3
I Jò Pajaq Đòiq Broq Rìm Hiniq
1 Rìm ngè jah i tiaq troq dèh jò da haq;
rìm ngè ta crŏng taneh cô, dìq i troq dèh jò da haq enh ca'nam plình:
2 I jò xa-ông, i jò cachìt;
i jò pìt, i jò bùch.
3 I jò jêh đac; i jò broq brêh;
i jò raliang; i jò pa'nhrang hlài.
4 I jò crò hmoi, i jò do;
i jò ta-oih, i jò muaq.
5 I jò tèm đac hmu, i jò tŏch hlài hmu;
i jò ca'muq, i jò khèa đac.
6 I jò chaq, i jò hêq;
i jò wèq, i jò hwenh đac.
7 I jò hich đac, i jò clep hlài;
i jò hatenh, i jò capoch;
8 I jò loq waq, i jò git;
i jò tajêh poh, i jò catèm;
Boc Plình Khoi Tah Jò Hloi Hloi ta Manoh Mangai
9 I lòiq cleq ca mangai ta bìac abroq xalep? 10 Au khoi ngan hnoq bìac Boc Plình khoi am ca mangai đòiq wì jiang broq. 11 Rìm bìac Boc Plình khoi broq aih dìq lem, troq jò troq nòi. Boc Plình hadai khoi tah jò hloi hloi ta manoh mangai, mahaq con mangai leq nui 'nì loq ca xèm gŏi bìac Haq ma broq enh baxèm trùh lùch. 12 'Màng aih au loq bìac ma yi lem ca con mangai aih lem bùi, wa broq bìac lem lùch dèh ca 'nhòng cla; 13 Caq, ôq lem bùi dèh ca bìac cla ma khoi i, aih raq bìac Boc Plình khoi hnhu am ca bèn. 14 Au hnoq rìm bìac Boc Plình broq aih jah ŏi i hloi hloi, con mangai ùh jah tam hadai ùh jah 'bòt. Boc Plình broq 'màng aih đòiq con mangai phai loq yùq crè ca Haq.
15 Bìac cleq manàiq i, calah nèh hadai khoi i;
bìac cleq manàiq trùh, hadai khoi trùh calah nèh raq.
Boc Plình broq bìac 'màng aih đòiq rìm hiniq aih loh hlài yôt yôt.
16 Au hadai ngan hnoq bìac cô enh 'neq mat mahì,
ta nòi lem jang i ngang dù, wa ta nòi doi ta-atoq,
i can ngang dù.
17 Au khoi hèm:
“Boc Plình jah hadrah
xam mangai ta-atoq wa mangai ngang dù;
taiq Boc Plình khoi 'nac tình
jò broq loh rìm bìac wa rìm hiniq.”
18 Au khoi hèm: “Boc Plình enh baxa thù con mangai, đòiq ca wì haq jah loq wì haq hadai bu dàng ngè aban. 19 Ma jah 'màng aih bìac cachìt, bìac rìh da con mangai wa da ngè aban hadai tìah ca dabau, con mangai cachìt, ngè aban hadai cachìt, dìq hihèm xam hòi hihèm; con mangai ùh yi hnao cleq ca ngè aban, taiq rìm bìac dìq dech 'ngwan. 20 Dìq ca wì aih hlài mòiq nòi. Dìq ca wì wìa enh blo taneh, èh hadai hlài ta blo taneh. 21 Cabô jah loq mahua yiang da mangai dang tŏc wa mahua yiang da ngè aban loh ta taneh?”
22 'Màng aih au khoi ngan hnoq bìac ma yi lem dìq jaq ca con mangai, aih jah lem bùi dèh ca bìac cla khoi broq, aih raq cùng baha da haq. Ma jah 'màng aih cabô jah wìh hlài đòiq jah hnoq bìac jah trùh jò bèn khoi cachìt?