5
Wèq Ban Con Caiq Chuaq
1 Au gòi bàu pariaq cô ca 'bài craq Tagop Hadròih ma broq gàu ta pì, ma jah 'màng aih au hadai craq broq gàu tìah ca wì, mangai khoi hnoq bìac jìq xa da Chuaq Jêxu Crich, wa hadai i phàn ta bìac 'ngah 'ngai jò Chuaq mahno loh, 2 wèq ban con caiq da Boc Plình khoi jao ca pì beq; broq bìac aih ùh xài taiq pa-àu mahaq bùi manoh, pì broq ùh xài taiq ham ca 'bac waq ca i lòiq, mahaq taiq i manoh enh broq dìq ca jaq, 3 ùh xài broq craq padit ca con trìu Chuaq khoi am ca pì wèq ban, mahaq ep broq dua lem ca wì haq. 4 Jò Mangai Ban Trìu Broq Gàu trùh, pì jah côi cadoh 'ngah 'ngai ùh taclah.
5 Hadai 'màng aih, 'bài gu calô 'yoh hanam phai loq dì tiaq wì ma khoi bàc hanam. Rìm ngai yŏc bìac loq paha'neq dađeh patìh ca dabau beq, ma jah 'màng aih:
“Boc Plình tajraq hlài ca mangai loq catèh,
mahaq am xôq ramŏt ca mangai loq paha'neq dađeh.”*5:5 BR 3:34
6 'Màng aih, paha'neq dađeh loh enh 'neq ca capiang tì cwìang itai da Boc Plình beq, waq ca Haq jah dèch pì trùh jò troq, 7 jao am dŏng dìq rìm bìac pì ma lèt ca Boc Plình beq, ma jah 'mang aih Haq i manoh wèq ban pì.
8 Ep wèq dađeh wa rìu hmàng beq, taiq haq ma git ca pì aih can kiac Satan, haq tìah ca baco hlari ca-ùm, lam rinh dudan ca pì, ti chaq ngan mangai leq haq jah caq jêh đac. 9 Yòng cajap ta manoh lùi tajraq hlài ca haq beq, ma jah 'màng aih bèn loq oh daq bèn ŏi jàp ta crŏng taneh hadai pajùm chìuq xalep.
10 Waiq xìn Boc Plình da rìm bìac am dech ma khoi creo ca pì mùt ta can 'ngah 'ngai hloi hloi da Haq ŏi ta Chuaq Jêxu Crich, atìq ca pì chìuq xa đò dùnh toq 'biaq, cla Haq raq jah broq ca pì gêh tôm, cajap cajình wa am tam padren, 11 cwìang itai wa can 'ngah 'ngai ŏi ta Haq hloi hloi ùh lùch. Amen.
Bàu Hmàih Pulùch
12 Au nhò Sila, mangai au ngan tìah dèh ca oh daq wa dìq dèh ca manoh jùp au ta bìac Chuaq, achìh thò cô đòiq pariaq pì, anoi hlài ca pì loq cô bìac am dech joq 'nàng da Boc Plình, pì ep yòng cajap ta aih beq!
13 Tagop Hadròih da 'bài mangai jah ràih ŏi ta Ba-bi-lôn gòi bàu bòch hmàih pì, wa Mŏc, au doi tìah ca con au, hadai gòi bàu hmàih. 14 Oh daq khòh yŏc bàu loq waq hmàih ca dabau ŏi ta Chuaq Jêxu Crich.
Waiq xìn can catèm ŏi ti dìq dŏng pì ta Chuaq Jêxu Crich. Amen.