8
Is-ra-ên Rai Cayeo Wì Jah Gat Bahùt
1 “Dèch ken ti hacùng 'mat hlôi beq!
Ma jah 'màng aih mangai tagit tajraq hlài ca hnem Chuaq tìah ca cliang,
padon loh taiq Is-ra-ên khoi blàq wêh jao Au,
wa tajraq hlài ca ranenh Au.
2 Is-ra-ên creo ca Au:
‘Ôi Boc Plình da Is-ra-ên, nhèn loq ca Ìh!’
3 Is-ra-ên khoi cađac trong lem,
mangai tagit jah tajraq hlài hnan tiaq haq.
4 Wì haq yŏc mangai tŏc broq bùa mahaq ùh bòch Au,
yŏc mangai tŏc broq cwan ma Au ùh 'nì.
Wì haq 'noh dèh wang 'bac broq ca dađeh dua 'mù,
'màng aih wì broq ca dađeh 'bìq raliang đac.
5 Ô Sa-ma-ri, dua 'mù 'bo con ìh khoi 'bìq hwenh đac!
Can nòih Au khoi plôh loh tajraq hlài ca wì haq trùh
jò leq ma wì haq pi broq tôiq cô èh?
6 Ma jah 'màng aih 'bo con aih bìac tì da Is-ra-ên broq loh,
mòiq mangai thòq khoi broq loh,
'màng aih, bìac aih ùh xài Boc Plình.
'Bo con da Sa-ma-ri
jah padah loh tang ha'nech.
7 “Wì haq khoi rai cayeo
wì jah gat bahùt.
'Mau wì haq ùh loh plì,
ùh loh dàc;
tàng loh,
èh xôq jàn Diac 'noiq lŏn yŏc.
8 Is-ra-ên khoi 'bìq lŏn.
Manàiq wì haq ŏi ta'ne 'bài jàn
tìah ca dahwèq ùh loh cleq.
9 Wì haq tìah ca lùa rôm cadàu tŏc ta A-si-ri;
Ep-ra-im khoi tech dađeh đòiq rŏt, èh manoh mangai
jah loq waq ca haq.
10 'Nhac ca wì haq rŏt jah manoh ta 'bài jàn Diac 'noiq,
mahaq Au gop đòiq wì haq.
Pi dùnh hòm wì haq èh ep broq hapŏng
enh 'neq ca bùa wa ca 'bài cwan.
11 “Taiq Ep-ra-im khoi broq tam bàc toq 'bŏng tadreo đòiq broq tôiq,
èh 'bài 'bŏng tadreo khoi wìa nòi broq tôiq lôi.
12 Au khoi achìh ranenh Au ca haq tiaq 10.000 trong,
mahaq wì haq ngan ùh loh cleq.
13 'Nhac ca wì haq dèch am ngè tadreo ca Au,
caq jam ngè tadreo aih,
mahaq Chuaq xôq ùh nhàn wì haq.
Manàiq Haq hmàng hlài tôiq lôi wì,
wa baxa wì;
wì ep wìh hlài ta Aicàp!
14 Is-ra-ên khoi hèt ca Boc Plình ma broq loh wì haq;
wì haq toq broq tam hnem tadreo càn;
Juđa khoi bàc tam 'bài phôq cajap.
Mahaq Au 'noh ùnh ta 'bài phôq haq,
wa ùnh aih cheo 'bài hnem rahù càn.”