5
Manoh Caq Ŏi Enh Ngìa Boc Plình
1 Ep dìq jaq wèq dađeh jò mùt ta hnem Boc Plình. Trùh jêq wa tamàng beq yi hnao ca mangai blùng dèch am ngè tadreo, taiq wì ùh 'nì ca dađeh 'nang broq dù.
2 Apaq dahôiq capoch bàu
leq loq renh hèm bìac cleq
enh ngìa ca Boc Plình,
ma jah 'màng aih Boc Plình ŏi ta plình,
wa ìh ŏi ta crŏng taneh,
'màng aih toq capoch toq 'biaq bàu.
3 Hèm bàc èh loq loh ca apô;
capoch bàc èh loq loh ca blùng.
4 Jò ìh pachac bìac cleq ca Boc Plình, èh renh broq gêh beq, ma jah 'màng aih Boc Plình ùh bùi manoh ca mangai blùng; renh broq gêh bàu pachac ìh beq. 5 Apaq pachac, aih yi lem ca khoi pachac mahaq ùh broq gêh. 6 Apaq đòiq ca hacùng ìh broq ca ìh broq tôiq. Apaq doi ca mangai 'ràng bàu da Boc Plình, au khoi capoch bàu ùh troq. Gleq ìh ma broq ca Boc Plình loh nòih ca bàu hùaq da ìh, èh Haq raliang đac rìm bìac tì ìh khoi broq loh. 7 Ŏi nòi leq bàc bìac apô wa bàc bàu, ŏi ta aih bàc bìac dech 'ngwan. Thai ca bìac aih, khòh loq iu Boc Plình beq.
Bìac Can Padrŏng Wa Cùng Hang Dìq Dech 'Ngwan
8 Tàng ìh hnoq mangai pa ŏi ta gùng 'bìq padit padiang, bìac ta-atoq wa trong troq 'bìq wì jôiq đac, èh paq hamàih, ma jah 'màng aih mangai i cwìang jah mangai yi i cwìang wiang ti haq, èh 'bài mangai i cwìang hloi hloi wiang ti dabau. 9 Doa loq dìq lòiq cùng hang enh đùng taneh aih am ca dìq jàn; bùa hadai jah cùng hang wa i lòiq enh đùng taneh.
10 Mangai ham ca 'bac toq leq 'bac xôq ùh tàu;
mangai ham ca cùng hang, cùng hang toq leq xôq ùh 'nang lem,
bìac cô hadai dech 'ngwan.
11 Jò cùng hang loh bàc,
bàc mangai wiang caq.
'Màng aih, mangai i bàc cùng hang
aih i ca lòiq cleq enh gùng ca jah ngan dèh lòiq aih?
12 Mangai abroq, 'nhac ca caq bàc loq 'biaq haq jah cùi jìang,
mangai padrŏng can caq bàc mahaq cùi ùh catèm.
13 I mòiq bìac au hnoq dìq jaq ngang dù enh 'neq ca mat mahì:
aih i mangai padrŏng can 'ngùc dèh cùng hang èh 'bìq xa ca haq.
14 Mahaq jò haq tình ùh troq,
cùng hang haq hnhung dìq, haq khoi i con calô,
èh ùh i cleq jah am dèh ca con.
15 Con mangai clìh enh cliac miq baiq toq tì dech,
jò cachìt hadai tì dech baiq toq.
Haq loh lam ùh jah wê dahwèq cleq haq ma xalep broq loh,
jò rìh ŏi crŏng taneh cô.
16 Cô joq bìac ranàc càn:
con mangai jò xa-ông 'màng leq, cachìt hadai 'màng aih.
'Màng aih con mangai chìuq xalep broq bàc bìac èh jah i lòiq cleq
jò bìac broq khoi 'bìq cayeo hlôi đac?
17 Con mangai phai caq ca xa lùch ca 'nhòng,
glàm bàc bìac xalep, hinìq tôq wa loh nòih.
18 Au hnoq bìac ma dìq jaq lem ca con mangai, aih caq ôq wa yŏc manoh lem bùi abroq enh 'neq ca mat mahì lùch ca 'biaq hanam ma Boc Plình khoi pajaq, ma jah 'màng aih, aih raq phàn da con mangai. 19 Yi hnao hòm, mangai leq Boc Plình am cùng hang jah padrŏng can, èh nhàn yŏc beq lem bùi ca cùng hang cla khoi xalep broq loh. Aih raq bìac Boc Plình khoi hnhu am. 20 Mangai aih ùh hìaq ep hèm hrìn 'bài hanam can rìh cla, ma jah 'màng aih Boc Plình khoi am ca haq bìac broq xam manoh jah bùi.