1 I mòiq hì Đawit bòch: “Cadraq da Saulò i ca mangai leq ŏi rìh ùh? Taiq nen au khoi rùp bàu Jô-na-than au broq lem ca mangai aih.”

2 Jò aih ta'nàih i mòiq ngai mangai hapŏng da cadraq Saulò, hiniq haq Xiba. Wì creo haq mùt glàm Đawit. Bùa bòch haq: “Ìh Xiba ùh?”

Haq tèo: “Òq au cô raq, hapŏng bùa.”

3 Bùa bòch hòm: “Pi i ca mangai leq da cadraq Saulò 'mòh? Au enh yŏc can xa-ŏch da Boc Plình hnhu am ca mangai aih.”

Xiba tèo bùa: “Ŏi i mòiq toq con calô da Jô-na-than, haq cwê dŏng baiq toq jènh.”

4 Bùa bòch: “Haq ŏi ta leq?”

Xiba tèo: “Haq ŏi ta hnem Maki, con A-mi-ên ŏi ta Lô-đê-ba.”

5 Bùa Đawit thê mangai lam trùh ta hnem Maki, con A-mi-ên, ta Lô-đê-ba đòiq yŏc 'ràng haq trùh.

6 Jò Mê-phi-bô-sêt con Jô-na-than, xau Saulò khoi trùh jang Đawit, haq bla-op ta taneh.

Bùa Đawit bòch: “Ìh Mê-phi-bô-sêt?”

Haq tèo: “Au cô hapŏng bùa.”

7 Đawit doi ca haq: “Apaq crè, au enh broq lem ca ìh taiq nen au khoi rùp bàu ca Jô-na-than, baq ìh: Au am hlài ca ìh dìq taneh da Saulò, boc ìh, wa ìh jah acaq pajùm mòiq ca'bŏng ti au hloi hloi.”

8 Mê-phi-bô-sêt bla-op ta taneh, doi: “Au cô cabô gleq bùa ma ngan hnoq mòiq toq coq cachìt troi au?”

9 Bùa creo ca Xiba hapŏng Saulò trùh, tanap: “Dìq dŏng cùng hang wa hnem Saulò craq ìh, au khoi am dŏng ca xau haq. 10 'Màng aih, ìh, con ìh wa hapŏng ìh ep abèq taneh aih am ca haq, khoi èh yŏc 'mau phi aih am ca xau da Saulò craq ìh, đòiq haq i pua caq wa diac ôq. Mahaq Mê-phi-bô-sêt xau da Saulò, craq ìh jah acaq pajùm ti ca'bŏng au hloi.” Xiba i 15 ngai con calô wa 20 ngai hapŏng.

11 Xiba tèo: “Mangai hapŏng bùa jah broq tiaq rìm bìac ìh ma thê broq.” 'Màng aih, Mê-phi-bô-sêt èh caq pajùm ti ca'bŏng Đawit 'màng ca con calô da bùa dìq.

12 Mê-phi-bô-sêt i mòiq toq con calô 'yoh, hiniq haq Mica. Dìq ca 'bài mangai ma ŏi ta hnem Xiba, aih hapŏng da Mê-phi-bô-sêt. 13 Mê-phi-bô-sêt ŏi ta Jê-ru-sa-lem, ma jah 'mang aih haq caq pajùm hloi ti ca'bŏng bùa. Haq cwê baiq toq jènh.