6
Can Rìh Dech 'Ngwan
1 Au hnoq i mòiq bìac ngang dù enh 'neq ca mat mahì, bìac aih i bàc ta'ne mangai calô: 2 Boc Plình am ca haq cùng hang, haq padrŏng can wa i 'bang tìang càn, trùh 'mòi haq ùh thìuq mòiq bìac cleq manoh haq ma ngèh enh. Mahaq Boc Plình ùh am ca haq jah bùi manoh bìac aih. I mòiq ngai tamoi broi jah bùi hùang da haq cùng hang aih. Bìac cô joq bìac jìq manoh wa khoi dech 'ngwan.
3 Tàng i mòiq ngai xa-ông jah mòiq hrinh ngai con, jah rìh halình, mahaq ùh jah hùang bìac manoh haq ma ngèh enh, cachìt ùh i bìac catùh troq, au hèm tàng haq cachìt ralàih jò bu clìh enh cliac dèh miq, yi lem ca mangai aih, 4 ma jah 'màng aih haq trùh ta bìac dech 'ngwan, haq hlài nòi clam clôiq; èh hiniq haq hadai mùt ta nòi clam clôiq; 5 haq 'nhòq lah hnoq đeh mat mahì, hadai 'nhòq 'nì loq đeh ca bìac cleq, mahaq haq xôq jah padài yi hnao ca mangai bàc hanam tau. 6 Mangai tau 'nhac ca rìh jah baiq ngŏng hanam, mahaq ùh 'nì bùi jò nhàn bìac lem jò ŏi rìh, ma ùh xài rìm ngai dìq lam mòiq nòi cachìt 'mòh?
7 Dìq bìac abroq xalep da mangai, aih taiq pua caq;
mahaq manoh loq ham enh ùh jò leq jah tôm tàu.
8 Mangai khôn rabiaq jah lòiq cleq
yi hnao ca mangai blùng?
Mangai pa mahaq loq caq
ŏi enh ngìa ca mangai 'nang rìh.
9 Bìac cleq mat jah hnoq,
aih yi lem ca bìac manoh ngèh enh.
Cô hadai bìac dech 'ngwan
wa hnan tiaq cayeo.
10 Bìac cleq khoi i, khoi jah i hiniq,
wa khoi canao loq con mangai 'màng leq,
hadai con mangai ùh jah rahen hlài ca Boc Plình
ma yi dêh ca dađeh.
11 Kiang bàc bàu dàng leq, kiang loq manhài dàng aih.
'Màng aih, bàc bàu i lòiq cleq ca mangai?
12 Ma jah 'màng aih cabô jah loq bìac cleq lem ca con mangai jò haq ŏi rìh, jò can rìh haq toq 'biaq hanam dech 'ngwan? Can rìh haq tìah ca 'mù. Ma jah 'màng aih cabô jah doi ca con mangai loq bìac cleq loh atìq ca haq enh 'neq ca mat mahì.