:४; इफिसिगोळ ६:२१,२२; कुलुस्सिगोळ ४:७,८; २ तीमुथियुस ४:१२याग ना नीन हात्‍ती अरतिमास या तुखिकुस उक कळाईन रा नान हात्‍ती निकुपुलिस नगर दा बरोद कोशिश माळेत, यतिकी ना अल्या सोळ कडोद तय माळीन. 13 ✡प्रेरितगोळ १८:२४; १ कुरिन्थि १६:१२जेनास व्यवस्थापक अदिक अपुल्लोस उक कोशिश माळकु मुंद पोहचुस बुळ, अदिक नोळ कि आंदरी यातोदु चिज इन कमी आगबाळुल. 14 नाम लॉकुर भी वळ्लेव क्याल्सा माळोर साटी समय तेगोद कलु पायजे ताकी जो जरूरी आद अदुर्द पुर्ती आग सकुल ताकी आंदुर बेकार इन जीवन जीऊस बाळुल.

15 नान सप्पा साथीगोळ्द नीनी नमस्कार. जो विश्वास इन कारण नाम से प्यार ईटतार, आंदरी नमस्कार.

नीम सप्पा मुंदुर मा परमेश्वर उन अनुग्रह आग्त ईरूल.